26 tamyz – ısi qazaq balasy úshin aıtýly datalardyń biri bolýy tıis edi. Alaıda, ol kúnniń mańyzyn dál qazir biri bilse, biri bilmeıdi.
Osydan 96 jyl buryn bir top alash azamaty qazaq eliniń jer kólemin belgileý úshin jan berip, jan alysty. Aqyry, degenderine jetti. Búgingi Táýelsiz elimizdiń memlekettik shekarasy sol alashtyń arda uldarynyń qajyrly eńbeginiń arqasynda belgilengen. Aıtar áńgimemizdiń álqıssasyn búgingi kúnnen bastap, keshegi ótken tarıhqa barlaý jasaýdy jón kórdik...
Memleket basshysy Nursultan Nazarbaevtyń elimizdiń shekarasyn tas-túıin etip bekitken soń, «Tuńǵysh ret tarıhta bizdiń memleket halyqaralyq dárejede tanylǵan naqty shekarasyn belgiledi. 14 myń shaqyrym memlekettik shekara mejelendi» dep, aqjarma sózin halqyna arnaǵany bar.
Ras, TMD keńistiginde halyqaralyq quqyq normalarymen zańdy túrde bekitilgen memlekettik shekaraǵa Qazaqstan ǵana ıe. Tipti osy TMD keńistiginde shekara syzyǵyn aıqyndamaǵan keıbir respýblıkalar biraz terrıtorııasynan aıyrylyp qalǵan jaıy bar... Qudaıǵa shúkir, Qazaqstan shekarasyna selkem túsirmeı, ýaqytynda shegendeı aldy. Ras, túıtkildi máseleler bolmaı qalǵan joq. Óıtkeni, 13400 shaqyrymǵa sozylǵan shekarany bekitý ońaı emes. Kórshilermen kelise otyryp, beıbit jolmen sheshý, halyqaralyq deńgeıge saı delımıtaııalaý, demerkaııalaý bir pármenmen sheshiletin dúnıe emes. Tipti kezinde KSRO sheshe almaǵan Qytaımen shekaradaǵy daýly aımaq máselesin sheshý Qazaqstanǵa ońaı tımedi. Sondaı-aq, 7591 shaqyrymǵa sozylyp jatqan Reseımen eki aradaǵy shekarany delımıtaııalaý da qajyrly eńbektiń arqasynda keldi. Sonymen qatar, Qyrǵyzstan, Ózbekstan, Túrkimenstanmen de beıbit kelisimder júrgize otyryp, shekara máselesin shı shyǵarmaı sheship alǵan jaıymyz bar. Árıne, bul jerde Elbasy Nursultan Nazarbaevtyń eren eńbegin aıtpaı ketýge bolmaıdy. Memleket basshysynyń bet-bedeli bolmaǵanda, áli de shekara máselesin ózgeler sekildi sheshe almaı júrer me edik, kim bilsin?! Qudaıǵa shúkir, qazir elimiz halyqaralyq quqyq normalarymen zańdy túrde bekitilgen memlekettik shekaraǵa ıe. Bul jerde eske sala ketetin bir jaıt, táýelsizdikke qol jetkizgen elimiz tarıhı muragerlik quqyǵy boıynsha Keńes Odaǵynyń quramyndaǵy Qazaq KSR-iniń aýmaǵy men shekarasyna ıelik etkeni belgili. Al ol shekarany bekitý úshin úlken aıqas bolǵanyn tarıhtan bilemiz. Eń bastysy, alash arystary ıisi qazaq jeriniń tutastyǵyn saqtap qalý úshin jan berip, jan alysty. Endi, osy máselege keleıik.
1920 jyldyń 26 tamyzynda Qazaq avtonomııasyn qurý jáne onyń jer kólemin belgileý jóninde dekret dúnıege keldi. Kremlde ótken uzaq tartystan soń, qyzyl proletarıattyń kósemi – Lenın arnaıy qaýlyǵa qol qoıdy. Bul – jeke azat el bolýdy ańsaǵan Alash arystarynyń janqııarlyq eńbeginiń arqasy edi. Sol tartysy mol alqaly májiliste bolashaqta quralatyn Qazaq memleketiniń shekarasy mejelendi. Negizgi tartys «Qazaq avtonomııasyna qaı jerler kiredi?» degen máselege kelgende, qatty ýshyqqany belgili. Biraq Alash arystary alǵa qoıǵan maqsatyna jetti. Álıhan Bókeıhanov, Ahmet Baıtursynov, Álimhan Ermekov Qazaq memleketi aldyndaǵy tarıhı mıssııasyn osylaısha oryndap shyqty. Sol kezde bar-joǵy 29 jastaǵy Álimhan Ermekov Álıhan men Ahmettiń dem berýiniń arqasynda azýly toptyń aldynda Qazaq jeriniń shekarasy jaıynda baıandama jasady.
