Mäjılıs deputaty Ermūrat Bapi Qazaqstannyŋ Kaspii qūbyr konsorsiumyna (KQK) jasalǧan şabuyl üşın Ukrainadan ötemaqy talap etuıne moraldyq ta, zaŋdyq ta qūqyǧy joq ekenın mälımdedı, dep habarlaidy "Adyrna" ūlttyq portaly.
«Qazaqstan ötemaqy talap etuı kerek degenmen men tübegeilı kelıspeimın. Bızde ondai talap qoiuǧa moraldyq ta, zaŋdyq ta negız joq. Ukraina üş jyldan astam uaqyttan berı basqynşy tarappen öz täuelsızdıgı men halqyn qorǧau üşın qasiettı küres jürgızıp keledı. Osy soǧys aiasynda Ukraina öz elın, jerın qorǧau üşın qajettı taktika men strategiiany taŋdauǧa tolyq qūqyly», – dedı deputat.
Onyŋ aituynşa, KQK – Resei aumaǧynda ornalasqan infraqūrylymdyq nysan, sondyqtan ol basqynşy eldıŋ äskeri infraqūrylymynyŋ bır bölıgıne ainalǧan.
«Oǧan jasalǧan soqqy – Qazaqstanǧa qarsy baǧyttalǧan şabuyl emes, soǧys jaǧdaiyndaǧy qajettılık. Ukraina üşınşı elderge ziian tigızudı közdep otyrǧan joq, tek öz memlekettıgın qorǧauda», – dedı Bapi.
Deputat Qazaqstannyŋ KQK şabuylynan 300 milliard teŋge şyǧynǧa ūşyraǧany turaly mälımetke kümän keltırıp, būl soma negızsız boluy mümkın ekenın aitty. Onyŋ pıkırınşe, naqty şyǧyn qūbyr ūzaq uaqyt boiy jūmys ıstemegen jaǧdaida ǧana tuyndauy mümkın, al būǧan Ukraina emes, Qazaqstannyŋ mūnai-gaz eksportynyŋ balama baǧyttaryn aldyn ala qamtamasyz etpegen jauapty tūlǧalar kınälı.
«Reseige täueldılıktı arttyru – "Eskı Qazaqstan" ökılderınıŋ strategiialyq qatelıgı. Resei – tek KSRO-ny ǧana emes, 1939 jylǧy Ribbentrop-Molotov paktısı negızınde imperiiany qalpyna keltırudı közdeitın agressivtı syrtqy saiasaty bar el ekenın aldyn ala tüsınu kerek edı», – dep tolyqtyrdy deputat.
Aita keteiık, 17 aqpanda Kaspii qūbyr konsorsiumynyŋ (KQK) «Kropotkinskaia» mūnai aidau stansiiasy jetı dronnyŋ şabuylyna ūşyraǧan bolatyn. Būl qūbyr arqyly Qazaqstan mūnaiy da eksporttalady.
