Sybailas jemqorlyq jasady degen küdıkke üş adam – Alatau audanynyŋ eks-äkımı, onyŋ orynbasary jäne mädeniet bölımınıŋ basşysy ılındı
Almatyda Alatau audany äkımdıgınıŋ üş qyzmetkerı para aldy jäne biudjet qarjysyn jymqyrdy degen küdıkpen ūstaldy.
"Almaty qalasy Alatau audanynyŋ eks-äkımı, onyŋ orynbasary, sondai-aq osy audan äkımı apparatynyŋ mädeniet jäne tılderdı damytu bölımınıŋ basşysy sybailas jemqorlyq qylmysyn jasady degen küdıkke ılındı", - delıngen Sybailas jemqorlyqqa qarsy qyzmet taratqan habarlamada.
Olarǧa 2019 jyly öŋırlerdı damytudyŋ 2020 jylǧa deiıngı memlekettık baǧdarlamasy boiynşa bölıngen biudjet qarajatyn ırı kölemde jymqyrdy degen aiyp taǧylyp otyr.
Sonymen qatar, tergeu merdıger ūiymnyŋ ökılınen bank kartasyna jarty million teŋge para alu faktısı boiynşa tekserıs jürgızıp jatyr. Sybailas jemqorlyqqa qarsy qyzmettıŋ mälımetı boiynşa, para beruşı şeneunıkterden ıs jüzınde oryndalmaǧan jūmystardyŋ atqarylǧany turaly aktılerge jalǧan jazba jasaudy sūraǧan.
Qazırgı uaqytta audan basşysy men onyŋ orynbasary ūstalyp, uaqytşa ūstau abaqtysyna qamaldy. Būltartpau şarasyn taŋdau turaly mäsele şeşılude.
Äkımdıktıŋ mädeniet bölımınıŋ basşysy kınäsın moiyndauyna bailanysty prosessualdyq qamauǧa alynbaǧan.
Küdıktılerdıŋ kınäsınıŋ deŋgeiı turaly tüpkılıktı şeşımdı sot qabyldaidy.
2017 jyldyŋ 10 şıldesınen bastap Alatau audanynyŋ basşysy qyzmetın Şahmerden Ryspaev atqardy. Degenmen, 17 qaŋtar künı keşke būl qyzmetke Azamat Qaldybekov taǧaiyndaldy. Şeşım prezident äkımşılıgımen jäne deputattarmen kelısıldı.
