Şymkentte äigılı altyn satumen ainalysqan "Nazira Gold" kompaniiasynyŋ basşysy Nazira Bibosynqyzyn qamauǧa alǧannan keiın jaqtastary ädıldık sūrap, Prezident pen Bas prokuraturaǧa ündeu jasady. Üşınşı megapoliske jinalǧan bır top qauymnyŋ mäselesın «Adyrna» tılşısı tyŋdap qaitty.
Qarjy monitoringı agenttıgınıŋ Şymkent qalasy boiynşa departamentı "Nazira Gold" kompaniiasynyŋ basşysy Nazira Bibosynqyzyn «qarjy piramidasy retınde jūmys ıstegen» dep aiyptap, 21 aqpan künı qamauǧa alǧan bolatyn.
Atalmyş kompaniia özın zergerlık būiymdar satumen ainalysatyn zaŋdy ūiym retınde körsetken. Instagram jelısınde on myŋnan astam oqyrmany bar Nazira Bibosynqyzy salymşylarǧa ai saiyn 20-40% tabys berıp otyrǧan körınedı. Alaida BAQ-ta taraǧan aqparat boiynşa Naziranyŋ şotyna aqşa salǧan jaŋa qatysuşylar paida körmegen, öz qarajatyn qaitara almaǧan. Al olardyŋ qarjysyn būrynǧylarǧa töleu üşın paidalanǧan degen küdık te tarady.
21 aqpan künı onyŋ üiın tıntu barysynda 374 million teŋge qolma-qol aqşa men jalpy qūny 300 million teŋgeden asatyn 12 kilogramm altyn būiymdar tärkılengen.
«BIZGE SYILYQTAR BERETIN»
13 säuır künı jiynǧa kelgen Naziranyŋ jaqtastary būl (red. aqşa men altyn) olarǧa tiesılı ekenın aityp otyr.
«Bügın Nazirany qoldap keldık. Salǧan aqşamyzdy talap etıp otyrmyz. Naziranyŋ bostandyqqa şyǧuyn talap etemız! Men özım būl jaqqa 4 mln salǧanmyn. Joldasym men tuystarym bılmeidı. Bız Naziradan eşqandai jamanşylyq körgen emespız. Men oǧan aqşany jeltoqsan aiynan bastap saldym. Eşqandai qarajatymyzdy jemegen, artyǧymen, syilyqtarymen qosa beretın. Är salǧanda 200 myŋdai, salǧan aqşamyzdyŋ paiyzyn alyp otyrdyq. Men onyŋ adal jūmys ıstegenıne senımdımın.Ol öte aqköŋıl bolǧan. Menıŋ oiymşa, Nazirany bıreu qoldan ūstap berdı. Bızdıŋ qyzdyŋ bır gramm kınäsı joq. Ol öz jūmysyn jalǧastyruy tiıs», - deidı Ūlbala Adyrbekova.
«Nazira türmege emes, qūrmetke laiyq!», «Naziraǧa bostandyq!», «Nazirany emes, ädıletsızdıktı qamaiyq!» dep ūrandatqan bır top salymşy Şymkenttegı «Jetı jol» atty toihanaǧa jinaldy. «Nazira halyqtyŋ qyzy!» dep futbolka kiıp, narazylyq qaǧazdaryn ūstap, «Bostandyq» dep qol şapalaqtady.
«Men özım Şäuıldırdıŋ tūrǧynymyn. Medisina qyzmetkerımın. Basynda 500 myŋ teŋge salǧanmyn. Keiın üstınen qostym, Qazır 3.5 mln teŋge salyp jıberdım. Bızde kelısımşart, qol qoiu bolmady. Instagram jelısınen bır jyl boiy körıp, aqşa saldym, altyn taǧaiyn dep oiladym. Bızge syilyqtar berıp otyrdy. Bonus retınde köpşılıkke altyn taqty. Densaulyǧy naşar adamdarǧa aqşa berıp, kömek berıp otyratyn. Jaǧdaiy tömen otbasyǧa da kömektestı. Bızge de «qaiyrymdylyq jasa» dep aqyl aityp otyrdy. Menıŋ de küieuım bılmeidı. Sebebı ol bılse, otbasyda artyq äŋgıme köbeiıp ketuşı edı. Siyr ūrlaǧan qūtylyp, tauyq ūrlaǧan ūstaldy bolyp tūr ǧoi. Organnyŋ tapqan aqşasy negızı ol halyqtyŋ qarajaty. Ol bızdı ūiymdastyryp, halqyn asyrap otyr. Ol özı paida körıp otyrǧan joq. Bızdı asyrap otyrǧan adam edı», - dedı bügıngı jiynǧa kelgen salymşy Aisūlu Myrzanova.
