Almaty qalasy soŋǧy jyldary būqaralyq sport pen mädeniet salasynda qarqyndy damyp keledı. Būl baǧyttar qala tūrǧyndarynyŋ densaulyǧyn nyǧaityp, ruhani qūndylyqtaryn baiytuǧa üles qosuda. Auqymdy ıs-şaralar men memlekettık baǧdarlamalar şeŋberınde ıske asyrylyp jatqan jūmystar qala ömırınıŋ sapasyn arttyryp, tūrǧyndardyŋ bos uaqytyn tiımdı ötkızuge yqpal etıp keledı.
Mäselen, 2022 jyly Almatyda 200-den astam sporttyq şara ūiymdastyrylyp, olarǧa 250 myŋnan asa adam qatysty. Būl körsetkış 2023 jyly 10%-ǧa ösıp, qatysuşylar sany 275 myŋǧa jettı. Türlı sporttyq turnirler, jarystar jäne spartakiadalar mektep oquşylary men studentterden bastap, egde jastaǧy azamattarǧa deiın qyzyǧuşylyq tudyryp otyr. Sonymen qatar, 2022 jyly qalada 20 jaŋa sport alaŋy aşylsa, 2023 jyly olardyŋ sany 25-ke köbeidı. 2024 jyly da bırneşe jaŋa nysannyŋ aşyluy josparlanǧan, būl tūrǧyndarǧa tegın jäne qoljetımdı sportpen ainalysu mümkındıgın arttyruda.
Almatynyŋ mädeniet salasy da erekşe qarqynmen damyp jatyr. 2022 jyly qalada 100-den astam mädeni şara ötkızılse, 2023 jyly būl körsetkış 120-ǧa jettı. 2024 jyly da 130-dan astam mädeni ıs-şara ötkızu josparlanǧan. Teatr qoiylymdary, konsertter, körmeler jäne ūlttyq merekelerge arnalǧan ıs-şaralar qala tūrǧyndarynyŋ mädenietke degen qyzyǧuşylyǧyn oiatyp, ruhani tūrǧyda baiytuda.
Bügınde jastarymyz är kün saiyn teatr, kıtaphana, türlı mädeni şaralarǧa baruǧa asyq. Äleumettık jelıden de Almatydaǧy teatrlar, parkter, arnaiy ıs-şaralardyŋ qanşalyqty jiı ötıp jatqanyn köruge bolady. Mūndai igı bastamalar qala tūrǧyndarynyŋ da köŋılınen şyqqanyn baiqai alamyz.
Sondai-aq, sport pen mädenietke degen qyzyǧuşylyqty arttyru üşın qala äkımdıgı arnaiy baǧdarlamalar jüzege asyruda. 2023 jyly ıske qosylǧan «Salauatty Almaty» baǧdarlamasy qala tūrǧyndaryna sporttyq jattyǧular men master-klastarǧa tegın qatysu mümkındıgın ūsyndy. Būl baǧdarlama aiasynda türlı sporttyq aksiialar da ūiymdastyrylyp, tūrǧyndardyŋ densaulyqqa degen közqarasyn oŋ özgertıp keledı.
Almatynyŋ sport infraqūrylymy da erekşe damyǧan. Almaty Arena, Halyq Arena, Medeu mūz aidyny, Şymbūlaq tau-şaŋǧy kurorty, Ortalyq stadion siiaqty zamanaui nysandar halyqaralyq deŋgeidegı sport şaralaryn qabyldauǧa daiyn. Mysaly, 2023 jyly Almatyda alǧaşqy ret Almaty Open atty halyqaralyq tennis turnirı ötkızıldı. Jeŋımpaz Karen Hachanovtyŋ alǧaşqy jattyqtyruşysy almatylyq maman İgor Bisenko boldy. Sonymen qatar, Almaty sportşylary Parij Olimpiadasynda da joǧary nätijeler körsettı.
