Reseidıŋ Qazaqstandaǧy Tötenşe jäne ökılettı elşısı Aleksei Borodavkin Maslenisa meiramyn toilauǧa jinalǧan astanalyqtarǧa äldebır «jeŋıs» turaly aitqan, dep habarlaidy «Adyrna» tılşısı.
«1945 jylǧy jeŋıs sekıldı, bärımız jeŋıstı taǧatsyzdana kütıp jürmız. Bälkım, ol jaǧdai jaqyn arada oryndalady»,—dedı elşı.
Beinejazbany äleumettık jelıge jurnalist Raul Uporov jariialady. Aituynşa, slaviandardyŋ dästürlı meiramy elordadaǧy Uspensk sborynyŋ aumaǧynda ötkızılgen.
Aleksei Borodavkinnıŋ būl mälımdemesı qaznet qoldanuşylarynyŋ narazylyǧyn tudyrdy.
«Is-şara barysyn baqylaityn polisiia qaida?», «Elşını üiıne qaitaru kerek!», «Äkımşılık jauapqa tartyluy kerek»,—dep jazdy olar.
Qoldanuşylardyŋ bır toby ony Syrtqy ıster ministrlıgıne şaqyrtudy ūsynǧan. Äzırge ministrlık eşqandai reaksiia bıldırgen joq. Ädette mūndaida syrtqy saiasat mekemesı elşını şaqyrtyp, narazylyq notasyn tabys etetın.Aita keteiık, Aleksei Borodavkin Reseidıŋ Qazaqstandaǧy Tötenşe jäne ökılettı elşısı qyzmetıne 2018 jyly taǧaiyndalǧan bolatyn. Ol - Qazaqstanda eŋ ūzaq otyrǧan elşılerdıŋ bırı.
2022 jyly elşınıŋ Qazaqstandaǧy orys tılıne qatysty pıkırı de köpşılıktıŋ narazylyǧyn tudyrǧan edı.
«Ärbır qazaqstandyq ekı aiaǧyn nyq basuy üşın ekı tıldı meŋgeruı kerek: memlekettık tıl – qazaq tılı jäne resmi tıl – orys tılı. Būl Qazaqstan Konstitusiiasynda aitylǧan», - degen edı ol sol kezde «Rossiia segodnia» agenttıgıne bergen sūqbatynda.
https://youtu.be/8Y1lGoAbEsk?si=vD3w4JGfqJbacLTJ
