Qazaqstan Premer-Ministrınıŋ orynbasary, ükımettık komissiianyŋ töraǧasy Qanat Bozymbaev Aqtau maŋyndaǧy äue apatyn tergeu boiynşa Qazaqstanǧa syrttan qysym körsetılıp jatyr degen aqparatty joqqa şyǧardy, dep habarlaidy "Adyrna" ūlttyq portaly Tengrinews.kz-ke sıltep.
«Būl – jalǧan aqparat. Eşqandai el būl oqiǧanyŋ män-jaiyn anyqtau prosesıne aralasuǧa tyrysyp jatqan joq. Bız būl tūrǧyda eşqandai mäsele körıp tūrǧan joqpyz», – dedı Bozymbaev.
Onyŋ aituynşa, Qazaqstan tergeuge müddelı elderdıŋ barlyǧyn qatystyrudy qamtamasyz etken.
«Būl eŋ aldymen üş el. Olar - Äzerbaijan, Resei Federasiiasy jäne Braziliia ( ūşaqty öndıruşı el). Qazır 17 jūmys ıstep jatyr. Qysym körsetudıŋ mänı joq. Sonymen qatar, Qazaqstan 1992 jyldan bastap Chikago konvensiiasynyŋ müşesı bolyp tabylady. Konvensiiaǧa säikes, kez kelgen aviasiialyq tergeu jürgızu şeşımın tergeu jürgızetın el qabyldaidy. Iаǧni, tek bız kımderdı tartu, kımmen jūmys ısteu jäne taǧy basqalaryn öz betımızşe şeşemız. Būl qoǧamda eşqandai sūraq tuyndamauy üşın qajet», – dedı Premer-Ministrdıŋ orynbasary.
Sondai-aq, Qanat Bozymbaev ūşaq apatynda qaza tapqandardyŋ keibırınıŋ denesı älı anyqtalmaǧanyn aitty.
2024 jylǧy 25 jeltoqsanda Aqtau maŋynda Azerbaijan Airlines äue kompaniiasynyŋ Baku (Äzerbaijan) – Groznyi (Resei) baǧytynda AHY8243 reisımen ūşyp bara jatqan jolauşylar ūşaǧy apatqa ūşyraǧan bolatyn. Äue reisı Astana uaqytymen saǧat 08:49-da Baku äuejaiynan josparlanǧan uaqyttan 11 minut erte ūşyp şyqqan. Groznyida qalyŋ tūman bolǧandyqtan, ūşaq aldymen Mahachqalaǧa, keiın Aqtauǧa baǧyttalǧan. Kaspii teŋızı üstınde ekipaj «tötenşe jaǧdai» signalyn jıberıp, şūǧyl qonuǧa sūranys jasaǧan. Aqtau äuejaiy ūşaqty qabyldauǧa daiyndalyp jatqanda, saǧat 11:30-da ūşaq äuejaidan 3 şaqyrym jerde qūlady.
Resmi apat sebebı äzırge belgısız. Är türlı boljamdar aityluda. Qara jäşık sol künı keşke tabyldy, endı mamandar onyŋ derekterın rasşifrovka jasaidy.
Ūqsas jaŋalyqtar