Ol baıandamada Astrahan, Oral, Torǵaı, Aqmola, Semeı, Syrdarııa, Zakaspıı, Samarqan, Ferǵana oblysy men gýbernııalaryn qamtıtyn, jalpy kólemi 3 467 922 sharshy shaqyrym jerdi Qazaq respýblıkasynyń quramyna berýdi surady. Kórsetilgen jerdiń 81 paıyzyn jan sany 5,5 mıllıon bolatyn qazaqtar paıdalanatyn. Bul sol aımaqtardaǵy turǵyndardyń 54 paıyzy edi. Sol májiliste otyrǵandar Ermekovtiń aıtqandaryna tolyqtaı bolmasa da qosylatynyn bildirdi. Biraq muny jeńis deýge erterek bolatyn. Óıtkeni, endigi kezek avtonomııanyń aýmaǵy men turǵyndary týraly usynystardy Lenınniń aldynda qorǵap shyǵý kerek edi.
12 tamyz kúni Lenınniń tóraǵalyq etýimen ótken májiliste Álimhan Ermekov baryn saldy. Óıtkeni ol ıisi qazaqtyń taǵdyr-talaıy sheshiletin kez dál osy tus ekenin jan dúnıesimen sezindi jáne jaǵdaıdy asa jetik biletindigi hám sheshendigi arqasynda óz aıtqandarymen Lenındi ılandyra aldy. Tipti kózbe-kóz sóılesýden keıin, qazaqtyń ýysynan shyǵyp bara jatqan Atyraý óńirin de alash jurtyna máńgige qaıtaryp berdi.
Ras, Sibir revkomy 1922 jylǵa deıin soltústik oblystardy Qazaqstanǵa qospaýǵa tyrysyp baqty. Biraq aqyry kóngen edi. Osylaısha, Alash arystary tuńǵysh ret Alash jurtynyń shekarasyn resmı túrde bekitip aldy. Bul – olardyń halyq aldyndaǵy asa úlken eńbegi boldy. Al osy aıtýly data búginde kóptiń nazarynan tys qaldy. Eskerilmedi. Sondyqtan muny biz aıtyp, halyqtyń esine túsirip qoıý – paryzymyz.
Tursyn JURTBAI alashtanýshy ǵalym,jazýshy:
Bul kún ulttyq merekemiz bolýǵa tıis
– Álimhan Ermekov óz sózinde mynadaı pikir aıtypty: «Qazaqstan shekarasyn anyqtaý barysynda muqym ólkeniń etnıkalyq, ekonomıkalyq jáne mádenı erekshelikterin erekshe eskerý kerek. Eger qazaqtardyń osy ýaqytqa deıin kóshpeli ómir salty men mal sharýashylyǵyn basty kásip retinde saqtap qalǵanyn nazarǵa ilsek, onda bul oblystardyń ózara tyǵyz baılanysy kózge anyq kórinip tur. Sondyqtan da Qazaq avtonomııaly respýblıkasyn qurý tek soltústik jáne ońtústik oblystardyń arasyndaǵy shekaralyq tutastyqty saqtaǵan jaǵdaıda ǵana múmkin ári naqty ómirlik sıpat alady.
Bul másele kerisinshe sheshilgen jaǵdaıda avtonomııa tirshilik kózinen aıyrylady. Sonymen qatar, mádenı, ekonomıkalyq jáne aralas oblystyq ortalyqtarda talap etip otyrǵan terrıtorııanyń quramynda qalyp qoıady. Bul ortalyqtarsyz ońtústik oblystar ekonomıkalyq, sharýashylyq, mádenı asharshylyqqa ushyrap, tiri ólikke aınalady. Osy paıymdaýlardy eskere otyryp, Qazaq avtonomııasynyń shekarasyn kórsetilgen shekara boıynsha bekitý qajet. Orynbor qalasy ýaqytsha ortalyq retinde qarastyrylýy kerek».