«6 MLN TEŊGE KREDİT ALDYM»
Nazira Bibosynqyzy aqşa salǧan salymşylarǧa da erkın taŋdau bergen körınedı. «Altyn alamyn» degenderge Reseiden, Türkiiadan, İtaliiadan äşekei-būiym jetkızse, «altynymdy satyp ber» degen öz tūtynuşylaryn da eskerusız qaldyrmaǧan. Üşınşı megapolistegı bes sauda ortalyǧynda «aqşa salǧandardyŋ» altynyn satyp, tüsken paidasymen bırge salymşylaryna kerı salǧan körınedı.
«Altyn tabyldy dep jatyr ǧoi. Endı altyn satatyn adamnyŋ üiınen altynnan basqa ne tabyluy kerek? Men kredit alyp, salymşy bolǧanmyn. Men qaraşa aiynda aqşa bergenmın. Men Naziraǧa «altynymdy satyp ber, paidasyn körıp otyraiyn» dep aitqanmyn. Üstındegı az paiyzdy alyp otyrsam, qalǧany öse bersın dep oiladym. Jinalǧan aqşany mamyr aiynda alyp, üi salamyn dep oilaǧanmyn. Üi kezegıne bırneşe jyl būryn tūrǧanmyn. Kezegım jyljymady. Kreditke 6 mln teŋge alǧanmyn. Ekı ai boiy tölei almai otyrmyn. Kollektorlar mazamdy aldy. Telefonyma tynym joq. Naziradan barlyq adam jaqsylyq kördı. Altyndai da, aqşalai da, syilyq ta berdı. Maǧan, özıme komplekt bergen. Bızge Nazirany şyǧaryp, aqşa men altynymyzdy bersın. Ol eşkımnıŋ emes, bızdıŋ aqşamyz. Men insta arqyly keldım Naziraǧa. Nazira halyqqa jeŋıldık jasap, altynymyzdy satyp, aqşasyn berıp otyrdy. Men alǧaş bastaǧanda maǧan ekımyŋ teŋge kem tölegen. Keiın men ony sūrauǧa ūialyp jürdım. Sebebı bes jüz myŋ, üş jüz myŋ tauyp jürdım. Keiın sony Kaspi arqyly salyp jıberıp otyrdy. Ol bızdıŋ bır tiynymyzdy da almaityn. Adamdar erıgıp aqşa salmaidy, mūqtaj boldyq. Onymen qanşama suretke de tüstık, bırge de jürdık. Ol alaiaq emes dep aita alamyn», - dedı Taraz qalasynyŋ tūrǧyny Nargiza Mūsabekova.
«BIR JYLDA 1 MLRD TEŊGE SALYQ»
Al qazırgı taŋda Nazira Bibosynqyzynyŋ qorǧauşysy Bauyrjan Kışkenebaev Astanaǧa da arnaiy baryp, Bas prokuraturaǧa kırgenın de atap öttı.
«Menıŋ özım jūmysta jürsem de, qazırdıŋ özınde piramidaǧa qatysty bırneşe ısterge qatysyp jürmın. Al ondai äreketterdıŋ Naziranyŋ ıs qūjattarynda joq. Naziranyŋ jauabynda är elden arnaiy käsıpkerler kelıp, altyndar ūsynyp otyrǧan. Olar öz qūjattaryn, lisenziiasyn körsetken. Zauyt, mekemelerıne baryp, 1 mlrd kölemınde tömengı baǧada altyn alyp otyrǧan. Nazira: «Mende aqşa az bolǧan soŋ halyqqpen, altyn satatyn adamdarmen bırıgıp otyrdym» deidı. Olarmen bırıgıp, aqşany jinap, köterme baǧada altyn alyp bergen. Kei adamdar altyndy sata almaǧandyqtan paiyz qosyp, satyp bergen. Al aqşasyn tolyq salymşylarǧa berıp otyrǧan. Qazır salymşylar nesielerın tölei almai otyr. Bız joǧaryǧa baryp, Bas prokurordyŋ kömekşılerımen söilesıp, män-jaidy aittyq. Ol jerde de bızdı jüzdegen halyq kütıp aldy. Olar maǧan aitpady. Bas prokuraturaǧa aitty», - deidı Bauyrjan Kışkenebaev.
Advokat Nazira Bibosynqyzynyŋ zaŋ boiynşa jūmys ıstegenın aitady. Onyŋ Şymkent qalasynda altyn satatyn bes ortalyǧy da jūmys ıstegen. Nätijesınde 2024 jyl boiynşa memleketke 1 mlrd 200 mln teŋge salyq tölegenı aityldy. Jiynǧa kelgen halyq Naziranyŋ kämelet jasyna tolmaǧan üş balasynyŋ suretterı men anasy daiyndaǧan beineroliktı körıp, jas aldy.
