"Teŋızşevroil" vahta jūmysşylary "virus jūqtyrǧandardy" äkeluge qarsylyq bıldırdı.
Atyrau oblysynyŋ Jylyoi audany aumaǧyndaǧy "Teŋızşevroil" kompaniiasynyŋ vahtalyq poselkesındegı "Bolaşaq" lagerınıŋ jūmysşylary lager aumaǧyna "koronavirus jūqtyryp, karantinde jatyp şyqqan" adamdardy äkeluge narazylyq tanytty. "Teŋızşevroil" kompaniiasynyŋ baspasöz qyzmetı, olardyŋ vahta auysymy bıtıp, ketıp bara jatqan qyzmetkerler ekenın, koronavirus jūqtyrmaǧanyn aitady.
"Teŋızşevroildyŋ" vahtalyq jataqhanasyndaǧy jūmysşylar narazylyǧy 19 säuırde tün ortasynda Facebook äleumettık jelısı arqyly tarady. Video tüsırıp, ärı kommentarii jasap tūrǧan adam "Būl - Tenızdıŋ "Bolaşaq" jataqhanasyndaǧy aiqai-şu. Emdelıp, karantinde jatyp şyqqan adamdar körınedı" deidı.
Videoda narazy jūmysşylardyŋ "Qabyldau bölmesı" dep jazylǧan ǧimarattyŋ aldynda narazylyq bıldırıp tūrǧany baiqalady.
"Teŋızşevroil" kompaniiasynyŋ baspasöz hatşysy Erlan İsliamovtyŋ Azattyqqa aituynşa, "Bolaşaq" lagerınde vahtalyq auysymmen jūmys ıstep jatqan adamdar jaǧdaidy dūrys tüsınbegen. Jūmysşylar "ekspress testıleuden ötıp, "Bolaşaqtaǧy" blok ışınde üilerıne ketetın kölık kütıp otyrǧan ärtürlı merdıger mekemelerdıŋ qyzmekterlerın "koronavirus jūqtyrǧandar" dep oilaǧan".
- Alaŋdaityn eşteŋe joq. Olar koronavirus jūqtyrǧandarmen qarym-qatynasta bolmaǧan adamdar jäne endıgı üilerıne ketıp te qaldy. Naqty sanyn aita almaimyn. Män-jaidy tüsındırgen soŋ jūmysşylar tarap kettı, - dedı ol.
Būǧan deiın "Tengizşevroildyŋ" "Vaternas" vahtalyq poselkesınde bır adamnyŋ virus jūqtyrǧany belgılı bolǧan edı. Būl turaly Atyrau oblystyq äkımdıgınıŋ ışkı saiasat basqarmasynyŋ bastyǧy Jasūlan Bisembiev öz paraqşasynda TŞO-nyŋ resmi jauabyn jariialady. Onda 17 säuırde Teŋızde vahtalyq auysymmen jūmys ıstep jatqan qyzmetkerlerdıŋ bırınıŋ suyq tigenge ūqsaityn belgılermen vahtalyq poselkedegı medisina bölımşesıne şaǧymdanǧany aitylǧan. 19 säuırde alynǧan test qorytyndysy onyŋ COVID-19 virusyn jūqtyrǧanyn rastaǧan.
"Ol jūmysşy qazır Atyrau qalasyndaǧy infeksiialyq auruhanada emdelıp jatyr. Ol jürgen ǧimarat tolyq dezinfeksiialandy. TŞO-daǧy öndırıstık jūmystar ıstep tūr» deidı baspasöz habarlamasynda.
"Teŋızşevroil" kompaniiasy Atyrau oblysyndaǧy Qazaqstannyŋ ırı ken oryndarynyŋ bırı - Teŋız kenışın 1993 jyldan berı igerıp keledı.
"Azattyq" radiosy
foto aşyq internet közınen
