Qazaqstanda mal basy türınde tauarlyq nesie berıle bastady. Alǧaş bop būl nesienı Şu audanynyŋ tūrǧyndary aldy. Būl turaly Jamblys oblysy äkımdıgınıŋ baspasöz qyzmetı jazdy,dep habarlaidy «Adyrna» tılşısı.
Jaŋa baǧdarlamanyŋ maqsaty — auyldyq eldı mekenderde mal basyn köbeitu. Jambyl oblysy äkımdıgı auyl şaruaşylyǧy basqarmasy basşysynyŋ orynbasary Tölebek Qūlekeevtıŋ aituynşa, nesie şarty boiynşa auyl tūrǧyndary mal basyn odan ärı ösıru üşın tauarlyq nesie alady. Az qamtylǧan otbasylar men jūmyssyz azamattardy qoldauǧa basymdyq berıledı. Tauarlyq nesiesı 5 jyl ışınde öteluı kerek, onyŋ bırınşı jyly – demalys, odan keiın jyl saiyn – töldıŋ 50 paiyzy negızınde ötem töleuge mındetteledı. Baǧdarlamada auyl şaruaşylyǧy januarlaryn saqtandyru şarty jäne kepıl közdelgen, bıraq būl tarmaqtar mındettı emes, tek ekı taraptyŋ kelısımıne säikes jüzege asady.
Tauarlyq nesieleu baǧdarlamasy aiasyndaǧy alǧaşqy kelısım Şu audanynda jasaldy. «Atai» şarua qojalyǧynyŋ iesı Säken Ataev Abai auylynyŋ tūrǧyny Qalisūltan Tılepbergenovke 50 bas (qūny - 3 mln. teŋge), auyl azamaty Baqytjan Botaevqa 3 mln. teŋgege 50 bas qoi tūqymyn berdı.
— Jaŋa baǧdarlama tūrǧyndardyŋ äl-auqatyn jaqsartuǧa jaqsy mümkındık beredı dep esepteimın. Auyldastarymdy qoldap, elımızdıŋ damuyna üles qosuǧa äzırmın. Aldaǧy uaqytta asyl tūqymdy maldy da beru oiymda bar, — dedı Säken Ataev.
Qalisūltan Tılepbergenov tauarlyq nesieleu tetıgın tiımdı paidalanyp, auyldyq aǧaiynǧa qoldau körsetpek. Jaŋa baǧdarlama aiasynda öŋırdıŋ barlyq audandarynda tüsındıru jūmystary jürgızılıp jatyr. Moiynqūm audanynda «Ürker» şarua qojalyǧy 20 bas ırı qara men 100 bas uaq mal beruge daiyn. Qazır belsendı auyl tūrǧyndarynyŋ tızımı jinaqtalyp jatyr. Tauarlyq nesielendıru baǧdarlamasy aiasynda jyl soŋyna deiın 80-ge juyq kelısımge qol qoiu josparlanyp otyr.
Eske salaiyq, būǧan deiın prezident Qasym-Jomart Toqaev öz Joldauynda auyl şaruaşylyǧy salasyna jaŋa qūral – «tauarlyq nesienı» engızu mäselesın qarastyrudy tapsyrǧan bolatyn.
