(tájtajal pandemııasynan qaza bolǵandardyń rýhyna arnaımyn)
I
Kúrk-kúrk jótel tynbaı qoıdy-aý kúrkildep,
Tereń tynys alsa, shirkin, múmkin bop!
Sezip jatyr, bilip jatyr osymen,
Jaryq ómir barady uzap, birtindep.
Tátti ómirdiń taýsyldy ma jyr-áni,
Jaıqalǵan tal bir-aq sátte qulady.
Syr-syr etip syryldaıdy ókpesi,
Shyń-shyń etip shyńyldaıdy qulaǵy.
«Juqpaly aýrý jabystyń ba sorym bop.
Qaıdan keldi mynaý jurtqa joq indet?!
Naýqas sany mınýt saıyn kóbeıip,
Aınalada ıne shanshar oryn joq».
Kóz aldynda ótken kúnniń tizbegi,
Shirkin, sol shaq qandaı ǵajap izgi edi!
Letıııa – «Baqyt» degen sóz edi,
Ol ózi de eń baqytty qyz ba edi!
Ystyǵyn-aı baqyt deıtin qushaqtyń,
Ushqyryn-aı ómir deıtin ushaqtyń.
Ótken kúnder deıdi-aý, baıǵus, sondaǵy,
Sol ýaqyttyń jyljyǵany úsh-aq kún...
II
Kóne shahar, sulý shahar kóz arbap,
Jigit qyzǵa úzdigedi sóz arnap.
Áne, shirkeý qońyraýynan shyqqan ún –
Qus bop ushyp ǵashyqtarǵa qonar baq!
Rıkkardo edi esimi bul jigittiń,
Rıkkardoǵa búgin jaqtas tunyq tún.
Yntyq bolǵan saǵynyshyn óbedi,
Janarynda jasyny oınap úmittiń.
– Letıııa, seni sheksiz súıemin,
Men beıbaqtyń sensiz qalǵan kúıi – ólim.
Kúledi qyz:
– Men de súıem, kýá anaý –
Santa -Marııa Modjero kıelim!
Qos ǵashyqtyń qýanyshy araılap,
Shattyq kúıin shertip jatty bar aımaq.
Bergamonyń kezip ketti kóshesin,
Qos júrekten Donıettı sazy oınap!
Bergamonyń túni ǵajap maqpaldaı,
Aı qaraıdy jolǵa jaryq jaqqandaı.
Sylq-sylq kúlip Kontarını fontany,
«Rıkardo men Lıtıııa» dep jatqandaı.
III
Dertti Italııa nurly tańy alystap,
Keýdelerden áli qansha jan ushpaq?!
Jer aýmaǵy etikke uqsas bul eldi,
Indet kezdi etigimen janyshtap.
Kemseńdeıdi jylaı almaı káriler,
Tunshyǵýda, býlyǵýda zaryna el.
Dármensizdik janyn órtep qınalǵan,
Baıyz tappaı júr Rıkkardo-dáriger.
«Sónip jatyr janarlarda myń juldyz,
Sebimiz joq, emimiz joq biz kimbiz?!
O, Qudaıym, bul ne qylǵan oıynyń,
Bir táýlikte ólgen adam – myń bir júz!.
Ne bop ketti meniń sorly ǵasyrym?!»
Jylap ta alǵan ońashada jasyryn.
Odan keıin kúıip ketti bul baıǵus,
Kórgen sátte dert juqtyrǵan ǵashyǵyn.
Letıııany ap kelgende zembilmen,
Ózin-ózi «ol emes» dep sendirgen.
Qorqynyshyn jaspen jýyp amalsyz,
Ine ushynda tamshy-úmitke jeńdirgen...
IV
Kókiregi ýdaı ashyp kúıikten,
Ár sát saıyn qulap jatyr bıikten.
Letıııa kózin ashty aqyryn,
Shirkin, ómir, netken ǵajap, súıikti eń!
Birazdan soń bolaryn da jaryq tul,
Sezedi ishi, bári bitti –anyq bul.
Dál janynda tumshalanǵan dáriger,
Rıkkardosy!
Tulǵasynan tanyp tur.
Qaıǵy torlap bula júzin symbatty,
Álsiz daýys úzip-úzip til qatty:
– Tastap ketem, uzap ketem men senen,
Keshir meni, keshire kór qymbattym.
Jaqyndama, jaqyndama ótinem,
Qushtym seni júregimniń otymen.
«Jarym bolsań, bala súısem» deýshi ediń,
Sol armanǵa jetkizbedim, ókinem.
Jaqyndama, juqtyrarsyń, kelme kóp,
Sen aýyrma, Otanyńa ber kómek.
Jas arýdyń kirpiginen qos tamshy,
Samaıyna aǵyp tústi dóńgelep.
– Olaı deme, jazylasyń...
– Tura tur...
Aıaqtaýǵa múmkindik ber... myna til...
saý turǵanda aıtyp qalsam dep edim...
...pandemııa kelmeı turyp surapyl –
Esińde me barǵanymyz Rımge,
Kolızeıde mańdaıymnan súıdiń de:
«Gladıator bolsam shirkin!» dep ediń,
Sondaı ańǵal, ári armanshyl kúıińde.
Ol zamandy izdeý – qate alystan,
Men onymen áldeqashan tabysqam.
Aq halatty Gladıator, ol – sensiń,
Arenada arystanmen alysqan!
Sorly jigit ókirýge shaq turdy,
Súıgeninsiz bolmaq emes baq qundy.
Sheship tastap kózáınegin, qolǵabyn,
Julyp alyp, betperdesin laqtyrdy.
– Men birgemin, Letıııa, muńdanba,
Ne qylmaqpyn sensiz tiri turǵanda?!
Gladıator bolý degen – aldymen,
Ǵashyǵy úshin bara bilý qurbanǵa!
O, mahabbat, máńgi tiri, máńgi uǵym,
Eshkim ólshep bere almaıtyn dáldigin!
Eki ǵashyq sońǵy márte súıisti,
Súıip turdy...
Bilip turdy taǵdyryn...
*Ti amo – ıtalıansha «men seni súıem» degen sóz.
*Bergamo – Italııadaǵy qala
*Santa -Marııa Modjero – shirkeý
* Donıettı – Bergamolyq kompozıtor
* Kontarını – Bergamo qalasyndaǵy áıgili fontan
Qýanysh Ospan
Kókshetaý
