Zelenskiidıŋ aituynşa, Resei soǧystyŋ basynda Ukrainadan armiia sanyn qysqartudy, keibır territoriialardan bas tartudy talap etken. Alaida Kiev būl talaptardy qabyldamaǧan.
Zelenskii AQŞ pen Resei arasyndaǧy kezdesu turaly aldyn ala habardar bolmaǧanyn jäne būl jaǧdai Ukraina üşın kütpegen jaŋalyq bolǧanyn mälımdedı. Osy sebeptı ol Saud Arabiiasyna josparlanǧan saparyn keiınge şegerıp, 10 nauryzda resmi saparmen baratynyn habarlady.
Zelenskii Reseimen eşqandai kelısım jasalmaǧanyn taǧy da eske saldy.
"Bız Kiev oblysy okkupasiialanǧan kezde de, Belarustegı kelıssözderde de, Türkiiadaǧy kezdesulerde de eşqandai kelısımge kelgen joqpyz. Men, Ukraina prezidentı retınde, eşkımge eşteŋe kepıldık bergen joqpyn, eşteŋenı rastamadym. Al Reseidıŋ ultimatumdaryn qabyldau oiymda da joq, ärı qabyldamaimyn", – dep tüiındedı ol.
AQŞ Memlekettık departamentı Er-Riiadtaǧy kezdesudı Ukrainaǧa qatysty beibıt kelıssözderdıŋ bastaluy retınde emes, AQŞ pen Resei prezidentterı arasyndaǧy telefon arqyly jürgızılgen kelıssözderdıŋ jalǧasy retınde qarastyru qajet ekenın mälımdedı.
Kelıssözder barysynda Resei men AQŞ delegasiialary ekı el basşylarynyŋ kezdesu mümkındıgın jäne Reseidıŋ Ukrainadaǧy soǧysyn aiaqtau boiynşa arnaiy ökılder taǧaiyndau mäselesın talqylady.
