Moldovalyq oligarh Anatol Stati. Körnekı suret.
Belgiia soty Qazaqstannan 540 million dollar ötemaqy öndırıp alu turaly moldovalyq oligarh, Ascom Group SA kompaniiasynyŋ bas direktory Anatol Statidıŋ ötınışın qanaǧattandyrdy. Būl aqparatty Cision saity habarlady.
"Briusseldıŋ bırınşı instansiialyq soty Qazaqstannan 540 million dollar öndırıp alu turaly arbitraj sotynyŋ şeşımın moiyndap, ony oryndaudy būiyrdy. Būl ıs boiynşa Ascom Group SA kompaniiasynyŋ qarsylasy - Qazaqstan" delıngen kompaniia taratqan baspasöz habarlamasynda.
Briussel sotynyŋ 34 betten qūralǧan sot qaulysynda şeşımge qarsylyq tanytqan Qazaqstan tarabynyŋ barlyq ötınışterınıŋ qabyldanbaǧany jazylǧan. Bır kün būryn Liuksemburgtıŋ apelliasiialyq soty osyǧan ūqsas şeşım şyǧaryp, Qazaqstannyŋ ötınışterın qanaǧattandyrmaǧan.
Qazaqstan ädılet ministrlıgı Briussel sotynyŋ şeşımımen kelıspeitının, apelliasiialyq şaǧym tüsıretının habarlady.
Moldovalyq biznesmen Stati men Qazaqstan bilıgı arasyndaǧy sot bırneşe jyldan berı jalǧasyp keledı. Qazaqstannyŋ mūnai salasyna investisiia salǧan Anatol Stati men onyŋ ūly Gabriel Stati Qazaqstannyŋ memlekettık organdary özın "investisiiasyn tym arzanǧa satuǧa mäjbürleu üşın qyspaqqa alǧanyn" aitady.
Būl ıs boiynşa negızgı şeşımdı 2013 jyly jeltoqsanda Şvesiianyŋ arbitraj soty şyǧarǧan. Şvesiia soty Qazaqstan investorlar aldyndaǧy halyqaralyq mındettemelerın būzdy dep tanyp, Statige 500 million dollar kölemınde öndırıp beru turaly şeşım şyǧarǧan. Keiınırek Nūr-Sūltan būl aiyptaudy terıstep, Statidı "alaiaqtyq jasady" dep aiyptady.
Sodan berı Stati bırneşe memlekette sot şeşımın küşpen oryndatuǧa küş salyp keledı. 2017 jyly jeltoqsanda New York Mellon bankı Anatol Statidıŋ Qazaqstan ükımetıne qarsy aryzy boiynşa Qazaqstan Ūlttyq qorynyŋ 22 milliard dollar qarjysyn būǧattaǧany jariia bolǧan.
Biyl mamyrda Niderland soty qūny 5,2 milliard dollar tūratyn Niderlandtyŋ KMG Kashagan B.V. kompaniiasyndaǧy "Samūryq-Qazyna" memlekettık qory aksiialaryna salynǧan tyiymdy küşınde qaldyrdy. Būl aksiialarǧa Qazaqstan ükımetı men Anatol Stati arasyndaǧy dau aiasynda tyiym salynǧan edı.
"Azattyq" radiosy