Ermekovtiń aıtqany shyndyq edi. Eger de Sibirrevkomynyń yrqyna kónetin bolsaq, búgingi Qazaqstannyń bes oblysy: Shyǵys Qazaqstan, Semeı, Aqmola, Qyzyljar, Kókshetaý Reseıdiń terrıtorııasynda qalýy kerek boldy. Eger sol astrahandyq delegaııanyń sózine senetin bolsaq, onda qazirgi Oral, Atyraý, Mańǵystaý oblystary Reseıdiń quramyna ketýi kerek bolatyn. Turar Rysqulovtyń ótinishi ótip ketip, Túrkistan memleketi quryla qalǵan jaǵdaıda, onda qazirgi Almaty, Jambyl, Ońtústik Qazaqstan, Qyzylorda oblystary Túrkistan memleketiniń, ıaǵnı qazirgi Ózbekstannyń quramynda qalyp qoıatyn edi.
Mine, osy máseleni qoıyp, ony zańdastyrý, qazaq jeriniń ár pushpaǵyna deıin anyqtap, ondaǵy turǵyndar men olardyń kúnkórisine deıin naqtylap aıqyndaý Álıhan Bókeıhannyń keńesimen Álimhan Ermekovtiń moınyna júktelgen bolatyn. Olar senimdi aqtady.
Májiliste Álıhan Bókeıhannyń, Álimhan Ermekovtiń, Lenınniń tikeleı yqpaly bolmaǵanda jáne osy sózdi Lenınniń nusqaýyna tirep, «Lenınniń nusqaýyn oryndaısyńdar ma, joq pa!» degen Ahmet Baıtursynulynyń qatty aıtqan sóziniń nátıjesinde ǵana qazaq avtonomııasyn qurý týraly másele sheshilgen. Ol daýǵa túspeıdi. Endi, osy belgilengen terrıtorııanyń naqty shekarasyn anyqtaý kerek degen sheshim tústi. Qazaq avtonomııasyn qurý jáne onyń terrıtorııasyn belgileý týraly jumys ýshyǵyp bara jatqanyn sezgen Lenın 12, 14, 18 jáne 19 tamyzdaǵy komıssııa otyrystaryn ózi basqarady. 24 tamyzda Lenın: «Qaýly daıyn. Álimhan Ermekovtiń qaıta baıandama jasaǵany durys. Osy boıynsha zańdastyrý kerek» dep sheshim shyǵarady. Osy sheshim qabyldanyp shyqqannan keıingi sátti Álimhan Ermekov esteliginde bylaı jazady: «Ózimniń tabysyma masattanyp, rıza bolyp shyqtym. Ol kezde bar-joǵy 29 jasta edim. Bizdiń delegaııa da qolymdy alyp jatty. Qarasam, Bókeıhanov joq eken. Bárimiz dálizge shyqtyq. Qazaqstannyń delegaııa quramy on besteı adam bolatyn. Bárimiz Álıhan Bókeıhanovty tostyq. Álekeń Lenınmen pikirlesip, áńgimelesip qalǵan bolatyn. On bes, jıyrma mınýttan keıin ol kisi de shyqty. Álıhan Lenınge bekitilgen shekaraǵa tezdetip qol qoıýǵa ótinish etipti, Lenın oryndaýǵa ýáde beripti».
Sonymen, jalpy otyrysta bekitilgen terrıtorııany qazaq avtonomııasynyń terrıtorııasy etip bekitken buıryq 26 tamyz kúni baspasózde jarııalandy. Mine, sodan bastap búgingi Qazaqstannyń terrıtorııasy qalyptasty.
Biz – táýelsiz memleketpiz. Táýelsiz memlekettiń shekarasy bekitilgen. Sonyń bekitilgenine toqsan alty jyl bolyp otyr. Táýelsizdiktiń ózi sonyń negizinde paıda boldy. Osyny aqparat quraldary nege aıtpaıdy? Bizdiń ulttyq merekemiz ǵoı. Ulttyq táýelsizdigimizdiń negizi ǵoı. Nege úndemeımiz? Biz tarıhymyzdy, tarıhtaǵy oqıǵalardy ulyqtaı bilýimiz kerek. Men úshin 1920 jyldyń 26 tamyzy – Alla jazsa, máńgilik azat Qazaqstan terrıtorııasynyń máńgilikke bekigen kúni, máńgilik saltanaty.
