QR Premer-Mınıstri Asqar Mamın Túrkistan oblysy Maqtaaral aýdany Myrzakent kentinde Ózbekstan Respýblıkasynyń Premer-Mınıstri Abdýlla Arıpovpen kezdesý ótkizdi. Bul týraly primeminister habarlady.
Úkimet basshylary Maqtaaral aýdanynyń sý basqan aýmaqtaryn aralap kórdi, sondaı-aq Jańajol aýyldyq okrýginiń Nurlyjol, Órgebas jáne Fırdoýsı aýyldarynda bolyp, sý tasqyny saldaryn joıý aıasynda júrgizilip jatqan jumystarmen tanysty.
Apattyq-qutqarý jáne kezek kúttirmeıtin jumystarǵa 1300-den astam adam men 220 birlik tehnıka, onyń ishinde Ózbekstannan 200-den astam maman men 100-ge jýyq órt sóndirý mashınalary, ekskavatorlar, traktorlar, sý sorǵyshtar jáne basqa da tehnıkalyq quraldar jumyldyryldy.
Maqtaaral aýdanynyń ákimshilik ortalyǵy Myrzakent aýylynda Qazaqstan men Ózbekstan Premer-Mınıstrleri jańa shaǵyn aýdannyń qurylys josparymen tanysyp, alǵashqy turǵyn úılerdiń irgetasyn qalaý rásimine qatysty jáne turǵyndarmen kezdesý ótkizdi.
Barlyǵy Myrzakent kentinde sý tasqynynyń saldarynan zardap shekken Jeńis, Jańa turmys, Dostyq eldi mekenderinen 500 otbasy úshin jeke turǵyn úıler, mektepter, balabaqsha men feldsherlik pýnktter salý josparlanǵan. Qurylys jumystaryn QR jáne ÓR mamandary birlesip júrgizetin bolady.
A. Mamın men A. Arıpov Fırdoýsı aýylyndaǵy qıraǵan úılerdi qalpyna keltirý jumystaryn tekserip, jergilikti halyqpen kezdesý ótkizdi.
Premer-Mınıstr Memleket basshysynyń tapsyrmasy boıynsha sý tasqynynan zardap shekken Túrkistan oblysy Maqtaaral aýdanynyń turǵyndary jańa nemese jóndelgen baspanamen tolyq qamtamasyz etiletinin atap ótti. Olardyń árqaısysyna respýblıkalyq bıýdjetten 100 myń teńgeden beriledi. Sonymen qatar iskerlik top ókilderi zardap shekkenderge demeýshilik kómek kórsetedi.
