Qatonqaraǧai audanynda tūrǧyndardyŋ ūsynysymen jūmys künı taŋǧy 08:00-de bastalyp, 17:30-da aiaqtalatyn bolyp özgerdı, dep habarlaidy "Adyrna" ūlttyq portaly Ūlysmediaǧa sıltep.
2025 jyldyŋ 5 qaŋtarynan bastap Qatonqaraǧai audanynda memlekettık jäne äleumettık mekemelerdıŋ jūmys uaqyty pilottyq rejimde özgerdı. Endı mekemeler taŋǧy 08:00-de jūmysqa kırısıp, keşkı 17:30-da aiaqtaidy. Tüskı üzılıs uaqyty 12:00-den 13:30-ǧa deiın. Jaŋa kestege audannyŋ 40 mekemesı köştı.
Audandyq ışkı saiasat bölımı būl özgerıs eŋbek önımdılıgın arttyryp, öŋırdıŋ damuyna oŋ äser etetının atap öttı.
Ötken jyldyŋ jeltoqsan aiynda oblystyq basqarmalar basşylary audandaǧy 18 eldı mekennıŋ tūrǧyndarymen kezdesuler ötkızgen. Örel, Arşaty, Berel, Jambyl jäne basqa da auyldardyŋ tūrǧyndary ūsynysty talqylap, köpşılıgı jūmys künın erte bastau ideiasyn qoldaǧan.
Audandyq ışkı saiasat bölımı jūmys uaqytynyŋ özgeruı jergılıktı klimattyq jaǧdailardy, tūrǧyndardyŋ ömır süru yrǧaǧy men öŋırdıŋ ekonomikalyq belsendılıgın eskeretının mälımdedı.
2023 jyldyŋ jeltoqsanynda Qazaqstandaǧy uaqyt esebın özgertu turaly zaŋ jobasy qoǧamdyq talqylauǧa şyǧarylǧan bolatyn. Būl bastama qoǧamda ülken pıkırtalas tuǧyzdy – "Aşyq NQA" portalynda 130-dan astam betten tūratyn pıkırler jazylyp, olardyŋ basym bölıgı qarsylyq bıldırgen.
2024 jyldyŋ 2 tamyzynda Sauda jäne integrasiia ministrı Arman Şäkkaliev uaqyt beldeuın būrynǧy qalpyna keltıru mümkın emes ekenın aitty. Al 2 qyrküiekte Şyǧys Qazaqstan oblysynyŋ äkımı Ermek Köşerbaev aimaqtaǧy uaqyt beldeuın qaita qarau mäselesın Sauda ministrlıgı qarap jatqanyn mälımdedı. Būl tūrǧyndardyŋ özgerıske bailanysty köptep şaǧymdanuymen bailanysty bolǧan.
Ūqsas jaŋalyqtar
