Jeltoqsannyń ortasynda amerıkalyq Netflix strımıng servısi "6 Underground" ("Alty eles") atty fılmdi jaryqqa shyǵardy. Rejısseri – "Transformer" fılmin túsirgen Maıkl Beı. Fılmde Turgistan atty oıdan shyǵarylǵan eldegi dıktatormen kúres sýretteledi. Fılmdegi Turgistan eliniń ımıdjin qalyptastyrý úshin qoldanylǵan elementterden Túrkimenstannyń memlekettik sımvoldaryn, túrkimen esimderin, túrkimen tilin baıqaýǵa bolady.
Fılmderdegi oqıǵa ótken jerlerdi anyqtaýmen aınalysatyn atlaswonders.com saıty "6 Underground" fılmindegi Turgistan eliniń prototıpi - Túrkimenstan dep jazdy. Saıt dereginshe, shytyrman oqıǵaly fılm Italııa, Birikken Arab ámirligi, AQSh pen Vengrııada túsirilgen.
Fılmniń senarııin Pol Vernık (Paul Wernick) pen Retı Rız (Rhett Reese) jazǵan. Al basty rólderdi Raıan Reınolds (Ryan Reynolds) pen Melanı Loran (Mélanie Laurent) syndy Gollıvýd juldyzdary somdaǵan.
FILM JELISI
Amerıkalyq mıllıarder Turgistan elindegi dıktatorlyq rejımniń halyq kóterilisin qalaı basyp-janshyǵanyna kýá bolady da, keıin rejımnen qoldaý tapqan qylmyskerlerdiń kózin joıýdy oılastyrady. Bul úshin mıllıarder esimderin sanmen ataıtyn top quryp, ony "Elester" dep ataıdy. Toptaǵy "Bir" - mıllıarderdiń ózi, "Eki" - tyńshy, "Úsh" - jaldamaly jendet, "Tórt" - ury, "Bes" - dáriger jáne "Alty" - kólik júrgizýshisi. Keıin topqa "Jeti" - mergen qosylady.
"Elester" toby Italııadaǵy alǵashqy mıssııasy kezinde Turgistan eliniń tórt generalynyń advokatyn óltiredi. Keıin "Elester" Turgistan dıktatory Rovak Alımovti taqtan taıdyrýǵa kómektesedi. Rovaktyń ornyna onyń aǵasy Mýrad Alımov otyrady. Fılm keıipkerleri dıktatordyń esimi Rovak dep ataıdy, biraq fılmde onyń esimi Rowaç (Rovach) dep jazylady.
Bir qyzyǵy, Túrkimenstan prezıdenti Gýrbangýly Berdimuhamedovtiń Rovach esimdi jylqysy bar. Túrkimenstan basshysy súıikti jylqysyna arnap án de shyǵarǵan.
Fılmdegi Turgistan eliniń turǵyndary túrkimenshe sóıleıdi. Prezıdenti de fılmde túrkimen tilinde jıi til qatady. Oıdan qurastyrylǵan eldiń aqshasy – manat. Kadrlardan Túrkimenstan memlekettik sımvoldaryna uqsas belgilerdi baıqaýǵa bolady. Máselen, fılmde "Uzak ýaşa Rowaç Alimow" (Sizge uzaq ǵumyr tileımiz, Rovak Alımov) degen jazýy bar tósbelgi juldyz bar.
Fılmdegi polıeılerdiń kıimindegi jazý da "polisiýa" túrkimenshe jazylǵan.
Rovak óz aǵasy Muradty túrmege qamaýǵa buıyrady. Biraq "Elester" toby Muradty qutqaryp, bılikti alýǵa kómek qolyn sozady.
Fılmdegi basty keıipker "Bir" esimdi amerıkalyq mıllıarder Turgistan prezıdenti Rovak Alımovpen Parıjdegi opera teatrynda kezdesedi. Keıin Rovak Alımov memlekettik telearnada sóz sóılep jatqanda "Elester" telesıgnaldy baqylaýǵa alyp, Muradqa sóz beredi. Osydan soń elde tóńkeris bastalady.
Artynsha Alımovtiń ıahtasy shabýylǵa ushyraıdy. "Elester" Rovakty Turgistan mańyndaǵy bosqyndar lagerine aparyp tastaıdy.
Árıne, fılmde Túrkimenstanǵa qatysy joq elementter de bar. Máselen, soǵys sahnasy, qantógis, bosqyndar lageri Túrkimenstandaǵy jaǵdaıǵa múlde qatysy joq. Bul fılm Túrkimenstandaǵy saıası ómirge saı kelmeıdi.
Azattyqtyń Túrkimen qyzmetine fılm avtorlarynan qandaı da bir pikir alý múmkin bolmady. Túrkimenstanda Netflix strımıng servısi buǵattalǵan.
"6 Underground" ("Alty eles") fılmin túsirýge 150 mıllıon dollar jumsalǵan.
"Azattyq" radıosy
