Maıra Ilııasova: Halyqty aldaýǵa bolmaıdy!

3588
Adyrna.kz Telegram

Osy apta "lotereıa daýynan" áleýmettik jeli  eki ıininen áreń dem alyp tur. Ańyzy bar, aqıqaty bar alyp qashpa áńgime de tolastar emes. Sanaly ǵumyryn sahnada ótkizip kele jatqan, ónerdiń ystyǵyna kúıip, sýyǵyna tońǵan QR eńbek sińirgen ártisi Maıra Ilııasovaǵa habarlastyq. Sońynan ergen baýyrlary men sińlileriniń bul daýǵa qalaı urynǵanyn, Aınur, Quralaı, Qaraqat bastaǵan sińlileriniń lotereıa ótkizetindigine, jalpy lotereıa oıyndaryna kózqarasy qalaı ekenin suraǵan edik. Jurtshylyq syrtynan "estradanyń Anasy" atandyrǵan Maıra apaıymyz bálsinbeı, óz pikirin bildirdi.

- Sálemetsizder me?! Sizderdiń qoıǵan suraqtaryńyzǵa qaraı endi bilgenimshe jaýap bereıin. Men ózim eshqaısysynyń oıyndarynda bolǵan joqpyn, qatysqan joqpyn. Biraq, estip júrem. Negizi qaısynyń qalaı bolǵanyn da ókinishke oraı men bilmeıdi ekenmin. Ernar Aıdardy ózim birinshi ret keshe teledıdardan kórsetip jatqan kezde kórip, ózim tań qalyp qaldym. Sonymen birge Ernardan basqa Dana Kentaı degen ánshi de osyndaı oıynǵa jarnama jasaǵan eken, sony kórsetkenin kórip qaldym.

Al endi  ishinde bolmaǵannan keıin lotoreıa oıyny jaıly, qatyspaǵannan keıin birdeńe aıta qoıý qıyn. Biraq, meniń ózimniń oıymsha aldanyp jatqan adamdar bar bolsa nemese birdeńe durys bolmaı jatsa, ár adam lotoreıa alǵan kezde oılaný kerek. Bul ne nárse dep, birinshi ony kórý kerek, tekserý kerek. Bizde kóbinese eshteńeni oılamaı, jurttyń aıtqanyna birinen keıin biri birden «aýyz áńgime» estip, aqshalaryn salyp, sodan keıin mashına birdeńe oınatylyp jatsa «Áı osy, alyp qalsam, men osy utyp qalam ba?» dep, qazaq aıtatyn «esek dámemen» alatyn shyǵar. Sondyqtan bul jerde qazir  anaý oınatty, mynaý oınatty dep, bizdiń ánshilerdi kinálaý, menińshe, durys emes. «Qalaýyn tapsa, qar janady» deıdi. Men biraq bul qyzdardyń oıyndarynyń durys bolǵanyn estidim. Ý- shý shyqqan joq, Qaraqattyń burynǵy úıin kóp balaly ana aldy, Aınurdyń da úıin alty balasy bar áıel adam alǵanyn estidim. Quralaıdikin estimedim oınaǵanyn.

Al endi myna jerde Ernarǵa baılanysty BAQ jazyp jatyr, ótirik oınaǵan, utqan da, utamyz degender de podstavnoı lıo. Bul endi árıne, durys emes. Bul uıat nárse. «Urlyqshynyń quıryǵy bir-aq tutam» deıdi. Erte me, kesh pe, teris nárse jasasań, Alla asyqpaıdy ǵoı, Alla aldyńnan shyǵarady. Men ózim soǵan senemin. Sondyqtan, bundaı iske barýǵa bolmaıdy. Halyqty aldaýǵa bolmaıdy. Bizdiń qazaq halqy jalpy ańqaý halyq, birdeńege tez sene salady. Tez baıyp ketemin dep oılaıdy. Sol mashınany lotoreıadan ózim utamyn dep oılaıdy. Sondyqtan, ózińniń ánińdi tyńdap, saǵan qoshemet kórsetip júrgen kórermenderge mynandaı jasaý, ol árıne, durys emes. Eger jańaǵy Ernar týraly aıtylǵan nárseler shyn bolsa, ol endi uıat nárse. Al endi ótirik bolsa, oǵan ózderi jaýap bere jatar.

Jalpy, mundaı oıyndardy jan-jaqta, shet memlekette estımin. Eger ol júıe-júıesimen, úkimettiń qadaǵalaýynda, salyǵyn tóleıtin, bir júıege qoıylǵan nárse bolsa, nege oınamasqa?! Oınasyn. Odan menińshe, sondaı bir artyq óreskeldik kórip turǵan joqpyn. Biraq, onyń bári kim oınatsa da, kim oınasa da bárin oılanyp jasap, aqylmen, zańmen bári durys bolý kerek dep oılaımyn.

- Pikirińizge kóp raqmet!

"Adyrna" ulttyq portaly

Pikirler