Saıyn BORBASOV, saıası ǵylymdarynyń doktory, professor:
Qazaq jerin jınaqtaǵan quryltaı
– Qazirgi Qazaqstan Respýblıkasynyń memlekettiliginiń tarıhı dástúrleri XV-XVIII ǵasyrlardaǵy Qazaq handyǵynan bastalady. Al, onyń qazirgi shekaralarynyń naqty belgilenýi Keńestik dáýirdegi saıası ózgeristerge baılanysty qalyptasqany aqıqat. Azamat soǵysy aıaqtala salysymen, Alash partııasynyń kósemderi jáne ultshyl zııalylar Keńes Odaǵy quramynda júrgizilgen ulttyq-aımaqtyq mejeleý jumystaryna belsene atsalysty. Qazaq halqynyń tarıhı qalyptasqan jerlerin onyń ıeliginde alyp qalýǵa kúsh saldy. Reseı Federaııasy quramynda qazaq avtonomııasyn qurý jolynda quramynda Alash qaıratkerleri men bolshevıkter kirgen Qazrevkom jumys istedi. Keńester men bolshevıktik partııanyń kósemi V.I.Lenınniń dekretimen qurylǵan Qazrevkom 15 aıdaı qyzmet etip, Qazaqstannyń aýmaqtyq tutastyǵyn qalpyna keltirý maqsatyn birinshi orynǵa qoıdy. Sebebi, qazaq jeriniń ońtústik aımaqtary Túrkistan avtonomııasy quramynda qalyp qoıýy, al soltústik aımaqtary Bashqurt-qazaq avtonomııasy quramynda qalýy, soltústik-shyǵys aımaǵynyń Reseı Federaııasynyń quramyna enip bólshektenýi qaýpi turdy. Sondyqtan, Qazrevkom músheleri qataryndaǵy ultshyldar patsha ókimeti bólshektep tastaǵan qazaq jerlerin biriktirý jolynda Qazaqstan Keńesteriniń Quryltaı sezin ótkizýdi qolǵa aldy. Quryltaıǵa daıyndyq barysynda bolashaq Qazaq respýblıkasynyń shekaralaryn anyqtaý jónindegi komıssııa Ahmet Baıtursynovtyń basshylyǵymen zor qyzmet atqardy.
Imperııalyq pıǵyldaǵy bolshevıktik basshylar ultjandy qaıratkerlerdiń qazaq jerin biriktirý jolyndaǵy qyzmetine bóget jasap baqty. Tarıhı ádilettilik úshin aıtýǵa kerek shyndyq bul iste Keńes úkimetiniń basshysy V.I.Lenın qazaq halqynyń ókilderin qoldady. Qazaq jeriniń birtutas avtonomııa quramyna jınalýyna A.Baıtursynovpen birge Álimhan Ermekov, Álıhan Bókeıhanov, Seıitqalı Meńdeshev, Smaǵul Sádýaqasov, Sáken Seıfýllın, Álibı Jankeldın, Halel Ǵabbasov t.b. qaıratkerler úles qosty. Sonymen birge, bul jumystar saıası-taptyq tartystar jáne qaıshylyqtar jaǵdaıynda júrdi. Jetisý, Syrdarııa, Oral, Torǵaı, Semeı, Aqmola, Bókeı ordasy, Túrkistan, Astrahan qazaqtary bir avtonomııa quramyna enýge nıet etti. Qazaq halqynyń maqsatyna oraı 1920 jyly 26 tamyzda V.I.Lenın men M.I.Kalının qol qoıǵan Keńestik federaııalyq soıalıstik memleket RKFSR quramynda Qyrǵyz (Qazaq) Avtonomııaly Keńestik Soıalıstik Respýblıkasyn qurý týraly Dekreti shyqty. Astanasy bolyp Orynbor qalasy bekitildi. Qazrevkom quramy qaıtadan qaralyp, oǵan V.A.Radýs-Zenkovııa, I.D.Martynov, V.Pokrovskıı, S.Avdeev, A.Baıtursynov, S.Seıfýllın, H.Ǵabbasov t.b. endi.
