Elorda künın de atap öttık. Eldegı pandemiia jaǧdaiyna qaramastan aituly merekenı jyldaǧydai dürıldetıp ötkızdık. Oǧan dälel Nūr-Sūltan qalasynda boi kötergen elbasynyŋ eskertkışı. Bır täulıktıŋ ışınde būl şaraǧa halyq öz narazylyǧyn bıldırıp te ülgerdı. Post ta jazyldy, öleŋ de arnaldy.
Bıreuge ūnar, bıreuge ūnamas. Taǧy bır jaŋalyqpen bölısuge asyqpyz iaki “mäjbürmız”. «Astana» halyqaralyq qarjy ortalyǧy (AHQO) Nūrsūltan Nazarbaev Qorymen bırlesıp Qazaqstan Respublikasynyŋ Tūŋǧyş Prezidentı N.Ä. Nazarbaevtyŋ mereitoiyna orai «Zamanaui qazaqstandyq memlekettılıktıŋ qalyptasuy men damuy (alǧaşqy qoldan)» kıtabynyŋ aǧylşyn tılındegı nūsqasyn tanystyrdy, dep habarlaidy QazAqparat.
Kıtapta Qazaqstan Respublikasy Tūŋǧyş Prezidentı – Elbasynyŋ egemen Qazaqstannyŋ zamanaui memlekettılıgın bekıtu men nyǧaitudaǧy rölı aşylǧan. Basylymda Elbasynyŋ basşylyǧymen eldıŋ qalyptasu jäne damu prosesı, memlekettık basqaru instituttaryn qūru men jaŋǧyrtu kezeŋderı aitylǧan. Qazaqstan Respublikasy Konstitusiiasy negızınde qazaqstandyq qoǧamnyŋ jaŋǧyrtyluy jan-jaqty qamtylǧan.
Kıtaptyŋ onlain tanystyrylymy saltanatyna QR Joǧarǧy sotynyŋ töraǧasy J.Asanov, QR Ädılet ministrı M.Beketaev, QR Konstitusiialyq keŋes müşesı Ü.Şapaq, AHQO Basqaruşysy Q.Kelımbetov jäne Nūrsūltan Nazarbaev Qory atqaruşy direktorynyŋ orynbasary İ.Rogov qatysty.
Kıtaptyŋ erekşelıgı – ony qūrastyruǧa Elbasy Nūrsūltan Nazarbaevtyŋ bastamasymen jasalǧan reformalar men özgerısterge tıkelei qatysqan memlekettık jäne qoǧam qairatkerlerı atsalysty.
Şaraǧa odan bölek Latviia Konstitusiialyq sotynyŋ töraǧasy İ. Ziemele, AHQO HTO Töraǧasy B.Domann, AHQO Akademiialyq keŋesınıŋ müşesı Äbdıraiymov B.J. jäne Ǧylym akademiiasynyŋ tıltanu mamandyǧy boiynşa akademigı Ş.Qūrmanbaiūly qatysty.
Ekonomikalyq ahual aqsap tūrǧan kezeŋde mūndai mädeni şaralardy jürgızu aqtala ma? Eldegı krizistık jaǧdaida memleket tarapynan kıtap basyp şyǧaru ısı tiımdı bola ma, joq pa, ol jaǧyn baǧamdaudy oqyrmannyŋ öz erkıne qaldyrdyq. Bälkım, pandemiia dep aldaǧy josparlardy yǧystyrǧan da dūrys emes şyǧar? Bastysy, bilıktıŋ de, halyqtyŋ da közı tura bolǧai!
Aiaulym ÄBILDA,
«Adyrna» ūlttyq portaly.
