Túrkistan oblysy Maqtaaral aýdanynyń eki aýylyn sý basty. Bul týraly óńirlik kommýnıkaııalar qyzmeti habarlaıdy..
Búgin, 2 mamyr tańǵy saǵat 04:30-da Maqtaaral aýdanynyń shekarasyndaǵy Ortalyq dalalyq kollektorynan (ótkizý qýaty - sekýndyna 120 tekshe metr) sý tógilip, Jeńis jáne Jańa turmys aýyldaryn sý alyp ketken.
«Sondaı-aq oblystyq mándegi «Myrzakent - Jeńis - Jańa turmys» tasjolyn sý basqan. Kólik júrýi múmkin emes» delingen habarlamada. Qazirgi tańda apattyq-qutqarý jumystary júrip jatyr.
Aıta keteıik, buǵan deıin Jańa turmys, Jeńis, Nurly jol eldi mekenderiniń turǵyndary aýdan ortalyǵy Myrzakentte ornalasqan Myrzakent mektep-gımnazııasyna (600 oryn), S.Rahymov atyndaǵy jalpy orta mektebine (700 oryn), Pýshkın (400 oryn), Abylaıhan orta mektepterine (500 oryn) evakýaııalanyp, oǵan 6 avtobýs jumyldyrylǵan bolatyn.
Maqtaaral aýdanynyń ákimi, aýdandyq tótenshe jaǵdaı shtabynyń tóraǵasy Baqyt Asanovtyń tóraǵalyǵymen 2 mamyr túngi 00:00-de arnaıy jıyn ótip, tótenshe jaǵdaı jarııalaý jóninde tapsyrma berildi. Eske sala keteıik, keshe Ózbekstanda Sardoba sý qoımasynyń bógeti jarylyp, eldi mekender, kommýnıkaııalyq jeliler men egistikterge zaqym kelgen bolatyn.
