Koronavırýs pandemııasyna baılanysty elimizde dinı mekerelerdi toılaýǵa tyıym salynady. Bul týraly aqparat jáne qoǵamdyq damý mınıstri Dáýren Abaev aıtty, dep habarlaıdy Tengrinews.kz.
Mınıstrdiń aıtýynsha, sáýir aıynda qazaqstandyqtar úshin mańyzdy birqatar mańyzdy dinı meıram bar.
"Olar - oraza, pravoslav, katolıkterdiń pashasy, ıahýdeılik pesah jáne taǵy basqa. Sózsiz olardyń barlyǵy kóptegen azamatqa úlken mańyzy bar. Biz din ustanýshy azamattarymyzdyń dinı senime zor qurmetpen qaraımyz. Alaıda koronavırýs indeti barlyq adamnyń densaýlyǵyna, ómirine qaýip tóndirip otyr. Sondyqtan kóptegen el epıdemııaǵa qarsy buryn-sońdy bolmaǵan shekteýler engizip jatyr. Vırýs taralmaýy úshin adamdar jınalatyn barlyq sharaǵa, onyń ishinde dinı sharalarǵa da ýaqytsha tyıym salynady. Sebebi, bul dinı sharalar kezinde ǵıbadat oryndarynda týystary jáne jaqyndarymen jınalady. Birge mazar basyna barady", - dedi ol onlaın-brıfıngte.
Osy oraıda Dáýren Abaev dinı meıramdar kezinde karantın rejımin buzbaý qajetin atap ótti.
"Qazirgideı kúrdeli ýaqytta eń basty másele – adamnyń densaýlyǵy men amandaǵy. Eshqandaı din adam ómiri men densaýlyǵyna qaýip tóndirgendi maquldamaıdy. Osy rette barlyq dinı jáne etnomádenı uıymdardyń basshylary men azamattaryn túsinistik tanytýǵa shaqyramyz. Dinı meıram kezinde karantın rejımin saqtaýdy suraımyz. Dinı birlestikte merekelik dinı rásimderdi onlaın rejımde ótkizýge usynamyz", - dedi mınıstr.
Osyǵan deıin qorǵanys mınıstri qazaqstandyqtardyń nege áskerge shaqyrylǵanyn túsindirip, olardyń nemen aınalasytynyn aıtyp bergen. 2 sáýirde Qazaqstan Prezıdentiniń áskerı mindettilerdi arnaıy jıyndarǵa shaqyrý týraly qaýlysy jarııalandy.
Aıta keteıik, elimizde koronavırýs juqtyrǵandardyń sany 453-ke jetti. 29 naýqas aıyqty, 3 adam qaıtys boldy.
Sondaı-aq, búgin Nur-Sultan men Almatyda demalys aptasy uzardy.
Eske salaıyq, 16 naýryzdan bastap elimizde tótenshe jaǵdaı jarııalandy. Al 19 naýryzda Nur-Sultan men Almaty qalalary karantınge jabyldy.
