Qazaqstan mūsylmandar dıni basqarmasy qauıptı jūqpaly aurulardan qaitys bolǧan adamnyŋ mäiıtın jerleuge qatysty jaŋa pätua bekıttı. Tızımde Covid-19 infeksiiasy da bar.
Şariǧat boiynşa qaitys bolǧan mūsylmandy juyndyru, kebındeu, oǧan janaza namazyn oqu jäne jerleu – paryz. Qazaqstan mūsylmandar dıni basqarmasynyŋ keŋesı öte qauıptı jūqpaly (tuliaremiia, ebola, koronavirus, oba t.b.) aurulardan qaitys bolǧan adamdardyŋ mäiıtterın juyndyruǧa jäne jerleuge qatysty tömendegı şaralardy jüzege asyrudy maqūldady:
Mäiıttı juyndyru
Öte qauıptı dertten qaitys bolǧan adamdy juyndyru räsımı arnaiy memlekettık mekemenıŋ sanitariialyq-epidemiologiialyq talaptaryna säikes jüzege asuy tiıs. Mäiıthanada juyndyru şarasy şariǧat talabyna qaişy kelmese, mäiıttı qaita juyndyru şart emes.
Mäiıttı kebındeu
Şariǧat talaby boiynşa, mäiıt kebındeluı mındet. Er kısı 3 qabat matamen, al äiel 5 qabat matamen kebındeledı. Alaida, jūqpaly dertke şaldyǧyp qaitys bolǧan kısıge kebındeu ısı, sanitarlyq qaǧidalardy saqtaityn arnauly qyzmetkerdıŋ tarapynan jasalady. Sondyqtan, mäiıthanada kebındelgen mäiıt şariǧatqa sai bolsa, qaita kebındeu şart emes.
Janaza namazyn oqu
Qauıptı ındetke bailanysty jariialanǧan tötenşe jaǧdaida janaza namazyna marqūmnyŋ eŋ jaqyn tuystarynyŋ qatysuy jetkılıktı. Saqtyq şaralary üşın adam sanyn barynşa azaitu kerek. Qalalyq jaǧdaida ındettıŋ qoǧamdyq ortaǧa (köpqabatty üi tūrǧyndaryna, körşılerıne t.b) taralmauy üşın marqūmdy mäiıthanadan tıkelei zirat basyna aparyp, sol jerde janaza namazyn oqyp, jerleuge şariǧatta rūqsat etılgen. Janaza räsımderın jergılıktı imam atqarady. Namaz oqyǧan kezde sanitarlyq normaǧa sai mäiıt imam men jamaǧattan qaşyq jerge qoiylady.
Mäiıttı jerleu
Mäiıttı ziratqa densaulyq saqtau mekemesınıŋ mamandary arnaiy kölıkpen jetkızedı. Qabır epidemiologiialyq normaǧa sai qazyluy tiıs. Mäiıttı jerleu räsımınde bioqauıpsızdık şaralary qataŋ saqtaluy tiıs. Jerleudıŋ barlyq räsımın medisina mamandary jüzege asyrǧany abzal. Sanitariialyq-epidemiologiialyq mekemesınıŋ rūqsatynsyz mäiıttı üiıne nemese basqa meken-jaiǧa (özge qala, tuǧan jerıne) aparmaǧan dūrys. Mūndaǧy maqsat – jūqpaly ındettıŋ özge aimaqtarǧa taraluynyŋ aldyn alu.
Eger sanitariialyq-epidemiologiialyq mekemesı tarapynan mäiıttı şariǧat jolymen juyndyruǧa, kebındeuge rūqsat berılmese şariǧattyŋ zärulık ükımı negızge alynady. Mäiıthanada oralǧan mata, arnaiy qap nemese tabyt aşylmastan jerlenedı. Janaza namazy mäiıtten alys tūryp oqylady.
