Mamyr aıynyń 15-juldyzynda Aqparat jáne qoǵamdyq damý mınıstri Aıda Ǵalymqyzy Balaevamen aqparat salasyna qatysty jumystardy jandandyrý máselesin talqylaý boıynsha kezdesý ótti. Erkin formatta, ashyq pikir aıtylǵan kezdesýge qazaq tildi basylymdar men ınternet portaldarynyń bas redaktorlary jınaldy. Jıynǵa qatysýshylardyń bárine de sóz berilip, onda ózekti usynys-pikirler aıtyldy. Jaqynda ǵana taǵaıyndalǵan jańa mınıstrdiń jumysqa, ózgeriske, jańashyldyqqa degen qulshynysy, ynta-jigeri á degennen-aq baıqalyp turdy. Kezdesý barysynda Aıda Ǵalymqyzy alǵashqy bolyp sóz alyp, osyndaı qıyn-qystaý ýaqytta mańdaıynan qara teri sorǵalap, halyqqa qyzmet etip júrgen jýrnalıster ekenin tilge tıek etti. Ary qaraı atalǵan jıynnyń maqsat-mánimen qatar, aqparat salasynda eńbek etip júrgen azamattardyń usynysyn tyńdaı kele is-sharalar josparyn jasaqtaıtynyn aıtyp ótti. Aqparat jáne qoǵamdyq damý mınıstrine "Qazaq úni" basylymynyń bas redaktory Qazybek Isa, Abai.kz ulttyq portalynyń dırektory Dáýren Qýat, Dalanews.kz portalynyń bas redaktory Dýman Byqaı jáne «Adyrna» aqparattyq agenttiginiń prezıdenti jáne taǵy basqa kisiler ártúrli usynystar aıtty.
«MEMLEKETTIK TIL TÝRALY ZAŃDY QABYLDAÝ MÁSELESI ÓRShIP TUR»
Qazybek ISA:
-Memlekettiń ıdeologııasyn júrgizetin qazaq basylymdary ekeni belgili. Alaıda qazir qazaq tildi gazetteriniń reıtıngi tym tómendep ketti. Soǵan oraı jýyrda ǵana saıtymyzda Memlekettik til týraly zańdy qabyldaý jóninde maqala jarııalanǵan edi. Búgingi tańda zańǵa qol qoıýshylar sany 115 000 adamnan asyp ketti. Búkil qazaq basylymdary men BAQ ókilderi til týraly usynysymyzdy qoldap otyr. Sondyqtan memlekettik til týraly zańdy qabyldaý máselesi oıyńyzda júrse eken deımiz.
«ORYS TILDILERGE QARAǴANDA, QAZAQ TILDI SAITTARǴA KÓBIREK QARAJAT BÓLINÝI KEREK»
Dáýren QÝAT:
- Buryn orys tildi saıttarǵa kóbirek qarajat bólinetin. Qazir sol «dástúr» áli kúnge deıin jalǵasyp kele jatyr. Sondyqtan qazaq tildi saıttarǵa qarajat bólý máselesin taǵy bir qarastyrsańyzdar eken deımin.
Memlekettik satyp alý boıynsha tapsyrystardy berý jáne qabyldap alý júıesin ózgertý kerek dep oılaımyn.
Baspasóz kúnine oraı syı-sııapattar berilip jatsa jastarǵa stımýl bolar edi.
Memlekettik satyp alýlar berilgen kezde qazaqtyń tarıhyn, mádenıetin, salt-dástúrin, ónerin nasıhattaıtyn taqyryptardy negizge alsa degen usynysymyz bar.
Jáne halyqaralyq gazetterdi óziniń statýsyna saı etip, halyqaralyq katalogtarǵa kirgizý kerek.
«QAZAQ BASYLYMDARY OQYRMANDARǴA SATYLÝY ÚShIN QAZAQ KIOSKALARYN AShÝYMYZ KEREK»
Dýman BYQAI:
- Pochta qyzmetkerleri men jýrnalısterdi jınap, ortaq kezdesý ótkizý kerek sııaqty. Sebebi, gazetterdi aýyl-aımaqqa jetkizý máselesi úlken daý týǵyzýda.
Qazaqstanda gazettiń satylý, saýdalaný máselesi órship tur. «Karavan» dúkenderine gazetti satý kezinde úlken problemalarǵa kezdesemiz. Onyń aldyna shyǵý úlken qarajatty qajetsinedi. Sondyqtan gazetterdi satý máselesine kóńil bólip, qazaq kıoskalaryn ashsaq dep oılaımyn.
Jáne áleýmettik jelidegi toptardy memlekettik saıasatty júrgizý maqsatynda utymdy paıdalaný kerek.
«QAZAQ JÝRNALISTERI ÁLEMDIK AQPARAT QURALDARYNYŃ KEŃSESINDE TÁJIRIBEDEN ÓTÝI KEREK»
Arman SERIKULY:
-Qazaq saıttaryn jańa medıany ıgerýge qadamdar jasaý kerek, atap aıtqanda anımaııa, 3D skanerleý, 360 gradýstaǵy túsirilim, vertýaldy shyndyq (VR) jáne taǵy basqa tehnologııalardy ıgerýge kúsh salsaq aqparat qyzyǵyraq bolatyn edi. Bizdiń qazirgi tańda áleýmettik jelilerdegi jalpy oqyrmandar sany 800 000-nan asyp jyǵylady. Osy áleýmettik jelilerdi utymdy paıdalanyp, memlekettik ıdeologııalardy toptar arqyly jetkizýimiz kerek dep oılaımyn. Sonymen birge, qazaq jýrnalısteri álemdik aqparat quraldarynyń keńsesinde tájirıbeden ótse, medıa salasyn damytýǵa arnalǵan úzdik ıdeıalar baıqaýy uıymdastyrylsa aqparat salasy keńinen damıtyn edi.
Aqparat jáne qoǵamdyq damý mınıstri jıyn barysynda aıtylǵan usynystardy zerttep, tıimdi sheshimder qabyldaıtynyn jetkizdi. Sondaı-aq, bolashaqta halyqtyń ál-aýqatyn kóteretin memlekettik baǵdarlamalardy óńdeý, qarapaıym tilge salý, qyzyqtyrý BAQ ókilderiniń enshisinde ekenin de aıtty.
Jáne sóz sońynda «Jýrnalıstıkany ǵylym salasyna burý kerek. Qoǵamda talǵam paıda bolatyndaı materıaldar jazylýy tıis. Adamdardyń dúnıetanymy keńeıetindeı maqalalardy halyqqa usynsaq, olarda talǵam paıda bolady. Al halyqta talǵam bolsa zaman da durys qalyptasady» deıdi Aqparat jáne qoǵamdyq damý mınıstri Aıda Ǵalymqyzy.
«Adyrna» ulttyq portaly
