"Aptasyna 100 dollar beretin": Búrkit án áleminde qalaı kóterilgenin aıtty

3459
Adyrna.kz Telegram

Ánshi Búrkit «Nıet» telejobasynyń Instagram jelisinde tikeleı efırge shyǵyp, kókeıdegi suraqtarǵa jaýap berdi. Otandyq shoý-bıznestegi tanymal tulǵalardyń biri prezıdentke úndeý joldap, karantın merzimin meıilinshe qysqartý kerektigin aıtqan bolatyn. Ánshi osy jáne kókeıde júrgen ózge de mańyzdy suraqtarǵa toqtaldy dep jazady Adyrna.kz.

«Karantın kóptegen otbasyǵa ońaı tıip jatqan joq. Sol sebepti, shamamyz kelgenshe turmysy tómen januıalarǵa kómek kórsetýdemiz. Meniń Instagram-daǵy paraqshama kómek surap, hat jazatyndar kóp. Biraq men óz kózim jetken jandarǵa qol ushyn sozǵandy jón kórem. Osyǵan deıin Almatynyń biraz buryshyn aralap, jaǵdaıy qıyn januıalarǵa azyq-túlik tarattym. Bul is-áreketimdi elge kórsetýimniń sebebi joq emes. Biz halyq aldynda júrgen soń, árbir qadamymyzdy el bilip otyrady. Eshkimge aıtpaı, ózime jáne Allaǵa ǵana aıan etip, qaıyrymdylyq jasaýyma bolady, árıne. Biraq osy kezde halyq meni kinalaı bastaıdy. «El basyna aýyr jaǵdaı týǵanda ne úshin halyqqa járdem bermeısińder» dep jazǵyrady. Sondyqtan, jarııa sadaqa jasaýdy jón kórdim», - deıdi ánshi.

Sondaı-aq, Búrkit ánshiler kómek kórsetýge mindetti degen pikirdiń orynsyz ekenin aıtty.

«Mundaı jaǵdaıda judyryqtaı jumylyp, shamamyz kelgenshe kómektesken durys. Biraq kómek bermediń dep ánshilerdi kinálaýǵa bolmaıdy. Árkim óz hali jetkenshe kómek bersin. Kómek bere almaıtyndar da bar. Eshkim eshkimdi mindettemeýi qajet», - deıdi ol.

Suhbat barysynda otandyq juldyz aldaǵy bolýy múmkin daǵdarysqa toqtalyp, óz basyndaǵy qıyn kezderdi jáne óziniń qalaı kóterilgenin de áńgimeledi.

«Daǵdarys bolyp jatsa, áıteýir bir istiń kózin tabarym anyq. Qolymyzdan birshama is keletin jigitpiz. Máselen, 2008 jylǵy daǵdarys kezinde ánshilerge qıyn soqty. Eshqandaı toı joq, konertter joq. Sol zamandarda avtokólik jýyp ta qıyndyqtan óttik. Sondyqtan, eki qolǵa bir kúrek tabylary anyq. Dál qazir bıznesim joq. Bárin satyp jiberdim. Óıtkeni, ónerge kóp ýaqyt kerek. Al osy kúnge jetýime birinshi sebep bolǵan - ózimniń ynta-jigerim. Úıdiń kishisi bolsam da, ata-anam armanymdy oryndaý úshin Almatyǵa jiberdi. Án aıtsam, ánshiler tobyn qursam dep armandaıtynmyn. Osy kúnge úlken eńbektiń arqasynda jettim. Árıne, qaltaly aǵalarymnan da kómek boldy. Olar shetelde, aptasyna 100 dollardan berip turatyn. 1995-1998 jyldar aralyǵynda bul úlken aqsha», - dedi ol.

Pikirler