Prokuratura ökılderınıŋ sot medisinalyq saraptama mamandarymen bırge Aǧadıldıŋ "azaptalǧany" turaly aqparatqa bailanysty ötkızgen baspasöz jiyny. Nūr-Sūltan, 28 aqpan 2020 jyl.
28 aqpanda tüsten keiın Nūr-Sūltan qalalyq prokuraturasy tergeu izoliatorynda jūmbaq jaǧdaida köz jūmǧan belsendı Dulat Aǧadıldıŋ denesındegı "azaptau ızderı" turaly aqparatqa tüsınıkteme berdı. 28 aqpanǧa qaraǧan tünı äleumettık jelıde marqūmnyŋ denesındegı "jaraqat" turaly video taraǧan edı. Keibır belsendıler men qūqyq qorǧauşylar ony "izoliatorda ūryp-soqqan boluy mümkın" dep mälımdep, bilıkten tüsındırudı talap etken.
Nūr-Sūltan qalasy prokurorynyŋ orynbasary Eldos Kelımjanov "Aǧadıldı tergeu izoliatorynda azaptaǧan" degen aqparatty joqqa şyǧaryp, Aǧadıl denesındegı "daqtardy" biologiialyq ölım belgılerı dep atady.
- [Äleumettık jelılerde taraǧan] Videomaterialdarda mäiıtte daqtar bary aitylady. Ony dene jaraqaty dep ataidy. Mūnda onyŋ paida bolu sebebın tüsındıre alatyn mamandar bar. Mäiıttegı daqtar - būl biologiialyq ölımnıŋ belgılerı. Medisinalyq tılmen aitqanda, daqtar adamnyŋ jüregı toqtaǧannan keiın kemınde bır saǧat ötkennen keiın paida bolady, - dedı ol.
Tıkelei efirdı körıŋız:
Onyŋ aituynşa, bastapqyda Aǧadıldıŋ denesın Talapker auyldyq auruhanasy men tergeu izoliatorynyŋ därıgerlerı qarap şyǧyp, "soqqy ızderın" tappaǧan. Oqiǧaǧa qatysty qozǧalǧan qylmystyq ıs aiasynda sot medisinalyq saraptama taǧaiyndalǧan. 26 aqpanda marqūmnyŋ aǧasy men advokat Bauyrjan Azanovtyŋ qatysuymen mäiıtke saraptama jürgızılgen.
"Marqūmnyŋ aǧasy men advokat Azanov saraptama qorytyndysyna şaǧymdanǧan joq. Mäiıttı saraptau men zertteu barysy videoǧa tüsırıldı. Etika talaptaryna bailanysty jäne tuystary rūqsat bermegendıkten videony jariialai almaimyz. Būǧan deiın saraptamanyŋ aldyn ala qorytyndysyn aitqanbyz. Aǧadıl jürek qantamyrlarynyŋ jetıspeuşılıgınen qaitys bolǧan" dedı Kelımjanov.
Ol saraptamanyŋ tüpkılıktı qorytyndysy jaqyn arada şyǧatynyn aityp, azamattardy asyǧys qorytyndy jasamauǧa jäne tekserılmegen aqparatty taratpauǧa şaqyrdy.
Äleumettık jelı men messenjerlerde taraǧan videoda bırneşe adam ekı kündık saraptamadan keiın mäiıthanadan marqūmnyŋ süiegı jetkızılgenın aityp, denesın körsetıp, "soqqy ızderı baiqalady" dep tūjyrym jasaidy. Olar marqūmnyŋ denesın tekserıp, sausaǧy qaraiyp ketkenın, iyǧy kögerıp, tabanynda, arqasynda jaraqat ızderı baryn aitady.
Būl video jariialanǧannan keiın äleumettık jelıde narazy jazbalar köbeidı. Olardyŋ köbı "Aǧadıldıŋ ölımıne kınälıler jazalansyn, jalǧan aqparat bergender qylmystyq jauapkerşılıkke tartylsyn" degen talap aitty.
Dıni räsım boiynşa süiekke tüsken Qaiyrjan İmanǧaliūly esımdı Qostanai oblysynyŋ azamaty 27 aqpanda Azattyqqa bergen sūhbatynda Aǧadıldıŋ süiegın mäiıthanadan äkelgen künı marqūmnyŋ denesınen jaraqat ızderın baiqaǧanyn mälımdegen bolatyn.
28 aqpanda Aǧadıldıŋ jaqyndary Azattyq tılşısıne tüsınıkteme beruden bas tartty. Aǧadıldıŋ otbasyna jaqyn adamdardyŋ bırı marqūmnyŋ otbasyna qysym jasalǧanyn aitty.
Seisenbı künı ışkı ıster ministrınıŋ orynbasary Arystanǧani Zapparov "belsendınıŋ denesınde zorlyq-zombylyq ızderı anyqtalmaǧanyn" habarlaǧan.
Qoǧam belsendılerı bilıktıŋ mälımdemesıne kümän keltıredı. Belsendıler men qūqyq qorǧauşylar täuelsız saraptama jürgızıluı tiıs deidı.
25 aqpanda Aǧadıldıŋ qazasynan keiın Qazaqstannyŋ türlı qalalarynda narazylyq aksiialary ötıp, jinalǧandar būrynǧy prezident, yqpaldy Qauıpsızdık keŋesınıŋ töraǧasy Nūrsūltan Nazarbaevtyŋ otstavkaǧa ketuın talap ettı. Būǧa qosa, onyŋ ainalasyndaǧy adamdar, ışkı ıster ministrı Erlan Tūrǧymbaev ta qyzmetınen ketsın degen talap aitty.
25 aqpanda Nūr-Sūltanda belsendınıŋ ölımıne bailanysty ışkı ıster ministrlıgınen tüsınıkteme talap etıp, joldy jabuǧa tyrysqan ondaǧan adam ūstaldy. Keiınırek bosatyldy. 27 aqpanda Talapker auylyndaǧy jerleu räsımınen keiın Nūr-Sūltanǧa baryp, belsendılerdı bosatyp, reformany talap etuge tyrysqan jiyrmadan astam adam ūstaldy.
"Azattyq" radiosy
foto avtory Säniia Toiken
