Memleket basşysy Qasym-Jomart Toqaev saiasi quǧyn-sürgın jäne aşarşylyq qūrbandaryn eske alu künıne orai ündeu jariialady.
Qūrmettı otandastar!
HH ǧasyrdyŋ 20-50 jyldaryndaǧy saiasi quǧyn-sürgın zobalaŋy – halqymyzdyŋ tarihyndaǧy qasırettı kezeŋ. Qazaqstan täuelsızdık alǧannan keiın osy näubettıŋ qūrbandaryn mäŋgı este qaldyru üşın memlekettık deŋgeidegı tiıstı şaralardy jüzege asyra bastady. 1993 jyly «Jappai saiasi quǧyn-sürgın qūrbandaryn aqtau turaly» zaŋ qabyldandy. 1997 jyly Elbasy N.Nazarbaevtyŋ Jarlyǧymen 31 mamyr Saiasi quǧyn-sürgın qūrbandaryn eske alu künı retınde belgılendı. Keŋes zamanynda ömır sürgen halyqtarǧa «ülken terrordyŋ» orasan zor qasıret äkelgenı esımızde. Zūlmat jyldarda Qazaqstanǧa KSRO-nyŋ tükpır-tükpırınen bes millionnan astam adam jer audaryldy. 100 myŋǧa juyq azamatymyz quǧyn-sürgınge ūşyrap, sonyŋ 20 myŋnan astamy atyldy. Jazyqsyz jazalanǧandardyŋ qatarynda Ä. Bökeihan, A. Baitūrsynūly, M. Tynyşbaev, M. Dulatūly, T. Rysqūlov, M. Jūmabaev, S. Seifullin, I. Jansügırov, B. Mailin, S. Asfendiiarov siiaqty körnektı memleket jäne qoǧam qairatkerlerı, basqa da ūlt ziialylary bar. Otanyn satqandar äielderınıŋ Aqmola lagerı («ALJİR») sol jyldardaǧy qatygezdık pen jauyzdyqtyŋ qara taŋbasyndai boldy. Mūnda saiasi tūtqyndardyŋ jaqyn tuystary, äielderı men balalary qamaldy. Bügın bız ūjymdastyru jyldarynda aştyqqa ūşyraǧandardy, sondai-aq tuǧan jerınen ketuge mäjbür bolǧandardy da eske alamyz. Būl zobalaŋnyŋ qasıretın üş millionǧa juyq adam tartty. Sol jyldardaǧy orasan zor adam şyǧyny men taǧdyr tauqymetı ärbır azamattyŋ jüregıne jara saldy. Totalitarizmnen zardap şekken köptegen ūlt ökılderı üşın qazaq jerı qūtty mekenge ainaldy. Ata-babalarymyzdan daryǧan qaisarlyq pen tözımdılıktıŋ arqasynda qataŋ synnan abyroimen ötıp, bırtūtas ūlt retınde bırıguge mümkındık aldyq. Bügınde respublika öŋırlerınde «Qazaq halqyna – myŋ alǧys» monumentterı ornatylǧan. Būl – qazaq jūrtynyŋ aq peiılı men danalyǧyna degen şeksız rizaşylyqtyŋ belgısı. Tarihi ädıldıktı qalpyna keltıru jūmystaryn aiaqtap, saiasi quǧyn-sürgın qūrbandaryn aqtau üşın arnaiy memlekettık komissiia qūrudy tapsyrdym. Bız jazyqsyz jazalanǧandardyŋ ärqaisysyn este saqtau arqyly ǧana kemel keleşekke jol aşamyz. Bolaşaqtyŋ berık negızı Täuelsızdıkten bastau alady. Ötken ǧasyrdaǧy eŋ qily kezeŋnıŋ bırınde jazyqsyz japa şekkenderdıŋ ruhyna taǧzym etu – barşamyzdyŋ perzenttık boryşymyz."Adyrna" ūlttyq portaly
