18 qaraşa künı keşke Batys Qazaqstan oblysynyŋ ortalyǧy Oral qalasynda polisiia patrulınıŋ kölıgı köşenıŋ jaiau adam ötetın tūsynda 21 jastaǧy boijetkendı qaǧyp ketken. Därıgerler jedel järdem kölıgımen auruhanaǧa jetkızılgen Larisa Beisovanyŋ jaǧdaiy auyr deidı. Oblystyq densaulyq saqtau basqarmasynyŋ deregı boiynşa, boijetkennıŋ bas süiegı zaqymdanyp, miy şaiqalǧan. Auruhanada es-tüssız jatqan qyzǧa tuystaryn älı jolyqtyrmaǧan.
Seisenbıge qaraǧan tünı jol apaty bolǧan jerge barǧan jergılıktı bloger Aibolat Bökenov körgenın smartfonǧa tüsırgen. Blogerdıŋ sözınşe, ol Oraldyŋ Zachagansk dep atalatyn audanyna jetken kezde zardap şekken qyzdy jedel järdem alyp ketken. Älgı jerde polisiia qyzmetkerlerı tūrǧan. Bökenovtıŋ aituynşa, ol apat bolǧan jerge barǧan oblystyq polisiia departamentınıŋ bastyǧy Mahsūthan Ablazimovqa sūraq qoiǧan. Özın tüsıruge tyiym salǧan polisiia şeneunıgı blogerdıŋ smartfonyn qolynan jūlyp alyp, qaramaǧyndaǧy qyzmetkerlerıne apat bolǧan jerde tüsırılgen jazbalardy öşırıp tastaudy būiyrǧan. Bökenovtı äuelı medisinalyq tekseruden ötkızuge aparǧan, keiın Zachagansk polisiia bölımşesıne jetkızıp, üstınen "polisiia qyzmetkerınıŋ talabyna baǧynbau" baby boiynşa äkımşılık qūqyqbūzuşylyq turaly hattama toltyrǧan. "Men böget jasaǧan joqpyn, sūhbat almaqşy boldym" dedı Azattyqqa Bökenov 19 qaraşada.
Seisenbı künı tüsten keiın oblystyq polisiia departamentı özıne qarasty qyzmet kölıgı jol apatyna ūşyraǧanyn rastady. Departamenttıŋ baspasöz qyzmetıne sıltegen Tengrinews.kz saity kölıktı basqarǧan polisiia aǧa leitenanty Baimūqaşevqa qatysty Qylmystyq kodekstıŋ 345-baby ("Jol jürısı nemese kölik qūraldaryn paidalanu qaǧidalaryn būzu") boiynşa tergeu bastalǧanyn habarlady.
Būǧan qosa polisiia departamentı bloger Aibolat Bökenovtıŋ "beibereket qozǧalyp, özı men özge adamdarǧa qauıp töndırgenın, polisiia qyzmetkerlerınıŋ ıs-qimylyn tüsırmekşı bolyp jol üstıne şyǧyp ketkenın" aityp, "tergeuge kedergı keltırdı" dep tüsındırgen. Polisiia ökılderı Bökenov eskertudı elemei, "agressiia tanytqan" jäne medisinalyq tekseru qorytyndysy körsetkendei, "masaŋdau küide bolǧan" deidı.
"Azattyq" radiosy
