Aqtauǧa jaqyn jerde qūlaǧan ūşaqta bolǧan jolauşysy Nurullah Siradjov äue apaty turaly aityp berdı, dep habarlaidy "Adyrna" ūlttyq portaly Oxu.Az-qa sılteme jasap.
Ol - apat kezınde aman qalǧandardyŋ bırı.
"Men äielımmen bırge Groznyida tūratyn ūlyma bara jatqan edım. Ūşaq alǧaş ret soqqyǧa ūşyraǧanda, aiaq astymda ottyŋ jalyndaǧanyn sezdım de, jaraqat aldym dep oiladym. Äielımdı sabyrǧa şaqyruǧa tyrystym. Bıraq özımde ürei basym boldy. Beldıktı şeşıp, aiaq astyna qaraǧanymda ūşaqtyŋ edenı bütın edı. Men qaitadan ornyma otyrdym. Sol kezde ūşaqtyŋ artqy bölıgıne äldeqaida qatty soqqy tidı. Stiuardessalar jolauşylardy sabyrǧa şaqyryp, Groznyiǧa qonamyz dep habarlady", – deidı Siradjov.
Jolauşynyŋ aituynşa osy kezde ūşaq tömendep kele jatqan.
"Men bız qonuǧa jaqyndaǧanymyzdy, äuejai ǧimaratyn, jolaqtardy, ūşaqtardy kördım. On qabatty ǧimarattan tömenge qaraǧandai elestetıŋız. Bız jerge öte jaqyn boldyq. Qonatynymyzǧa senımdı edık", – deidı ol.
Bıraq däl sol sätte ūşaq qaitadan jyldamdyq alyp, kökke köterılgen.
"Stiuardessa jūmsaq zattardy jinap, basymyzdy aldyŋǧy oryndyqqa tırep, közımızdı jabudy ūsyndy. Menıŋ qalyŋ kürteşem bar edı, ony äielıme berıp, orynnan qozǧalmauyn ötındım, nūsqaulyq boiynşa äreket etudı aittym. Qorqu turaly oilaǧan da joqpyn, tek äielımnıŋ amandyǧy üşın alaŋdadym. Sol kezde ūşaqtyŋ jerge qūlaǧanyn sezdım", – dep qosty Siradjov.
2024 jylǧy 25 jeltoqsanda Aqtau äuejaiynan üş şaqyrym jerde Azerbaijan Airlines (AZAL) äzerbaijan äue kompaniiasynyŋ Embraer ūşaǧy apatqa ūşyrady. Ūşaq bortynda 62 jolauşy jäne 5 ekipaj müşesı bolǧan. Apattan 29 adam aman qaldy – olardyŋ arasynda Äzerbaijan, Resei jäne Qyrǧyzstan azamattary bar. Qazaqstandyqtar arasynda tırı qalǧandar joq.
Eske sala keteiık, apatqa ūşyraǧan Embraer ūşaǧynyŋ qara jäşıkterınıŋ derekterı taldanyp, Qazaqstanǧa jıberılgen bolatyn.
Ūqsas jaŋalyqtar
