«Sūŋqar» arnaiy jasaǧy halyqaralyq jarysta altyn medal jeŋıp aldy

QR Işkı ıster ministrlıgınıŋ "Sūŋqar" arnaiy jasaǧy Bırıkken Arab Ämırlıkterınde (Dubai) ötken SWAT Challenge halyqaralyq jarysynda bas jüldenı ielendı. Qazaqstandyq jasaq eŋ joǧary nätije körsetıp, jalpykomandalyq esepte bırınşı orynǧa şyqty. Sonymen qatar, qazaqstandyq basqa arnaiy jasaqtar – "Arystan", "Sardar" jäne "Arlan" da üzdık nätije körsetıp, jarystyŋ TOP-10 qataryna endı. "Sūŋqar" arnaiy jasaǧy jarystyŋ bırınşı kezeŋın 1 minut 34 sekundta aiaqtady. Osy uaqyt ışınde olar kedergılerden ötıp, nysanalardy däl közdep, şartty tūtqyndardy bosatty. Būl körsetkışke tek qytailyq komandalar jaqyndai aldy, bıraq aiyrmaşylyq öte az boldy. QR IIM Ūlttyq ūlan Bas qolbasşysynyŋ orynbasary Änsaǧan Baltabekov arnaiy jasaqtardyŋ būl jetıstıgı memleket basşysy men ükımettıŋ qoldauynyŋ arqasynda mümkın bolǧanyn atap öttı. Onyŋ aituynşa, arnaiy jasaqtar üzdık jabdyqtarmen, qaru-jaraqpen qamtamasyz etılgen jäne laŋkestıkke qarsy operasiialardy sättı oryndau üşın küşeitılgen daiyndyqtan ötedı. Biylǧy jyly Qazaqstannan alǧaş ret äielder qūramasy – "Tomiris" jarysqa qatysyp otyr. Būl komandaǧa elımızdıŋ är öŋırınen eŋ üzdık arnaiy jasaq jauyngerlerı ırıktelgen. "Komanda atauyn özımız taŋdadyq. Sebebı Tomiris – jauynger qyz. Bız osylaişa qazaqstandyq äielderdıŋ nege qabılettı ekenın körsetkımız keldı", – deidı komanda kapitany Ainaǧül Baijıgıtova. SWAT Challenge halyqaralyq jarysyna 80-nen astam elden 106 komanda qatysuda. Qazaqstan būl baiqauǧa 12 arnaiy bölımşemen qatysyp otyr. Olardyŋ qatarynda Ūlttyq qauıpsızdık komitetı, Memlekettık küzet qyzmetı jäne aimaqtyq polisiia departamentterı bar. Jarys älı tört kün boiy jalǧasady.