Sporttyq ıs-şaralarǧa bailanysty qala tūrǧyndarynyŋ arasynda saualnama jürgızdık. Tolyq jauap bergen 10 adamnyŋ jeteuı Almatyda ötetın türlı marafondar, jarystarǧa jiı qatysyp, belsendı bolatynyn aitty. Al ekı adam qalada ötıp jatqan şaralar turaly äleumettık jelıden köretının aitty. Osy arqyly qalamyzda sporttyq şaralar, mädeni merekelerdıŋ damyp jatqanyn köruge bolady.
Almatynyŋ jastar qauymy sport jäne mädeniet salasynda erekşe belsendı. Olar teatrlar men muzeilerge jiı baryp, türlı sporttyq saiystarǧa qatysady. Qala äkımdıgı de jastardyŋ bastamalaryn qoldap, olarǧa arnaiy granttar men baiqaular ūiymdastyruda. Osylaişa, Almaty jastary salauatty ömır saltyn ūstanyp, mädenietke jaqyn bolu arqyly öz bolaşaǧyn damytyp keledı. Sport süier qauymnyŋ bırı – Rauan. Rauan Mutair futbol matchtaryn üzbei qarap, marafondardy jiı baqylaidy.
«Almatyda sport salasy aitarlyqtai qarqynmen damyp keledı dep aituǧa negız bar. Soŋǧy jyldary qalada köptegen halyqaralyq jäne respublikalyq sport şaralary ūiymdastyryldy. Mäselen, Almatyda biyl tūŋǧyş ret tennisten halyqaralyq Almaty Open turnirı öttı, onda älemnıŋ üzdık tennisşılerı öner körsettı. Al osy turnirdıŋ jeŋımpaz atanǧan Karen Hachanov reseilık tennisşı bolsada alǧaşqy bapkerı almatylyq maman İgor Bisenko. Sonymen qatar, Parij Olimpiadasynda jüldelı oryndar alǧan sportşylardyŋ basym bölıgı almatylyqtar boldy. Mysaly, Nazym Qyzaibai, İslam Sätpaev, Aleksandra Le, Nariman Kurbanov jäne Ǧūsman Qyrǧyzbaev sekıldı sportşylar Qazaqstannyŋ atyn älemge tanytty. Futbol salasynda da Almatynyŋ jetıstıgı zor. Qairat futbol akademiiasy Qazaqstandaǧy üzdık bolyp sanalady, jastar arasynda barlyq jas sanatynda jüldelı oryn alady, al bas komandasy biyl chempiondyqqa ümıtker. Qazaqstan ūlttyq qūramasynda osy akademiianyŋ tülekterı köptep kezdesedı. Sondai-aq, futzaldan Qairat kluby UEFA Chempiondar Ligasynyŋ elitalyq kezeŋıne qatysyp, jaqsy nätijeler körsetıp jatyr. Jaqynda UEFA oiyndary Almatyda Baluan şolaq saraiynda ötkenın aita keteiık. Almatynyŋ sport infraqūrylymy da joǧary deŋgeide damyǧan. Almaty Arena, Halyq Arena, Medeu mūz aidyny, Şymbūlaq tau-şaŋǧy kurorty, Ortalyq stadion, Baluan Şolaq atyndaǧy sport saraiy – mūnyŋ bärı älemdık deŋgeidegı sport şaralaryn qabyldauǧa daiyn nysandar. Qysqy sport türlerı üşın de Almaty öte qolaily qala sanalady. Tau-şaŋǧy sportyna qajettı tabiǧi jäne jasandy infraqūrylymdary arqyly Almaty elımızdıŋ sporttyq ortalyǧy bolyp tūr. Būdan bölek, Şymbūlaq TMD elderı arasynda eŋ üzdık tau-şaŋǧy kurorty atandy», - deidı Rauan.
Mūndai bastamalar qalanyŋ äleumettık ömırınıŋ sapasyn köterıp, ekologiianyŋ jaqsaruyna yqpal etude. Almaty halqynyŋ densaulyǧy men mädeniettı damytuǧa baǧyttalǧan būl jobalar qalany densaulyq pen ruhaniiattyŋ ordasyna ainaldyru jolynda maŋyzdy röl atqarmaq.
