Qytaidaǧy qauıptı ındet (koronavirus) taraǧan Uhan qalasynda 87 qazaq studentı bar, dep habarlaidy
Dalanews.kz
Qazaqstannan kelgen Aisūltan Uhan qalasynyŋ universitetınde bılım alady. Qala karantinge jabylǧaly osyndaǧy qazaq jastary saqtyq şaralaryn qabyldauǧa mäjbür bolǧan.
“Bügın Qytai telearnalary jaǧdaidy baqylauǧa aldyq dep habar taratty. Alaida keşe keşkısın qaladaǧy äuejai jabylyp qaldy. Äzır qalaǧa kıru de, şyǧu da mümkın emes. Bız karantin aumaǧyndamyz.
Metro, qoǧamdyq kölıktıŋ jūmysy toqtady, tek taksi qatynap tūr. Bıraq onyŋ özı azdyq etude. Qala karantinge jabylmai tūra bızben bırge bolǧan bırşama adam kölıkpen körşı qalaǧa jetıp, ärı qarai Beijıŋge attandy. Osy aradan tuǧan jerıne tura tartady. Alaida däl qazır qaladan şyǧu mümkın emes”, – deidı Aisūltan.
Onyŋ aituynşa aurudyŋ asqynuyna qauıptı ındetpen tūspa-tūs kelgen Qytai jaŋa jyly da sebepşı boluy mümkın. Sebebı būl uaqytta qytailyqtar bır-bırın qūttyqtap, alys-jaqyndaǧy tuys-tuǧandaryna saparlap keledı.
Qytailyqtar jūmysqa aldaǧy aidyŋ 6-sy künı şyǧady. Eldegı bırqatar oqu oryndary virusqa bailanysty demalysty nauryz aiyna deiın sozǧan.
Virus jūqtarǧandardyŋ sany resmi mälımetke qaraǧanda äldeqaida köp degen qaŋqu sözdı Uhan qalasyndaǧy qazaq studentterı de estıptı.
“Qalada qamalyp qalǧan studentter jataqhanada bas qosyp, karantinnıŋ aldynda qajettı azyq-tülıkpen qamdanyp aldyq. Qytai bilıgı jaǧdaidy baqylauda ūstaitynyn aitty. Janymyzda şeteldık studentterdı baqylaityn bölım jetekşısı bar.
Univerlerdıŋ köpşılıgı karantin bastalmai tūryp öz studentterın elderıne attandyryp ülgerdı. Därıgerler bızge arnaiy videolar jıberıp, qauıptı ındettıŋ qalai taralatyny turaly mälımet berdı. Maska ülestırdı.
Virus jūqtyrǧan jaǧdaida qaida habarlasu keregın aitty. Keibır oqu oryndarynyŋ basşylyǧy studentterge arnap azyq-tülık jetkızıp berdı. Äzırge şydauǧa bolady”, – deidı Aisūltan.
Uhan qalasynda bılım alatyn taǧy bır qazaq studentı Arujan Begmanova kerısınşe mūndaǧy ahualdyŋ uşyǧyp tūrǧanyn habarlady.
Arujan Qazaqstan bilıgı karantin aimaǧynda qalǧan studentterdı elge qaitaruy tiıs dep esepteidı.
“Qaladaǧy düken-düŋgırşekterdıŋ derlıgı jabylyp qaldy. Adamdar azyq-tülıktı talap alyp kettı. Uhandaǧy jaǧdai uşyǧyp tūr. Tūmannan tük körınbeidı. Üiımdı saǧyndym. Otbasym kütıp otyr. Men sekıldı jüzdegen jastar elıne qaitqysy keledı. Ükımettıŋ būǧan qauqary jeter, Qazaqstanǧa qaitqymyz keledı”, – dep jazǧan Arujan
Insta paraqşasynda.
Ol osyndaǧy qazaq studentterınıŋ aman-sau ekenın, syrqatqa şaldyqpaǧanyn aitqan.
“Būǧan köz jetkızgısı kelse bızderdı teksersın, auru anyqtalmasa elımızge jıbersın”, – deidı Arujan.
Basqalarmen bölıse
otyryŋyz
