AQŞ-tyŋ prezidentı Donald Tramp äkımşılıgı şeteldık auditoriiaǧa habar taratatyn amerikalyq būqaralyq aqparat qūraldarynyŋ jüzdegen qyzmetkerın aqysyz demalysqa jıberdı. Būl eŋ aldymen "Amerika dauysy" men "Azattyq radiosy" sekıldı mediaresurstardyŋ qyzmetkerlerıne äser ettı, dep habarlaidy "Adyrna" ūlttyq portaly DW-ge sılteme jasap.
"Amerika dauysy", "Azat Aziia radiosy" (RFA) jäne "Azat Europa/Azattyq radiosynyŋ" (RFE/RL) jurnalisterı men basqa da qyzmetkerlerıne elektrondyq poşta arqyly tiıstı habarlamalar jıberılgen. Onda olardyŋ jūmys keŋselerıne kıruge rūqsaty bolmaityny, sondai-aq jurnalistık kuälıkterı men jūmys jabdyqtaryn tapsyruy kerektıgı aitylǧan.
Būl jaǧdai Tramptyŋ AQŞ ükımetındegı jetı täuelsız federaldyq agenttıktıŋ jūmysyn aitarlyqtai qysqartu turaly jarlyǧyna bailanysty oryn aldy. AQŞ prezidentı äsırese AQŞ-tyŋ Ǧalamdyq media agenttıgınıŋ qyzmetkerler sanyn barynşa azaitudy būiyrdy. Būl agenttık joǧaryda atalǧan mediakompaniialardy qarjylandyryp kelgen.
"Azat Europa/Azattyq radiosynyŋ" basşysy Stiven Kapustyŋ aituynşa, qarjylandyru toqtatylǧannan keiın būl mediaresurstyŋ 75 jyldyq qyzmetı toqtauy mümkın.
"Azattyq radiosy men Azat Europaǧa qarjylandyrudyŋ toqtatyluy – Amerikanyŋ qarsylastaryna jasalǧan ülken syilyq. İran aiatollalary, Qytai kommunistık basşylary, Mäskeu men Minskıdegı avtokrattar quanatyn äreket. Bızsız älemnıŋ jabyq qoǧamdarynda ömır süretın 50 millionǧa juyq adam senımdı aqparat közınen aiyrylady", – dedı Kapus.
RFE/RL derekterıne säikes, 2017 jyly radioda 400-den astam ştattyq jurnalist, 700-den astam frilanser jūmys ıstegen. 2023 jyly mediakompaniia Vilnius pen Rigada jaŋa keŋseler aşyp, belorus jäne orys tılderınde habar tarata bastaǧan.
Atalǧan mediakompaniialar AQŞ Kongresı arqyly qarjylandyrylǧanymen, olardyŋ redaksiialyq saiasaty täuelsız bolyp qala bergen. Alaida Tramp prezidenttıgı kezınde būl BAQ-tarǧa qysym küşeiıp, olardy özınıŋ saiasatyn qoldauǧa mäjbürleuge tyrysty. Bırqatar aqparat agenttıkterıne Aq üige kıruge tyiym salu da sol şaralardyŋ bırı bolǧan.
