Memleket basşysy Qasym-Jomart Toqaev qazaqstandyqtardy Jaŋa jyl merekesımen qūttyqtady, dep habarlaidy “Adyrna” ūlttyq portaly.
«Qymbatty otandastar! Sızderdı Jaŋa jyl merekesımen şyn jürekten qūttyqtaimyn! Bügın bärımız jüzjyldyqtyŋ şirek ǧasyrlyq belesıne qadam basqaly tūrmyz. Biyl Altai men Atyrau arasyndaǧy barşa jūrt tarihtyŋ jaŋa paraǧyn bır mezette aşady. Halqymyz ekı jyldyŋ toǧysar tūsyn ızgı nietpen, erekşe köŋıl-küimen kütedı. Ötken künderdı saralap, eskı jylǧa baǧa beredı. Arman-maqsatyn aiqyndap, bolaşaqqa ülken ümıtpen qaraidy. Būl – naǧyz otbasylyq mereke. Sondyqtan men barşaŋyzǧa, eŋ aldymen, elımız aman, jūrtymyz tynyş, bauyrymyz bütın bolsyn degım keledı», - dedı Prezident.
Prezidenttıŋ sözınşe, ūlu jyly ūltymyz üşın maŋyzdy oqiǧalarǧa toly boldy. Türlı saladaǧy reformalar jemısın bere bastady. Ekonomikanyŋ jaŋa baǧdaryn belgılep, naqty şaralardy qolǧa aldyq. Öŋdeu önerkäsıbı qarqyndy damuda. Bırqatar ırı öndırıs orny aşyldy. İnvestisiialyq ahual jaqsardy. Myŋdaǧan şaqyrym jol salynyp, jöndeldı. Elımızdegı eŋ ūzyn köpırdıŋ qūrylysy aiaqtalyp, halyq igılıgıne berıldı.
«Diqandarymyz mol astyq jinap, qambany dänge toltyrdy. «Taza Qazaqstan» aksiiasynyŋ aiasynda qalalar men auyldar jaŋaşa kelbetke ie bola bastady. Alǧaş ret azamattarymyzdyŋ ortaşa ömır süru ūzaqtyǧy 75 jasqa jettı. Öskeleŋ ūrpaqtyŋ jarqyn bolaşaǧy üşın auqymdy jūmys atqarylyp jatyr. Ūlttyq qordaǧy qarjynyŋ bır bölıgı balalardyŋ esepşotyna tüstı. Jüzden astam jaŋa mektep aşyldy. Köptegen äleumettık nysan salyndy», - dep atap öttı Toqaev.
Memleket basşysynyŋ aituynşa, Parlament deputattary qoǧamdaǧy özektı mäseleler boiynşa zaŋdar qabyldady. Sondai-aq biyl bız elımızdıŋ keleşegıne airyqşa äser etetın öte maŋyzdy şeşım qabyldadyq. Atom elektr stansiiasyna qatysty referendum ötkızdık. Köpşılık būl bastamaǧa qoldau bıldırdı.
Ūqsas jaŋalyqtar
