Ūlybritaniiada tūratyn qazaq jurnalisı, Londonda memlekettık arna ökılı bolyp qyzmet atqaratyn Ǧalymjan Qaramanūly şeteldegı ömırı, jurnalistık qyzmetı jäne qazaq tılıne degen közqarasy jaily bölıstı, dep habarlaidy "Adyrna" ūlttyq portaly Sunqarnews-ke sıltep.
Ǧalymjan Qaramanūly äzılmen «16 jerde jūmys ısteimın» degenımen, şyn mänınde ol jurnalistika, media keŋes beru jäne äleumettık jelı arqyly aqparat taratu baǧytynda eŋbek etıp keledı. Onyŋ aituynşa, London siiaqty qymbat qalada otbasyn asyrau üşın tärtıp, maqsat jäne jauapkerşılık qajet.
«Taŋerteŋgı saǧatymdy dūrys bölsem, keşke deiın bırneşe ıstı tyndyra alamyn», – deidı ol.
Sunqarnews-ke bergen sūhbatynda jurnalist şetelde tūryp jatsa da, balalarynyŋ qazaq tılın jetık meŋgeruı otbasylyq tärbie men tabandylyqtyŋ nätijesı ekenın aitty.
«Üide tek qazaq tılınde söileimız, ūlttyq dästürlerımızdı saqtaimyz. Jūbaiym ekeumız balalarymyzǧa aǧylşynşamen qatar qazaq tılınde söiletkızudı basty maqsat ettık. Üide tek ana tılımızde söilesemız, qazaqşa kıtaptar oqimyz, ūlttyq dästürlerımızdı saqtaimyz. Būl – bızdıŋ tamyrymyzdy ūmytpauymyzdyŋ belgısı. Būl jūmystyŋ artynda eŋbek, şydamdylyq, keide qataldyq ta tūrady. Öitkenı özge eldıŋ ortasynda balanyŋ tılı men mädenietı tez özgeredı. Bıraq otbasyndaǧy jyly orta men ūlttyq qūndylyqtarǧa degen qūrmet olardyŋ tüp-tamyryn saqtap tūrady. Aida, özıŋ de bılesıŋ, Angliiada qazaqşa orta joq. Barlyǧy aǧylşyn tılınde. Tıptı, orysşa da söileitınder joqtyŋ qasy. Sondyqtan üide ana tılımızge basty nazar audaramyz», – deidı jurnalist.
Sūhbat barysynda ol jūbaiyna «patşaiym» dep aitatynyn, būl sözdıŋ astarynda ülken qūrmet pen alǧys jatqanyn jetkızdı.
«Jūbaiym — menıŋ tıregım, jan joldasym. Jūmys köp, şarşaǧan kezder bolady, bıraq üige kelgende maǧan demeu bolatyn sol kısı. Menıŋ ärbır jetıstıgımnıŋ artynda onyŋ qoldauy men sabyry tūr. “Patşaiym” deu qūr maqtau emes, şyn nietpen aitylǧan alǧys. Öitkenı äiel adam — otbasynyŋ jüregı. Otbasy myqty bolsa, er-azamattyŋ da qadamy nyq basylady. Onyŋ üstıne Ūlybritaniiada tūramyz. Būl jaqta patşa janūiasy ömır süredı. Ekınşı Elizaveta patşaiym ömırınıŋ soŋyna deiın taqta otyrdy. Sosyn bar ǧoi – eger jūbaiymdy patşaiym dep erkeletsem, demek özım de otbasymdaǧy kışıgırım patşamyn (küledı)», – deidı ol.
Sonymen qatar, Ǧalymjan Qaramanūly mausymdyq jūmysqa ketıp jatqan qazaqstandyq jastar jaily pıkırın bıldırıp, olardyŋ arasynda alaiaqtarǧa tap bolǧandar az emestıgın atap öttı. Şetelge barmas būryn aqparatty mūqiiat tekserıp, zaŋdy jolmen äreket etuge keŋes berdı.
Bügınde Ūlybritaniiada jüzdegen qazaq jastary bılım aluda. Qazaq diasporasy belsendı jūmys ıstep, ūlttyq merekelerdı bırge atap ötedı.
Aǧylşyn tılın 37 jasynda meŋgere bastaǧan Ǧalymjan Qaramanūly jastarǧa eşteŋeden qoryqpauǧa, ūialmauǧa keŋes beredı.
«Tıl bılseŋız, älemnıŋ kez kelgen esıgı aşylady. Qai jerde jürseŋız de, öz tamyryŋyzdy, şyqqan jerıŋızdı esten şyǧarmaŋyz. Armandaryŋyz asqaq bolsyn, jürekterıŋızde Otanǧa degen mahabbat öşpesın», – dep aiaqtady sözın Ǧalymjan Qaramanūly.
Ūqsas jaŋalyqtar
