Aqmola oblysynyŋ qylmystyq ıster jönındegı mamandandyrylǧan audanaralyq soty Atbasar qalasyndaǧy tüzeu koloniiasynyŋ 12 qyzmetkerıne qatysty aqtau ükımın şyǧardy, dep habarlaidy "Adyrna" ūlttyq portaly QazTAG agenttıgıne sılteme jasap.
Olarǧa belsendı Timur Dänebaev pen taǧy 43 sottaluşyny azaptady degen aiyp taǧylǧan bolatyn.
Sot otyrysy alqabilerdıŋ qatysuymen öttı. Būǧan deiın memlekettık aiyptauşy bır aiyptaluşyǧa - jetı jyl, qalǧandaryna alty jyl bas bostandyǧynan aiyru jazasyn sūrap, arnaiy ataqtarynan aiyrudy jäne üş jyl memlekettık qyzmette jūmys ısteuge tyiym saludy ūsynǧan edı.
Būl ıs boiynşa sot 2024 jylǧy 31 şıldede bastaldy.
2023 jylǧy 8 qyrküiekte Atbasar koloniiasynda azaptau äreketterın körsetetın video taraǧannan keiın, Qylmystyq-atqaru jüiesı komitetınıŋ töraǧasy Janat Eşmaǧambetov koloniianyŋ toǧyz qyzmetkerı jūmystan bosatylǧanyn, taǧy ekeuı medisinalyq demalystan keiın jūmystan şyǧatynyn mälımdedı. Sonymen qatar, koloniia basşysy men onyŋ orynbasary, sondai-aq oblystyq qylmystyq-atqaru jüiesı departamentı basşysynyŋ orynbasary qyzmetınen bosatyldy.
2023 jylǧy 30 qyrküiekte Timur Dänebaev Astanadaǧy tergeu izoliatoryna auystyryldy. 2024 jylǧy qaŋtarda ol izoliatorda qysym körıp jatqanyn, medisinalyq kömek körsetılmei, basqa mekemege auystyrumen qorqytylǧanyn habarlady.
2023 jylǧy 13 qaraşada sotta Dänebaev özıne qysym körsetılgenı turaly aityp berdı. Onyŋ aituynşa, ony därethananyŋ edenın juuǧa mäjbürlegen, al bas tartqan soŋ aiausyz soqqyǧa jyqqan. Būl oqiǧa tüsırılgen video 2023 jylǧy 3 qyrküiekte äleumettık jelılerde taraldy.
«Är soqqy ötken saiyn auru küşeie tüstı. Jai ǧana ünsız qalu mümkın emes edı. Men tıptı aiqailaǧan joqpyn, şyŋǧyrdym. Menı eş sebepsız ūrdy, men mūndai qatygezdıkke laiyq bolmadym», – dedı sol kezde Danebaev.
Aiyptaluşylardyŋ üşeuı qamauda otyrsa, qalǧandary kepılmen bostandyqta boldy. Būǧan deiın Dänebaev qosymşa adamdardy jauapqa tartu turaly jäne aiyptaluşylardy kepılden qamauǧa auystyru turaly ötınış bergen. Alaida sot ony qanaǧattandyrmady.
Timur Dänebaev 2022 jylǧy qaŋtar oqiǧalary kezınde Qazaqstan prezidentı Qasym-Jomart Toqaevtyŋ «20 myŋ terrorist» turaly mälımdemesıne qatysty jauapqa tartudy talap etken edı. 2023 jylǧy mausymda Astana qalasynyŋ №2 Almaty audandyq soty ony ūltaralyq arazdyqty qozdyrdy degen aiyppen üş jylǧa bas bostandyǧynan aiyrdy. Bır jyl ötken soŋ, Joǧarǧy sot onyŋ ükımın qaita qaraudan bas tartyp, oǧan negız tappaǧanyn mälımdedı.
Qazaqstandyq qūqyq qorǧauşylar men Europarlamenttıŋ Ortalyq Aziiadaǧy adam qūqyqtary jönındegı qararynda Danebaev saiasi tūtqyndardyŋ bırı retınde atalyp, ony bosatuǧa şaqyrylǧan.
Basqa materialdar
Adyrna.kz ūlttyq portalynyŋ maŋyzdy aqparattaryna jazylu
Soŋǧy jaŋalyqtar turaly habardar bolyŋyz