Kaspıı teńiziniń Aqtaýdaǵy 1-shaǵynaýdan tusyndaǵy jaǵalaýy qyzyl túske boıalyp, jergilikti turǵyndardyń alańdaýshylyǵyn týǵyzdy. Alaıda ekologtar bul tabıǵı qubylys ekenin aıtyp, eshqandaı ekologııalyq qaýip joq ekenin málimdedi, dep habarlaıdy “Adyrna” ulttyq portaly Massaget.kz-ke siltep.
Áleýmettik jelilerde qyzyl túske boıalǵan jaǵalaýdyń sýretteri taralyp, keıbir turǵyndar hımııalyq tógindilerden kúdiktengen. Alaıda «Eko Mańǵystaý» ÚEU basshysy Kırıll Osın bul qysta jıi kezdesetin tabıǵı qubylys ekenin túsindirdi.
“Ásirese qar jaýǵan kezde qońyr baldyrlar qyzyl reńkke ıe bolyp, erekshe kórinis beredi. Bul ekologııa men adamdarǵa eshqandaı qaýip tóndirmeıdi,” – dedi ol.
Mańǵystaý oblysynyń Ekologııa departamenti de jaǵdaıǵa qatysty resmı túsinikteme berip, teńizden alynǵan synamalarda hımııalyq zattar anyqtalmaǵanyn málimdedi.
“Dostar” jaǵajaıy, “Nur-Plaza” jáne ıahta klýby aýmaǵynan synamalar alyndy. Taldaý nátıjeleri teńizdegi ózgeristerdiń baldyrlardyń tabıǵı gúldenýinen bolǵanyn kórsetti. Bul qubylys eshqandaı zııan keltirmeıdi, sondyqtan alańdaýǵa negiz joq,” – dedi ekologııalyq zertteý zerthanasynyń gıdrobıologııa bóliminiń mamany Nurbolat Ótemisov.
Mamandardyń aıtýynsha, qys mezgilinde teńiz baldyrlary belsendi túrde kóbeıip, sý betinde qyzyl tústi daqtar paıda bolýy múmkin. Ekologtar turǵyndardy sabyrǵa shaqyryp, bul qubylysty qalypty jaǵdaı dep qabyldaýǵa keńes berdi.
