QR Ūlttyq muzeiınde Nauryz merekesıne orai ata-anasynyŋ qamqorlyǧynsyz qalǧan säbilerdıŋ tūsauyn kesu räsımı öttı, dep habarlaidy muzeidıŋ aqparattyq-imidjdık qyzmetı.
Säbilerdıŋ tūsauyn kesuge Qazaqstannyŋ Eŋbek sıŋırgen ärtısı, bırneşe halyqaralyq baiqaulardyŋ jeŋımpazy Maira Mūhamedqyzy, «Astana aqşamy» JŞS direktorynyŋ orynbasary, belgılı jurnalist Zeiın Älıpbek, halyqaralyq baiqaulardyŋ jeŋımpazy, aqyn Qalqaman Sarin, «Balapan» telearnasynyŋ direktory, telejürgızuşı Läilä Sūltanqyzy, belgılı saiasattanuşy-jurnalist Jarqyn Tüsıpbekūly tärızdı tanymal tūlǧalar şaqyryldy.
«Tūsaukeser» räsımı» jobasynyŋ jetekşısı, muzeitanuşy Nūrserık Jolbarys jurnalisterge bergen sūhbatynda atalǧan şaranyŋ maŋyzyna toqtalyp öttı.
- «Qariiasyn «qazynam», ūlyn «ūrpaq jalǧastyrarym», qyzyn «örısımdı keŋeiterım» dep bılgen halqymyz üşın är salt-dästürdıŋ orny erekşe bolǧan. Düniege kelgen sätınen bastap säbiın elı men jerın süiuge, halqynyŋ mūrasyn qasterleuge tärbieleitın asyl dästürlerımız Ūlttyq muzeidıŋ qaiyrymdylyq jobasynda öz jalǧasyn tauyp otyr. Būl joba memlekettık deŋgeide bastalǧan #JaqsylyqJasa atty halyqtyq jobasynyŋ aiasynda ötkızıldı. Osydan bıraz uaqyt būryn bastalǧan #JaqsylyqJasa jobasyna bükıl qazaqstandyqtar atsalysty. Joba öz jalǧasyn tauyp keledı. Ūlttyq muzei ūjymy da būl jobadan qalys qalmai ata-anasynyŋ qamqorlyǧynsyz qalǧan balalar üşın «Tūsaukeser» räsımı» jobasyn qolǧa aldy. Joba aldaǧy uaqytta dästürlı türde ötıp tūratyn bolady. Jetımın jylatpaǧan babalarymyzdyŋ asyl qasietınıŋ osyndai joba arqyly körınıs tapqanyna quanyştymyz, - dedı N.Jolbarys.
Qazaqstannyŋ Eŋbek sıŋırgen ärtısı Maira Mūhamedqyzybalalardyŋ bolaşaǧyna aq jol tılep, özınıŋ analyq lebızın bıldırdı.
- Özım ana bolǧan soŋ jerde, osy ıs-şaraǧa arnaiy keldım. Nauryz merekesıne orai ötkızılıp jatqan «Tūsaukeser» räsımıne qatysqanym üşın de öte quanyştymyn. Mūndai ıs-şaralar dästürlı türde jolǧa qoiylsa nūr üstıne nūr bolar edı. Bıraq bızdıŋ qazaq jastary bala mäselesıne jeŋıl qaramasa eken deimın. Ol ülken jauapkerşılıktı qajet etetın dünie. Sonymen qatar, jetımder üiı bolmasa eken deimın. Būl büldırşınder mahabbatqa, meiırımge zäru keledı. Sondyqtan da olardy süiıspenşılıkke böleu bärımızdıŋ adamdyq boryşymyz, - dedı M.Mūhamedqyzy
Sonymen qatar, Qalqaman Sarin, Läilä Sūltanqyzy, Zeiın Älıpbek, Jarqyn Tüsıpbekūly balalardyŋ tūsauyn kesıp, aq tılekterın arnady.
Joba aiasynda Astanadaǧy säbiler üiınıŋ 5 tärbielenuşısınıŋ tūsauy kesıldı. Tūsaukeser räsımındegı fotosuretter men tapsyrylatyn sertifikattar balalardyŋ jeke ıs-paraǧyna tıgılıp, bolaşaqta özderınıŋ tūsauyn kesken tūlǧalardy bılıp jüruı üşın saqtalatyn bolady.
Nauryz merekesıne orai ötkızılgen būl şara aldaǧy uaqytta är mereke saiyn öz jalǧasyn tappaq.
