6 säuırden bastap elımızdegı mektepter qaşyqtyqtan bılım beru jüiesıne köşuı tiıs. Alaida būl mäsele Jambylda «jügı jeŋıl esektıŋ» kerın keltırıp tūrǧandai. Sebebı audan äkımderı aqparattaǧy aqparatty jatqa soǧyp, tüitkıldıŋ tüiının tarqatudy emes, qūmǧa basty tyǧudy oilauda. Būl jaiynda oblys äkımı Berdıbek Saparbaevtyŋ töraǧalyǧymen ötken jiynda basa aityldy. Būl turaly "Aiqyn.kz" habarlaidy.
Juyrda Baizaq audanyna jūmys saparymen barǧan oblys äkımı jergılıktı mektepterdıŋ bırıne bas sūǧyp, bırqatar jaitty barlaǧan. Alaida tozyǧy jetken partalar men taqtalarda balalardyŋ älı künge sabaq oqyp jatqanyna közı jetken aimaq basşysy, internet turaly sūraudyŋ özıne ūialǧan. Mıne, osy jaitty jiynda Berdıbek Maşbekūly syn tezıne aldy.
– Közboiauşylyqpen ainalysudy toqtatyŋyzdar. Naqty ahualdy körsetıŋızder. Äitpese, bız jaǧdaidy jaqsarta almaimyz.
Tarazǧa tiıp tūrǧan Baizaq audanyndaǧy mekteptıŋ jaiy osyndai bolsa, onda şalǧai aumaqtar turaly ne aituǧa bolady? Memleket basşysynyŋ qaşyqtyqtan oqytuǧa köşu turaly tapsyrmasyn qalai ıske asyramyz? – dep oblys äkımı aşuǧa mındı.
B. Saparbaevtyŋ aituynşa, öŋırdıŋ bılım sapasy syn kötermeidı, al qaşyqtyqtan oqytudy engızgennen keiın onyŋ tıptı tömen deŋgeige qūldyrap ketu qaupı bar.
Taldau körsetkendei, köptegen audan mektepterınde kompiuterler men monoblok jetıspeidı, al 125 auyldyq eldı meken internetpen qamtamasyz etılmegen.
Saiathan Satylǧan, Jambyl oblysy.
