Oq atqan. Jambylda para aldy degen küdıkpen ekı polisei ūstaldy

Jambyl oblysynda ekı polisiia qyzmetkerı para aldy degen küdıkpen ūstaldy. Olardy  tūtqyndau barysynda bıreuınıŋ oq atqany belgılı boldy, dep habarlaidy "Adyrna" ūlttyq portaly Orda.kz agenttıgıne sılteme jasap. Mälımetterge süiensek, uchaskelık inspektordyŋ kömekşısı Nūrbol Qarabekov pen kämeletke tolmaǧandar ısı jönındegı inspektor Erbolat Orazbekov «Aişa bibı» şekara beketınde şetel azamattarynan 500-den 1000 teŋgege deiın aqşa jinaǧan. Resmi türde olardyŋ lauazymdyq mındetterı şekaradaǧy jūmystarmen bailanysty emes. Bıraq olar öz ökılettıkterın şamadan tys paidalanǧan. Nūrbol Qarabekov Jalpaqtöbe auylynda jūmys ıstegen, mūnda düngen qauymdastyǧy ökılderı tūrady. Onyŋ ärıptesı Erbolat Orazbekov jergılıktı mektepterdı baqylap, jasöspırımder arasynda qūqyqbūzuşylyqtyŋ aldyn alu jūmystarymen ainalysqan. Ärıptesterınıŋ aituynşa, ekeuı de adal qyzmetker retınde tanylǧan, eşqandai küdık tudyrmaǧan. Küdıktılerdı Antikor qyzmetkerlerı Asa auylynda ūstady. Qarabekovtı jūmys ornynda qolǧa tüsırdı. Kuägerlerdıŋ aituynşa, ol äuege oq atqan. Zardap şekkender joq. Al qaru tez arada tärkılengen.