"Qazaqmystaǧy" ereuıl. Ministrlık jūmysşylardy zaŋnamany būzdy dep aiyptady

17-18 jeltoqsan künderı "Qazaqmys korporasiiasy" JŞS-nıŋ "Jezqazǧantüstımet" öndırıstık bırlestıgınıŋ bırneşe şahtasynda jūmysşylar jalaqyny köterudı talap etıp, jūmysyn toqtatty. Ereuılge qatysuşylar bastapqyda jalaqyny 30%-ǧa köterudı sūrasa, keiın būl talapty 100%-ǧa deiın arttyrǧan. Ministrlık jūmysşylardyŋ būl äreketın "eŋbek zaŋnamasyn būzu" dep baǧalady, dep habarlaidy "Adyrna" ūlttyq portaly. "Qazaqmys" basşylyǧy jūmysşylarǧa jalaqyny köterudıŋ ekı nūsqasyn ūsynǧan. “Jalaqyǧa keler bolsaq, jūmys beruşı 2025 jyldyŋ 1 qaŋtarynan bastap köterudıŋ ekı nūsqasyn ūsyndy. Bırınşısı, 8,5%-ǧa indeksteu jäne öndırıstık jospardy oryndaǧany üşın 50 AEK mölşerınde qosymşa tört toqsandyq syilyqaqy (2025 jyly – toqsan saiyn 196 myŋ teŋge) berıledı. Ekınşısı, jalaqyny 15,6%-ǧa indeksteu”, – dep mälımdedı “Qazaqmys”. Degenmen, būl ūsynystar ereuılge şyqqan jūmysşylardy qanaǧattandyrmady. Eŋbek jäne halyqty äleumettık qorǧau ministrlıgınıŋ mälımdeuınşe, jūmysşylar talaptaryn zaŋda körsetılgen tärtıppen jūmys beruşıge resmi türde ūsynbaǧan jäne mäselenı tatulastyru komissiiasynda qaramastan öndırıstık prosestı toqtatqan. Ministrlık būl jaǧdai eŋbek zaŋnamasyn būzu dep baǧalady. "Qazaqmys" kompaniiasy ereuılge şyqqan jūmysşylardy jūmysty qaita jalǧastyruǧa jäne mäselenı qūqyqtyq tärtıpte şeşuge şaqyrdy. Sonymen qatar, zaŋnamany saqtamau tärtıptık jauapkerşılıkke äkep soǧatynyn eskerttı. Jūmysşylar talaptary oryndalmaiynşa narazylyqtaryn jalǧastyratynyn mälımdedı. Olar jalaqyny ekı esege arttyrudy talap etıp otyr. Eŋbek jäne halyqty äleumettık qorǧau ministrlıgı taraptardy tatulastyru räsımderın tek qūqyqtyq şeŋberde jürgızuge şaqyrdy. Ministrlık jūmysşylarǧa talaptaryn belgılengen tärtıp boiynşa talqylaudy ūsyndy.