Bügınde älem halqynyŋ 40%-y tūşy su tapşylyǧynan zardap şegıp otyr. 2030 jylǧa qarai būl körsetkış 67%-ǧa deiın ösedı degen boljam bar. Iаǧni sol uaqytta Jer betındegı 5 mlrd adam taza su ışu mümkındıgınen aiyrylady eken. Klimat özgerıp, tūrǧylyqty jerınıŋ ömır süruge jaramsyzdyǧynan üiın tastap, jaily oryn ızdep jürgen bosqyndar jyl saiyn köbeiude. Osy uaqytqa deiın su üşın daulasyp, tıptı soǧysqan elder de az emes.
⠀
Qazaqstan da suy tapşy memleketter qataryna kıredı. Ol az sudyŋ özı bızdıŋ öŋırlerge bırkelkı taralmaǧan. Äsırese, şalǧaida jatqan auyldardyŋ jaǧdaiy qiyn. Derekterge süiensek, elımızdıŋ su qory jyl ötken saiyn azaiuda. Ülken özenderımız Resei, Qytai men Özbekstannan aǧyp keletının jäne ol elderde öndırıs pen şaruaşylyq damyp jatqanyn eskersek, bolaşaqta jaǧdai qiyndamasa, jaqsyrmaityn siiaqty.
⠀
Balqaşty mysalǧa alaiyq. Kölemı jaǧynan älemde on törtınşı orynda tūrǧan köldıŋ qazırgı halı naşar deidı ekologtar. Eger der kezınde äreket etpesek, ol Araldyŋ taǧdyryn qaitalauy mümkın degen qorqynyşty boljam bar.
⠀
Aral teŋızın tolyqtai ainalyp, 20 kün zerttegen ekspedisiia qūramynda boldym. Suy tartylǧan teŋızdıŋ tübıne qonyp, uaqyttan jaŋylyp, äbden şarşaǧan edım. Keşe Balqaşta qatqan mūzdyŋ betımen jürıp bara jatyp sol künder eske tüskenı. Teŋızdıŋ tübınde jürgennen, mūzdyŋ betımen jürgen äldeqaida qorqynyşty eken. Alaida bırınşısıne qaraǧanda, ekınşısı janyma jaily körındı. Aiaǧyŋnyŋ asty sor emes, su ekenın bılgennıŋ özı erekşe äser sailaidy, sanaŋa senım ūialatady.
⠀
Aitpaqşy, «Mūzdyŋ üstınde ne ıstep jürsıŋ?» dep sūrap jatqandar köp. Osy Balqaş mäselesıne sızderdıŋ nazarlaryŋyzdy audaru üşın! Erteŋ kepken köldıŋ tübımen jürmes üşın! Ūrpaǧymyz tūşy su tapşylyǧyn körmes üşın!
⠀
Ernar AMALBEK