Aqjarqyn Turlybaı osydan bes jyl buryn Gýanchjoý áýejaıynda ustalǵan bolatyn. Oǵan shekaradan 4,5 keli esirtkini alyp ótpek boldy degen aıyp taǵyldy
Qytaı soty otandasymyz Aqjarqyn Turlybaıǵa qatysty sot sheshimin ózgerissiz qaldyrdy, dep habarlaıdy Sputnik Qazaqstan syrtqy ister mınıstrliginiń baspasóz qyzmetine silteme jasap.
Vedomstvonyń aqparatynsha, búgin Qytaıdyń Gýanchjoý sotynda esirtki tasymaldaǵany úshin aıyptalǵan Qazaqstan azamaty Aqjarqyn Turlybaıǵa qatysty sot úkimi shyqty.
"Qytaı soty ómir boıy bas bostandyǵynan aıyrý týraly úkimdi ózgerissiz qaldyrdy", - delingen habarlamada.
Úkim 10 kúnnen soń kúshine enedi.
Sot otyrysyna advokattar men Qazaqstannyń Qytaıdaǵy elshiliginiń konsýly qatysqan.
Aqjarqyn Turlybaıdyń taǵdyry
Qazaqstan azamaty Aqjarqyn Turlybaı 2014 jyly naýryzda Gýanchjoý áýejaıynda ustalǵan bolatyn. Oǵan shekaradan 4,5 keli esirtkini alyp ótpek boldy degen aıyp taǵyldy. Ol kezde otandasymyz 20 jasta bolǵan edi. 2015 jyldyń maýsymynda Qytaı soty ony ómir boıyna bas bostandyǵynan aıyrdy. Sotta Aqjarqyn sheteldik dosy aldap ketkenin aıtyp, kinásin moıyndaǵan joq.
2016 jyly sot sheshimi joıylyp, is qaıta qaraýǵa jiberildi.
Osy jyldyń qyrkúıeginde Turlybaıdyń anasy Zýhra Seıtimova Qazaqstan prezıdentine kómek surap hat jazdy. Artynsha Qasym-Jomart Toqaev Qytaıǵa sapary kezinde Aqjarqyn Turlybaıdyń máselesin kótergen bolatyn.
Aqjarqyn túrmede nemen aınalysady
Qazaqstannyń Qytaıdaǵy elshiliginiń málimetine súıensek, Turlybaı qasyndaǵy sottalǵandarǵa aǵylshyn tilin úıretip júr. Sonymen qatar, kórkem ádebıet oqıdy, dene shynyqtyrýmen de aınalysady. Qytaı tilin jaqsy meńgerip alǵan.