Eń bastysy, qazaq ultynyń tarıhı ıelik etip kelgen jerleriniń basym bólshegi QazAKSR quramyna engizilgeni jarııa etildi. Qyrǵyz (Qazaq) AKSR qaramaǵyna 1917 jylǵa deıingi shekara belgisindegi Aqmola oblysynyń Aqmola, Atbasar, Kókshetaý, Petropavl ýezderi jáne Omby ýeziniń bir bóligi, Semeı oblysynyń Zaısan, Semeı, Pavlodar, Óskemen, Qarqaraly ýezderi, Torǵaı oblysynyń Aqtóbe, Yrǵyz, Torǵaı ýezderi, Oral oblysynyń Gýrev, Lbishin, Temir, Oral ýezderi endi. Sonymen qatar, Mańǵystaý ýezi, Bókeı ordasy, Astrahan gýbernııasynyń Sınemore oblysy, birinshi, ekinshi Prımorskıı okrýginiń qazaqtar qonystanǵan ýezderi de kirgizildi. 1920 jyly kúzde el aýmaǵy 1 mln 871 myń sharshy versti qamtyp, halqynyń sany 5 mln 46 myń adam boldy. Bul halyqtyń 46 paıyzdan astamy qazaqtar bolatyn.
Aıta ketetin jaǵdaı, Jetisý men Syrdarııa oblystary QazAKSR quramyna tek 1924 jyly Túrkistan KASR quramynan shyǵarylyp qaıtaryldy. Al, Aqmola men Semeı oblystary Sibir revkomynyń quramynan tek 1921 jyldyń basynda qaıtaryldy. 1925 jylǵa deıin QazKASR astanasy Orynbor qalasy bolyp, 1920-1925 jyldar aralyǵynda Qazaqstandaǵy ulttyq-aýmaqtyq mejeleý jumystary aıaqtalady. Qazaq jeriniń Qazaq KASR quramyna qosylýy qazaq halqynyń paıdasyna sheshilgenin ataǵan joq. Azamat soǵysy, 1921-1922 jyldardaǵy asharshylyq, qýǵyn-súrgin jaǵdaıyndaǵy alapat qıynshylyqtarǵa, qyrylýǵa qaramastan, qazaq ultshyl qaıratkerleri qazaq jerin jınaqtaý maqsatynda zor tarıhı mańyzy bar jumys jasady. Qazaqstannyń ulttyq-memlekettik terrıtorııasyn 8 gýbernııanyń quramynda bolǵan 41 ýezd jasady. Olar: Bókeı gýbernııasynan Talovka, Orda, Jańaqala, Teńiz ýezderi; Oral gýbernııasynan Oral, Elek, Jympıty, Kamykov, Gýrev, Azat ýezderi; Aqtóbe gýbernııasynan Aqbulaq, Aqtóbe, Temir, Yrǵyz, Shalqar ýezderi; Qostanaı gýbernııasynan Fedorov, Borovskıı, Qostanaı, Ýrıkıı, Denısov, Torǵaı ýezderi; Aqmola gýbernııasynan Petropavl, Cherlakskıı, Kókshetaý, Atbasar, Aqmola ýezderi; Semeı gýbernııasynan Semeı, Pavlodar, Óskemen, Buqtarma, Zaısan, Qarqaraly ýezderi; Syrdarııa gýbernııasynan Qazaly, Aqmeshit, Túrkistan, Áýlıeata, Shymkent ýezderi; Jetisý gýbernııasynan Almaty, Taldyqorǵan, Lepsi, Jarkent ýezderi endi.
Gýbernııalar men ýezder ataýlaryna qarap otyrsaq, Qazaq KASR qurylýymen bastalǵan tarıhı mańyzy bar úrdis búgingi Qazaqstannyń terrıtorııalyq-aýmaqtyq jáne memlekettik shekarasyn jasap bergen úrdis ekendigin anyq baıqaımyz. 1920 jylǵy 26 tamyzda Qazaq KASR qurylýynyń qazaq halqynyń damýyna tıgizgen eń basty tarıhı yqpaly – osynda.
