Bügın Ūlttyq akademiialyq kıtaphananyŋ Fariza Oŋǧarsynova zalynda «Ūlttyq sport türlerı men mädenietı akademiiasy» qūrylǧany habarlandy. Ony «Nauryzym – nūrly yrysym» merekelık ıs-şarasy aiasynda ötken jiynda belgılı küş mädenietın zertteuşı, joba qūryltaişysy Abylaihan Qalnazarov mälım ettı.
«Ūlttyq sport türlerı men mädenietı akademiiasy – qazaq halqynyŋ barlyq dästürlı sportyn saqtau, damytu jäne halyqaralyq deŋgeide tanymal etuge baǧyttalǧan innovasiialyq ortalyq. Būl akademiia ūlttyq sport türlerınıŋ fizikalyq, ruhani-mädeni jäne ziiatkerlık qūndylyqtaryn zerttep zerdelep, bolaşaq ūrpaqqa jetkızudı jäne sport arqyly eldık ruhty küşeitudı közdeidı», – dep atap öttı A.Qalnazarov.
Onyŋ baiandauynşa, akademiia missiiasy – qazaq halqynyŋ dästürlı sport türlerın jaŋǧyrtu jäne olardy eldık-älemdık masştabtarda ılgerıletu arqyly ūlttyq mūranyŋ sporttyq-mädeni damuyna üles qosu.
Maqsat-mındetterı:
- Ūlttyq sport türlerın käsıbi deŋgeide damytyp, jattyqtyruşylar men sportşylardy daiyndau.
- Ūlttyq sport türlerınıŋ bıregei tehnikasy men ädısterın ǧylymi negızde zertteu.
- Jastar arasynda salauatty ömır saltyn nasihattau jäne ūlttyq qūndylyqtardy därıpteu.
- Dästürlı sport türlerın halyqaralyq deŋgeide tanymal etu.
- Ūlttyq sport pen mädeniettı bırıktırıp, integrasiialyq ıs-şaralar ūiymdastyru.
Jūmystyq mındetterı:
- Zertteuşılık.
- Ūiymdastyruşylyq.
- İdeologiialyq.
- Nasihat.
- Oqytu.
- Baulu.
Al akademiia qyzmetınıŋ baǧyttary negızgı ūlttyq sport türlerı boiynşa keşendı baǧdarlamalar äzırlep, olardyŋ ärqaisysyn derbes damytudan körınbek. Mysaly, qazaq küresı boiynşa käsıbi baluandardy daiyndau, oblystyq, respublikalyq jäne halyqaralyq turnirler ötkızu, qazaq küresınıŋ erejelerın halyqaralyq standarttarǧa beiımdeu bolmaqşy. Osy qatarda kökpar, bäige, jamby atu, audaryspaq, teŋge ılu, sadaq atu, qūsbegılık, toǧyzqūmalaq, asyq atu syndy sport türlerı bar.
Abylaihan Mamyraihanūlynyŋ aituynşa, bılım beru jäne ǧylymi-zertteu baǧyty basty basymdyq. Bılım berude ūlttyq sport türlerı boiynşa balalar, jastar jäne käsıbi sportşylarǧa arnalǧan oqu baǧdarlamalaryn äzırleu, jattyqtyruşylar men ädıskerlerdı oqytu közdeledı. Ǧylymi zertteude ūlttyq sport türlerınıŋ tehnikalyq jäne tarihi erekşelıkterın, fizikalyq jäne psihologiialyq artyqşylyqtaryn zertteu, qazaq halqynyŋ sporttyq tarihyna arnalǧan ǧylymi eŋbekter jariialauǧa basa män berılmek.
Sondai-aq ol qazırdıŋ özınde öz avtorlyǧynda būǧan deiın jaryq körgen «Baluan tas» qostomdyǧynyŋ üşınşı tomy, osy tomdardan örbıgen ideologiialyq «Baluandar älemı» kıtaby, kökpar turaly tört tomdyq jäne «Qazaq küresınıŋ» balalarǧa arnalǧan oqulyǧy men paluandyq pen batyrlyqty nasihattaityn oquşylarǧa arnalǧan 3 kıtaptyŋ äzır tūrǧanyn baiandady.
«Äzırşe akademiia «Silteme.kz portaly janynan qūrylyp otyr. Aldaǧy uaqytta bır top mamandardyŋ basyn qosyp, fond türınde äreket etpekpız. Mūndaǧy fişka sol, mädeniet jäne turizm ıs-şaralary da nazarda bolady. Ūlttyq sport pen mädeniettıŋ sintezın körsetetın etnofestivalder ūiymdastyru, Nauryz jäne basqa ūlttyq merekelerde arnaiy sporttyq ıs-şaralar ötkızu josparda bar. Qazaqtyŋ dästürlı ömır saltyn körsetetın etnoauyl qūru, turisterge arnalǧan interaktivtı baǧdarlamalar ūiymdastyrudy da közdeudemız. Ǧylymi-zertteu ortalyqtary, sport keşenderı mäselelerıne de den qoiamyz. Būl jaǧynan bırqatar ūlttyq sport federasiialarymen aldyn ala yntymaqtastyq jönınde äŋgımeler jürgızıldı», – dep tüiındedı sözın A.Qalnazarov.
Aita keteiık, atalmyş ıs-şaraǧa bırqatar tanymal tūlǧalar jäne studentter men mektep oquşylary qatysty. Būl Ūlttyq akademiialyq kıtaphananyŋ nauryz merekesıne orai belgılengen «Şaŋyraq» künınıŋ de mereiın asyruǧa baǧyttalǧan otyrystardyŋ bırı bolatyn.
Jiyn soŋynda keluşılerge nauryz köje berılıp, bauyrsaqtar taratyldy jäne köpşılık bolyp estelıkke fotoǧa tüstı.
