QR SIM aqparaty boiynşa, Türkiiada jürgen qazaqstandyqtar äzırge konsuldyq kömekke jügıngen joq, dep habarlaidy "Adyrna" ūlttyq portaly.
Qazaqstan Respublikasy Syrtqy ıster ministrınıŋ bırınşı orynbasary Aqan Rahmetullin Mäjılıste ötken brifingte qazaqstandyqtarǧa Türkiiaǧa saparlardy keiınge qaldyruǧa keŋes berdı.
Rahmetullinnıŋ aituynşa, QR SIM jäne Qazaqstannyŋ Türkiiadaǧy ırı qalalardaǧy bas konsuldyqtary azamattarmen belsendı jūmys ıstep, olardyŋ jappai jinalatyn jerler men narazylyq aksiialaryna barmauyn qamtamasyz etuge tyrysuda.
"Ärine, saqtyq şaralary qajet. Bıraq däl qazır mülde baruǧa bolmaidy dep aita almaimyn. Eger, ministrlık atynan emes, özım turaly aitsam, men küter edım", – dedı şeneunık.
Jurnalisterdıŋ qazırgı uaqytta Ystambūlǧa baru mümkındıgı turaly sūraǧyna Rahmetullin "qajetsız" dep jauap berdı.
Ministrlık mälımetınşe, Türkiiada jürgen qazaqstandyqtar äzırge konsuldyq kömek sūramaǧan.
Eske sala keteiık, 19 nauryz künı Ystambūl merı Ekrem İmamoǧluna sybailas jemqorlyq aiyby taǧylyp, ol qyzmetınen şettetıldı. Osydan keiın jappai narazylyq şerulerı bastaldy. Bes kün ışınde 1133 adam ūstalyp, 123 polisiia qyzmetkerı jaraqat aldy.
