Elımızdı ındet jailaǧaly berı, äsırese alǧaşqy ekı aida oqşaulanyp üide otyrǧanymyz bar. Bıraq odan jaǧdai jaqsara qoiǧan joq. Tötenşe jaǧdaidyŋ uaqyty bıtkenmen, karantin älı de küşınde.
Degenmen, ındettı özımız örşıtıp aldyq. Qazır de auruhanalar adamǧa lyq toly. Tıptı keibır öŋırler nauqastardy qabyldamai jatyr. Koronavirusten üide emdelıp jatqandar bar. Laiym olar tezırek sauyǧyp ketsın deiık, bıraq karantinnıŋ paidasy bolǧanyn da aita keteiık.
Ol eŋ aldymen jol-kölık oqiǧasyna tıkelei bailanysty. Ūlttyq ekonomika ministrlıgı Statistika komitetınıŋ deregıne jügınsek, soŋǧy bes aida jol-kölık apaty kürt tömendegen körınedı. Işımdık ışıp, kölık aidaǧan 741 jürgızuşı ūstalǧan. Būl 2019 jyldyŋ osy merzımımen salystyrǧanda kölık apaty oqiǧasynyŋ 33,3 paiyzǧa azaiǧanyn körsetedı. Būl rette mamandar koronavirus pen karantinnıŋ äserı bolǧanyn da jasyrmaidy. Öitkenı adamdar eşqaida şyqpai, üide oqşaulandy, jürgızuşıler kölıkke köp otyrǧan joq. Osynyŋ bärı de öz äserın tigızgen boluy kerek.
Desek te, äkımşılık jazaǧa tartylǧan 741 azamattyŋ 658-ı ışımdık ışıp, esırtkı qoldanǧany üşın jürgızuşı kuälıgınen airylǧan. Al qalǧandaryna ärtürlı deŋgeidegı jazalar qoldanylǧan.
Būl jaǧdaidy aimaqtyq deŋgeide qarastyratyn bolsaq, ışımdıkke toiyp alyp, rulge otyratyndardyŋ köş basynda Batys Qazaqstan oblysy (87 adam) tūr. Odan keiın Qostanai oblysy - 75 adam, Maŋqystau oblysy -63 adam.
Eskerte keteiık, memleket basşysy Qasym-Jomart Toqaevtyŋ tapsyrmasymen jyl basynan berı ışımdık ışıp, rulge otyratyn jürgızuşılerge qatysty talap qataityldy. Sondyqtan zaŋnyŋ qataŋdyǧy da jauapkerşılıktı arttyryp otyr.
Erkın Qaldan, «Adyrna» ūlttyq portaly
