Densaulyq saqtau ministrı Aqmaral Älnazarova Bas müfti Nauryzbai qajy Taǧanūlymen kezdesu ötkızdı, dep habarlaidy "Adyrna" ūlttyq portaly QazAqparatqa sıltep.
Qazaqstan Densaulyq saqtau ministrı Aqmaral Älnazarova Qazaqstan mūsylmandary dıni basqarmasynyŋ töraǧasy, Bas müfti Nauryzbai qajy Taǧanūlymen kezdesıp, vaksinasiialau jäne aǧza donorlyǧy mäselelerın talqylady.
Kezdesu barysynda ministr vaksinasiialaudyŋ infeksiialyq aurulardan qorǧaudaǧy maŋyzdylyǧyn atap öttı. Soŋǧy jyldary elımızde de, älemde de ekpeden bas tartu ürdısı ösıp, nätijesınde egılmegen azamattardyŋ arasynda infeksiialyq aurulardyŋ taraluy artyp keledı. Aqmaral Älnazarova balalardyŋ densaulyǧyn saqtau üşın ekpenıŋ maŋyzdylyǧyn erekşe atap öttı.
Ministr vaksinasiiadan bas tartudyŋ negızgı sebepterınıŋ bırı retınde ata-analardyŋ dıni senımderın atady. Osyǧan orai, Densaulyq saqtau ministrlıgı Qazaqstan mūsylmandary dıni basqarmasymen yntymaqtastyqty nyǧaityp, dıni faktorlardyŋ vaksinasiiaǧa äserın zertteudı josparlap otyr.
Transplantologiia salasyndaǧy jetıstıkterge qaramastan, aǧza donorlyǧy mäselesı özektı küiınde qalyp otyr. Qazırgı uaqytta Qazaqstanda donorlyq aǧzany kütu paraǧynda 4117 adam tūr, olardyŋ ışınde 96-sy balalar.
Ministr qaitys bolǧannan keiıngı donorlyq mäselesın jergılıktı qauymdastyqtar men meşıtterde tüsındırudıŋ maŋyzdylyǧyn atap öttı. Būl üderıste dıni köşbasşylardyŋ rölı erekşe, öitkenı olar halyqqa sanaly şeşım qabyldauǧa kömektesedı.
Älemde qaitys bolǧannan keiıngı donorlyqty damytuda İspaniia köşbasşy el bolyp tabylady, onda 1 million adamǧa şaqqandaǧy körsetkış 49,38-dı qūraidy. Būrynǧy TMD elderınıŋ ışınde Belarus köş bastap tūr (25,26), al İranda būl körsetkış 12,57-ge teŋ. Qazaqstanda būl körsetkış äzırge 0,36 deŋgeiınde qalyp otyr.
Ūqsas jaŋalyqtar
