Taraz qalasynda «Ruhani jaŋǧyru» baǧdarlamasy aiasynda «Eldık elge bailanysty» atty forumy öttı. Şaraǧa oblys äkımı Asqar Myrzahmetov, ardagerler, ziialy qauym ökılderı, biler keŋesınıŋ müşelerı, ūlttyq mädeni ortalyqtardyŋ, ükımettık emes ūiymdardyŋ jetekşılerı, oqytuşylar men jastarqatysty.
Oblystyq aumaqtyq käsıpodaqtar bırlestıgınıŋ töraǧasy Meirambek Tölepbergennıŋ aituynşa, qoǧamdyq kelısım men saiasi tūraqtylyqty saqtau öte maŋyzdy. Sondai-aq ol etnosaralyq jäne konfessiiaaralyq beibıtşılık, bırlık pen yntymaq, ūlttyq qūndylyqtardy jaŋǧyrtu maqsatyna negızdelgen forumnyŋ bererı mol ekenın tılge tiek ettı.
Al, Taraz qalalyq mäslihattyŋ hatşysy Batyrbek Külekeev forumnyŋ maŋyzdylyǧyn atap ötıp, ysyrapşyldyqqa arnaiy toqtaldy.
«Şyny kerek soŋǧy kezde qoǧamdaǧy kertartpalyq pen ysyrapşylyq turaly bır toqtamǧa keluımız kerek sekıldı. Öitkenı bügıngı toilardaǧy, ölım-jıtımdegı ysyrapşyldyq pen bei-bereketsızdı bırızdılıkke tüsıru kerek. Qazaq halqy bırlıktıŋ orny men maŋyzyn joǧary baǧalap, «Bırlık bolmai tırlık bolmas», «Bırlık tübı – bereke», «Baqyt – bırlıkte, bailyq – eŋbekte» dep tüigen. Sondyqtan da, el tızgının qolyna ūstaǧan ardaqty adamdar – handar, biler, auzy dualy aqsaqaldar el ışındegı asqynǧan dau, uşyqqan janjaldyŋ jolyna tosqauyl qoiarda el bırlıgıne syna tüspeu jaǧyna basa nazar audarǧan», – dedı B.Külekeev.
Sondai-aq, toihanalarǧa salyq salu, jastardyŋ tärbiesıne erekşe nazar audaru turaly oilarymen bölıstı. Basqosu barysynda özge de söz alǧan aqsaqaldar men el aǧalary qoǧamdaǧy tüiıtkıldı mäseleler, ūlttyq dästür men ädet-ǧūryptyŋ uaqyt aǧymymen özgeruı, ysyrapşyldyq pen daŋǧazalyqqa jol bermeu, jastar tärbiesınıŋ özektılıgı haqynda aityp öttı.
Forumdy qorytyndylaǧan aimaq basşysy Asqar Myrzahmetov köterılgen mäseleler toǧysynda oblys tūrǧyndaryn bırlık pen yntymaqqa, sabyrlyq pen qanaǧatşylyqqa, berekelı ömır süruge şaqyryp, qatysuşylar tarapynan Ündeu joldady.
«Jahandyq älemmen qabyspaityn, ūlttyŋ damuyna kedergı keltırıp, el ışıne ırıtkı salatyn ötkennıŋ keibır kertartpa daǧdylary men ädetterınen künı bügınge deiın aryla almai otyrǧanymyz jasyryn emes. Olar: jeŋ ūşynan jalǧasqan jemqorlyq, jerşıldık, tamyr-tanystyq, jüzşıldık pen ruşyldyq, ysyrapşyldyq pen astamşyldyq, daŋǧoilyq pen kerdeŋdık, orynsyz saltanat, qanaǧatsyzdyq pen ünemsızdık. Örkenietılıkke emes ösekke, ziialylyqqa emes ziiandyqqa, parasattylyqqa emes pasyqtyqqa, ızgılıkke emes ıbılıstıkke jeteleitın mūndai «ǧūryptardan» qūtylatyn kezeŋ keldı. «Irgelı eldıŋ ırgesın eser aǧym būzar» degendei, bügıngı taŋda destruktivtı dıni aǧymdardyŋ el arasyna etene enıp, jastardyŋ sanasyn ulap jatqany da barşa jūrtty alaŋdatyp otyrǧan kürdelı mäsele. Būl ürdıstıŋ tamyryna balta şauyp, ūlaǧatty ūrpaq tärbieleude zaiyrly bılımdı ūlttyq qūndylyqtarymyzben sabaqtastyra otyryp tüsındıru – barşamyzdyŋ basty maqsatymyzǧa ainaluy tiıs», – delıngen ündeude.
Sonymen qatar, būqaralyq aqparat qūraldary osy baǧytta nasihat jūmystaryn ūiymdastyru, äleumettık jelını paidalanuşylardyŋ jauapkerşılıgın arttyru üşın arnaiy zaŋ bekıtu kerektıgı aitylǧan.
«ADYRNA»
ūlttyq portaly