Talas OMARBEKOV, tarıhshy:
Alǵysty alash qaıratkerlerine aıtaıyq
– Qazir keıbir ǵalymdar, zııaly qaýym ókilderi istiń baıybyna barmaı, tarıhtyń uńǵyl-shuńǵylyna úńilmeı jatyp, «Qazaqtyń shekarasyn Lenın syzyp bergen, alǵysty soǵan aıtaıyq» dep jatady. Shyndyǵy solaı ma edi? Joq. Eń birinshi, raqmetti alash qaıratkerlerine, bolshevıkterdiń arasynda júrse de, «ultym, elim, jerim» degen qarakóz azamattarymyzǵa aıtýǵa tıispiz. Alǵash qabyldanǵan dekretke Orynbor gýbernııasy enbeı qaldy. Qazir kóp eshkim bile bermeıtin sol kezde Ahmet Baıtursynovtyń Lenınge jazǵan haty bar. Hat Elbasynyń muraǵatynda saqtaýly. Ol hatta Ahmet Lenınge Orynbordy Qazaq avtonomısynyń quramyna berýdi suraǵan. Nege deseń, ol aımaqta qazaqtar asa kóp shoǵyrlanǵan edi. Osyndaı usynys bolǵandyqtan, Ahańnyń bul hatyn áli kúnge jarııalaı alǵan joqpyz. Óıtkeni, el arasynda túsinispeýshilik týyndap ketýi múmkin. Tipti táýelsizdikke ıe bolǵan soń, keıbir orys tarıhshylary «sizderdiń Baıtursynovtaryńyz Soltústik Qazaqstannyń biraz jerin Reseıge bereıik dep usynys jasaǵan» degendi shyǵaryp alyp, iritki salýǵa deıin bardy emes pe? Shyndyǵynda, Ahań «Orynbordy bizge ber» dep, onyń óteýine Petropavldiń mańaıyndaǵy keıbir jerdi alýyn ótingeni ras. Bul – jeke Ahmet Baıtursynovtyń pikiri emes, sol kezdegi alash qaıratkerleriniń ortaq pikiri edi. Eger de Orynbor qazaq eline qarasa, sol óńirdegi túrki tektes eldermen tyǵyz baılanys ornaıtyn edi. Ortada shekara bolmaıdy. Túrki tektes elder (bashqurt, tatar t.b.) qarym-qatynasy kúsheıedi. Salmaǵy artar edi. Osy Ahmettiń hatynyń áseri boldy ma, álde ózge de alash qaıratkerleriniń pikiri yqpal etti me, arada aı ótpeı jatyp, sol 1920 jyldyń qyrkúıeginde Qazaq avtonomııasy men onyń aımaqtyq-terrıtorııalyq mejesine ózgertý engizilip, oǵan Orynbor kirgizildi. Tipti Orynbor Qazaq avtonomııasynyń astanasy bolyp bekitildi. Alaıda, qazaq avtonomııasymen Edil boıynda jatqan ózge túrki jurtynyń yntymaǵy artyp bara jatqanyn kórgen ári bolshaqta bul óte qaýipti ekenin sezgen bolshevıktik bılik 1925 jyly Orynbordy qaıtadan Reseı quramyna engizip jibergeni belgili. Jalpy, qazaq avtonomııasyn qurýda, onyń aımaqtyq-terrıtorııasyn belgileýde qazaq zııalylarynyń orny erekshe. Ózge máselede olardyń pikiri qaq jarylǵanymen, jer máselesine kelgende, ortaq kózqarasqa toqtady. Sondaı aýyzbirshiliktiń arqasynda qazaqtar mekendegen jerlerdiń bári Qazaq eliniń quramyna engizildi. Al endi «osy máseleler búgingi kúnge deıin nege ashyq aıtylmady?» degenge kelsek, sol kezdegi hattamalardyń kóbi qupııa bolyp keldi. Alashorda basshylarynyń aıtqandaryn, jazysqan hattaryn jarııalaýǵa tyıym salyndy. Sondyqtan tarıhshylarymyz oılaryn ashyq aıta almady. Endi ǵana qupııa hattamalarǵa qol jetkizip jatyrmyz. Aldaǵy ýaqytta 1920 jyldyń shilde-tamyz aılarynda Qazaq elin qurýǵa talpynys jasap, basyn qaterge tikken alash qaıratkerleriniń eńbekteri talaı aıtylady dep oılaımyn.
"Aıqyn"