Bügın Mäjılıstegı «AMANAT» Fraksiiasynyŋ müşelerı özgergen uaqyt beldeuınıŋ halyqtyŋ fizikalyq jäne psihikalyq densaulyǧyna, eŋbek önımdılıgıne jäne energetikalyq resurstardy tūtynuǧa äserı turaly zertteu nätijelerı boiynşa Ükımet esebın tyŋdady.
Būl zertteu jūmysy «AMANAT» Fraksiiasynyŋ ūsynymyn ıske asyru şeŋberınde 6 baǧyt boiynşa jürgızıldı. Bedeldı ǧalymdar men sarapşylar, ǧylymi instituttar tartyldy. Zertteu barysynda geografiialyq parametrlerı ūqsas är türlı memlekettıŋ täjıribesı nazarǧa alyndy.
Deputattar aldynda Premer-Ministrdıŋ orynbasary Ermek Köşerbaev söz söiledı.
– Salystyrmaly taldau jūmysy Europadaǧy köptegen damyǧan elderde Qazaqstanǧa ūqsas taŋ atu jäne kün batu merzımı bar ekenın körsettı. Atalǧan memleketter osyndai jaǧdaida belsendı damyp keledı. Adami kapitaldy damytu boiynşa da joǧary körsetkışterge ie. Osyǧan bailanysty Ükımet bıryŋǧai uaqyt beldeuın engızu turaly şeşımdı qoldai otyryp, ony tolyq negızdelgen dep sanaidy, – dedı vise-premer.
Sondai-aq ol zertteu nätijelerı bıryŋǧai uaqyt beldeuıne köşu eldegı bılım beru prosesınıŋ nätijelerıne terıs äser etpegenın, sondai-aq JKO men köşedegı qylmys jaǧdaiyna aitarlyqtai äserın tigızbegenın rastady.
Sonymen qatar bügınde Şyǧys Qazaqstan oblysynyŋ jetı audanynda jūmys kestesıne tüzetu engızıldı. Būl bastama jergılıktı tūrǧyndar tarapynan keŋ qoldau tapty.
Halyq qalaulylarynyŋ sūraqtaryna Sauda jäne integrasiia ministrı Arman Şaqqaliev, Ǧylym jäne joǧary bılım ministrı Saiasat Nūrbek jäne Ükımettıŋ özge de ökılderı jauap berdı.
A. Şaqqalievtıŋ aituynşa, aldyn ala derekter halyq ömırınıŋ negızgı körsetkışıne jäne ekonomikanyŋ negızgı salalarynyŋ jūmys ısteuıne özgergen uaqyt beldeuınıŋ tigızgen terıs äserın anyqtaǧan joq.
Densaulyq saqtau bırınşı vise-ministrı Timur Sūltanǧaziev bıryŋǧai uaqyt beldeuın engızu qadamy densaulyq saqtau salasyna oŋ özgerıs alyp kelgenın, aurular sanynyŋ tömendegenın atap öttı. Mäselen, jedel järdem şaqyrtu sany 0,4%-ǧa, jürek-qan tamyrlary aurularymen syrqattanu körsetkışı 3,5%-ǧa, psihikalyq jäne mınez-qūlyq būzylysy 1,6%-ǧa, jaraqattanu körsetkışı 3,3%-ǧa, qaterlı ısıkter körsetkışı 1,7%-ǧa tömendegenı baiqaldy. Iаǧni, uaqytty ūtymdy bölu – qoǧamdyq densaulyqqa oŋ äserın tigızude.
– Memleket basşysy «Ana tılı» gazetıne bergen sūhbatynda Ükımet uaqyt beldeuın auystyrudyŋ azamattardyŋ tūrmysyna jäne el ekonomikasyna äserın jan-jaqty zertteuı tiıs ekenın atap öttı. Bügın Ükımet «AMANAT» fraksiiasynyŋ deputattaryna osy ǧylymi zertteudıŋ qorytyndysyn tanystyrdy. Ol ǧalymdardyŋ, sarapşylardyŋ qatysuymen ötkızılıp, Qazaqstanda bıryŋǧai uaqytty engızu turaly şeşımnıŋ ǧylymi negızdılıgın körsettı, – dedı Mäjılıs Spikerı Erlan Qoşanov.
Talqylau jūmysyn qorytyndylai kele, deputattar Ükımettıŋ ǧylymi-zertteu nätijesın qabyldady. Deputattar zertteu qorytyndysyn qalyŋ būqaraǧa jetkızudıŋ maŋyzyn atap öttı.
Sonymen qatar, deputattar Ükımetke jergılıktı bilık organdarymen, mäslihattarmen bırlesıp, elımızdıŋ bıryŋǧai uaqyt beldeuıne köşuınıŋ maŋyzy men ǧylymi negızı turaly arnaiy tüsındıru jūmysyn jürgızudı ūsyndy. Būl jūmysqa ǧalymdardy, sarapşylar tobynyŋ ökılderın, qoǧamdyq pıkır köşbasşylaryn belsendı tartu kerek. BAQ pen äleumettık jelılerde tiıstı aqparattyq jūmys ūiymdastyru qajet.
Sonymen qatar, halyq sūranysy men şeteldık täjıribenı eskere otyryp, jergılıktı jerlerde jūmys kestesın özgertu täjıribesın jalǧastyru kerek.
Ūqsas jaŋalyqtar