«ŞYMKENTTEGI DEPARTAMENT HALYQTY ESTIMEIDI»
Jiyn barysynda moderator bolǧan Tıleujan Kışkenebaev ta Nazira gold-tyŋ jūmysy zaŋdy ekenın atap öttı.
«Prezidenttıŋ käsıpkerlerdı qoldauy turaly ūrany qaida qaldy? Onyŋ Şymkentke qatysy joq pa? Halyq osy üşın küiıp otyr. On ekı myŋ adam Nazira qoldap, dauys berıp otyr. Bır paiyz da jaman pıkır jazylmaǧan. Prezidentke, QMA, Antikorǧa halyqtyŋ atynan qanşama hat joldandy. QMA Nazirany zaŋsyz ūstap, zaŋsyz halyqtyŋ aqşasyn alyp otyr. Sonyŋ kesırınen qanşama halyq zardap şegıp otyr. Şyǧyn Naziradan kelıp jatqan joq. Şyǧyn tek Şymkent qalasy boiynşa Ekonomikalyq tergep-tekseru departamentınen kelıp otyr! Bız zaŋy myqty memlekette ömır sürıp jatyrmyz! Prezidenttıŋ özı käsıpkerlerdı qoldap tūr. Zaŋsyzdyqqa jol bermeidı dep oilaimyz. Qanşama halyq kün sanap otyr, nesie jandy qinap otyr. Üiınen aiyrylyp qalatyndar qanşama... Joǧarydaǧylar bızdıŋ jan-aiqaiymyzdy estidı degen oidamyz. Şymkent qalasy boiynşa Ekonomikalyq tergep-tekseru departamentı, Prokuraturasy bızdı estımei otyr. Bız Almatydan kelıp osy aşynǧan halyqty sabyrǧa şaqyryp otyrmyz», - dedı advokat Tıleujan Kışkenebaev.
Jiynda aǧaiyndy Kışkenebaevtar, Naziranyŋ äpkesı Jazira Bibosynqyzy, Naziranyŋ tuysy dep tanystyrylǧan Tūrniiaz aqsaqal men Nazirany jaqtauşy salymşylar kelıp qatysqan.
«Nazira öz eŋbekqorlyǧynyŋ arqasynda er adamdardyŋ ıstemegen ısın ıstei aldy. Milliardtaǧan aqşany alyp keludıŋ özı oŋai emes. Nazira bärın qoljetımdı ettı. Ol köterılıp kele jatqan edı. Ony qoldan ūiymdastyryp, ūstady dep oilaimyn», - dedı Naziranyŋ atasy dep tanystyrylǧan Batyrhan İsaqov.
AIǦAIMEN BITKEN JİYN
«Naziraǧa bostandyq!» degen ūranmen bastalǧan jiyn soŋy aiǧai-şumen aiaqtaldy. Şymkent qalasy Abai audany äkımınıŋ orynbasary ūiymdastyruşylardyŋ jergılıktı äkımdıkten ülken jiyn ötkızuge rūqsat almaǧanyn aitty. Meiırjan Ǧaniūly Ajedin ekı polisiia qyzmetkerımen kelıp, jinalǧandardan zaldy bosatudy talap ettı.
«Barşaŋyzdyŋ jinalyp otyrǧandaryŋyz zaŋsyz. Jalpy mūndai aksiia jasau üşın äkımşılıkke arnaiy habarlama beru kerek bolǧan. Bes kün būryn jıberılgen habarlamaǧa üş kün ışınde jauap bolmasa, onda aksiiany ötkızuge rūqsat. Alaida bügıngı aksiia boiynşa eşqandai habarlama tüspegen. Bärıŋız qazır zaldan şyǧyŋyzdar. Bolmasa polisiia qyzmetkerlerı zaŋ aiasynda 15 täulıkke sızderdı qamap ne aiyppūl salady. Sızderdıŋ ökılderıŋız mūnda Qūran oqytylyp jatyr dep jauap berdı. Alaida eşqandai da Qūran Aiattary būl jerde bolmady», - dep eskertu jasap, mikrofon men kamerany öşıruge tyrysty.
Alaida advokat Kışkenebaev būl aksiianyŋ köşede ötıp jatqan miting emes ekenın tılge tiek ettı. Būl sözge «nalymaǧan» äkımdık qyzmetkerıne halyq ta qarsy şyqty. Olar «zaldy bosat» degen şeneunıkke «Naziraǧa bostandyq», «Bostandyq» dep ūrandata jöneldı.
Qazırgı uaqytta sotqa deiıngı tergeu amaldary jürgızılıp jatyr. QR Qylmystyq ıs jürgızu kodeksınıŋ 201-babyna säikes, tergeu müddesıne bailanysty özge mälımetter jariia etılmeidı.
