"Qazaqstannyŋ demokratiialyq partiiasyn" qūrǧysy keletın bastamaşyl top ökıldernıŋ ministrlıkke qūjat tapsyru sätı. Nūr-Sūltan, 26 jeltoqsan 2019 jyl.
26 jeltoqsanda "Qazaqstannyŋ demokratiialyq partiiasyn" qūrǧysy keletın bastamaşyl top ökılderı myŋnan astam adamnyŋ qoly qoiylǧan qūjatty ädılet ministrlıgıne tapsyryp, qūryltai sezın ötkızu üşın bastamaşyl topty tırkeudı sūrady.
Qūjattardy ädılet ministrlıgınıŋ ökılı Talǧat Äbubäkırov qabyldap, tırkelgenı turaly kvitansiiany bügın saǧat 16.00-ge deiın beruge uäde berdı.
Bastamaşyl top ökılı İnga İmanbai ministrlık topty tırkemegen jaǧdaida mūny "saiasi sebeppen" bailanystyratynyn aitty.
- Bızge sezd ötkızuge mümkındık beredı dep ümıttenemız. Daiyndaǧan qūjattarymyz ben jaqtastarymyzǧa senemız. Eger ädılet ministrlıgı qandai da bır sebeppen tırkeuden bas tartsa, onda ony saiasi sebeppen bas tartty dep tüsınemız jäne ärı qarai äreket jasaimyz, - deidı İnga İmanbai.
31 jastaǧy jurnalist, belsendı Janbolat Mamai qazan aiynda Almatydaǧy jiynda "Qazaqstannyŋ demokratiialyq partiiasyn" qūratynyn mälımdegen. Ol “partiianyŋ maqsaty sailauǧa tüsu emes, eldegı bilık jüiesıne özgerıs engızu, halyqtyŋ ünın bilıkke jetkızu” ekenın aitqan.
Ol keiınırek oblysty aralauǧa probasiia qyzmetınıŋ rūqsat bermei otyrǧanyn habarlaǧan. Qaraşa aiynda bastamaşyl top ökılderınıŋ aimaqtaǧy kezdesulerı kezınde bırneşe adam şu şyǧarǧan.
Qazaqstan zaŋnamasy boiynşa, partiia qūru üşın aldymen myŋ adam qatysatyn sezd ötkızu qajet. Al partiiany resmi türde tırkeu üşın 40 myŋ müşesı boluy kerek.
Qazaqstan prezidentı Qasym-Jomart Toqaev 20 jeltoqsanda "ūlttyq qoǧamdyq senım keŋesınıŋ" otyrysynda partiia qūruǧa qajettı adamdar sanyn 40 myŋnan 20 myŋǧa azaitu qajettıgın aitqan.
Qazırgı kezde Qazaqstanda resmi tırkelgen alty partiia bar. Parlamentte üş partiianyŋ ökılderı otyr: būrynǧy prezident Nūrsūltan Nazarbaev basqaratyn "Nūr Otan" partiiasy, bilıkşıl "Aq jol" jäne "Kommunistık halyqtyq partiiasy".
"Azattyq" radiosy
Foto avtory Sanat Oryn Äli
