Gruziiada eldıŋ Euroodaqpen qosyluyn qoldaityndar 2 jeltoqsan künı besınşı kün qatarynan ükımettıŋ eurointegrasiia kursynan bas tartuyna qarsy narazylyq bıldırdı. Būl turaly «Kavkazskii uzel» onlain basylymy men bırneşe Telegram-kanaldar jariialady, dep habarlaidy “Adyrna”.
Polisiia jinalǧan halyqqa qarsy köz jasyn aǧyzatyn gaz, su atqyştar men tütın granatalaryn qoldandy.
Sovanews onlain basylymynyŋ mälımetınşe, narazylyqtar tek Tbiliside ǧana emes, sonymen qatar Batumi, Kobuleti, Ozurgeti jäne Gruziianyŋ basqa da qalalarynda ötude. DW tılşısınıŋ baǧalauy boiynşa, Tbiliside jäne eldıŋ basqa ırı qalalarynda köşege ondaǧan myŋ adam şyqqan.
Sonymen qatar, Tbiliside parlament ǧimaratynyŋ aldyna jnalǧandar pirotehnikany qoldandy. Rustaveli daŋǧylynda barrikadalar ornatyldy. «Eho Kavkaza» mälımetınşe, narazylyq bıldıruşıler parlamenttıŋ temır qorşauyna soqqy jasap, keiın su atqyş qoldanylǧan.
«Rustaveli daŋǧylyndaǧy narazylyq bıldıruşılerdıŋ beibıt jinalys şegınen şyǧyp kettı, sondyqtan Işkı ıster ministrlıgı parlament ǧimaratynyŋ ainalasyndaǧy aumaqty tazalau üşın zaŋmen qarastyrylǧan arnaiy şaralardy qoldanatyn bolady», — delıngen Gruziia IIM 2 jeltoqsanda jariialaǧan mälımdemesınde.
Aldyŋǧy künderde ministrlık Tbiliside tört kün ışınde 224 adamdy ūstaǧany turaly habarlady.
Gruziianyŋ premer-ministrı İraklii Kobahidze 2 jeltoqsanda baspasöz mäslihatynda eldıŋ eurointegrasiiasy «keiınge qaldyrylmaidy, bıraq bar küşpen jalǧasady» dep mälımdedı. Sonymen qatar saiasatker oppozisiia ökılderımen kelıssözder jürgızu mümkındıgın joqqa şyǧardy, dep habarlaidy BBC.
DW tılşısınıŋ baiqauynşa, bilık osyndai mälımdemeler arqyly gruzin qoǧamyn tynyştandyruǧa tyrysyp jatyr, bıraq «qazırge deiın būl narazylyqtardyŋ aiaqtaluy men nätijesı belgısız». Qanşa uaqytqa sozylatyny jäne nege aparatyny da beimälım.
Sonymen qatar, Gruziia prezidentı Salome Zurabişvili tün ortasyna jaqyn X äleumettık jelısınde aǧylşyn tılınde mälımdeme jariialady: «Gruziiada halyq reseişıl quyrşaq rejimıne qarsy köterılıp jatyr. Astanadan eŋ kışı qalalarǧa deiın — būl bızdıŋ tarihymyzda būryn-soŋdy bolmaǧan qozǧalys. Habar aiqyn: menıŋ dauysymdy qaitaryŋdar! Menıŋ europalyq bolaşaǧymdy qaitaryŋdar».
Gruziianyŋ eurointegrasiiadan bas tartuyna qarsy narazylyqtar 28 qaraşada keşke bastaldy, sol kezde premer-ministr İraklii Kobahidze eldıŋ 2028 jylǧa deiın Europa Odaǧymen kelıssözder jürgızuden bas tartatynyn mälımdegen edı. Alǧaşqy künı polisiia narazylyq bıldıruşılerdı su atqyştarmen jäne köz jasauratatyn gazben taratuǧa tyrysty. Būǧan jauap retınde aksiiaǧa qatysuşylar barrikadalar qūryp, parlament ǧimaratyna feierverkterden «pulemet» ata bastady.
Gruziia prezidentı Salome Zurabişvili alǧaşqy künı narazylyqqa qosylyp, keiın memlekettıŋ basşysy retınde elde jaŋa parlamenttık sailau ötpeiınşe ornynan ketpeuge şeşım qabyldady. Ol qazırgı parlamenttı «zaŋsyz» dep atady. Al Kobahidze būl narazylyqtardyŋ zorlyq-zombylyqqa äkeluıne Europa saiasatkerlerı men oppozisiiany kınälı dep mälımdedı.
