Densaulyq saqtau ministrınıŋ orynbasary Liudmila BIýRABEKOVA halyqqa vaksinasiia jasau mäselesın söz ettı. Būl turaly ol ötken aptada onlain brifing barysynda mälımdedı.
Vise ministrdıŋ aituynşa, vaksina jasau eŋ aldymen sozylmaly auruy bar, syrqaty qauıptı sanalatyn adamdardan bastalady eken. Eŋ aldymen, pnevmoniia auruyna şaldyǧuy mümkın degen adamdarǧa ekpe egılu josparlanuda eken. Sondai-aq, Biurabekova halyqtyŋ qanşa paiyzyna vaksinasiia jasalmaq degen sūraqqa: «Bız ekpe salynuǧa tiıs degen halyqtyŋ 15 paiyzyna esep jasap otyrmyz. Alaida kelısım aiasynda būl körsetkıştı 20 paiyzǧa deiın arttyrudy josparlap otyrmyz», - dedı.
Sonymen qatar vise ministr vaksina şyǧa salysymen, ekpenı satyp alu jäne vaksinasiia jūmystary bastalatynyn da mälımdedı.
Desek te, vise ministr qandai negızge süienıp, aldyn ala ekpenı satyp aluǧa jäne qanşa adamǧa salynatynyn josparlap jatqanyn tarqatyp aitpady. Koronavirustyŋ aldyn alatyn vaksina jer planetasynda älı tabylǧan joq. Sonda bızdıŋ densaulyq ministrlıgı qandai vaksinany satyp aluǧa aqşa sanap otyr? Qandai vaksinany halyqtyŋ 20 paiyzyna salmaq?
Qazaqstan emes, atynan at ürketın, ǧylymy şaryqtap damyp ketken Germaniia sekıldı alpauyt elder koronavirustyŋ vaksinasy taiauda tabylatynyna senım artpauda. Al qazaqstandyq densaulyq saqtau ministrlıgı ökılderı ekpe nauqanyna saqadai sai daiyn otyr.
Sız qalai oilaisyz?
Äuelhan ŞONJAN, zeinetker: «Bızdıŋ eldegı barlyq tırlık osyndai ǧoi, aty bar, zaty joq. Menıŋşe, ministrlık ekpe jasauǧa halyqty aqyryndap köndıru jūmysyna kırısken sekıldı. Osy virus şyqqanda adamdardy jappai vaksinasiia jasau bastalatyny söz bolǧany este. Soǧan qaraǧanda, pandemiiadan keiıngı kelesı jospar osy ekpe siiaqty. Jaraidy, ekpe jasataiyq delık. Alaida ol qandai ekpe? Älem ǧalymdarynyŋ özı koronavirustyŋ vaksinasy oilap tabylǧanymen, onyŋ nätijesın köruge kemınde bır jyl uaqyt keregın aitty emes pe?
Älem ǧalymdary aqymaq pa, joq bızdıŋ şeneunıkter bılgış pe? Pandemiia kezınde qazaqstandyq medisinanyŋ jaǧdaiy qai deŋgeide ekenıne közımız jettı. Ökpe qabynuy men koronavirusty ajyrata almai, qala berdı ındetke eş daiyndyǧy bolmaǧany, bar därını qoimadan şyǧarmai ūstap, halyqty qynadai qyrǧanyn şyqqyr közımız kördı emes pe?! Osydan keiın kım qazaq medisinasyna senım artyp, ekpe jasatuǧa kelıse qoiar eken? Menıŋşe, vaksina mäselesı Densaulyq saqtau ministrlıgınıŋ biudjetten kezektı aqşa sūrauǧa jasalǧan qadamy ǧana. Milliardtap aqşany jelge şaşqan medisinamyz älı ömırde joq vaksinany söz etuge de arlanbaǧany janymyzǧa batady».
Erbol TŪRǦANBAI, jūmysşy: «Özımızdıŋ saulyǧymyz, amandyǧymyz üşın, ärine vaksina jasatuǧ tiıspız. Men qos qoldap qoldaimyn. Jäne eŋ bırınşı bolyp saldyruǧa daiynmyn. Öitkenı koronavirustan ölıp qala jazdap, jazylǧannyŋ bırı özım. Qūdai betın aulaq etsın, endı qaityp solai auyrmas üşın tezırek ekpe jasaluyn kütıp te jürmın».
Janna ADAMBEKQYZY, ekonomist: «Äuelı vaksina tabylsynşy. Ol tabylmai tūryp, halyqqa ekpe egemız deu qisynsyz ǧoi. Älde bızdıŋ därıgerler bas köz joq oilaryna kelgen vaksinasiiany bastap jıbermek pe? Köktemnen bergı közımız jetken elımızdegı medisina ahualy syn kötermei tūr. Parasetamoly joq Qazaqstanda älemdı dürlıktırgen koronavirusqa qarsy ekpe jasaudy aitu, külkılı emes pe?!
Şılde aiynda ölım auzynan qaitqan, medisinamyzdyŋ qauqarsyz keipın körgen kez kelgen adam ekpege qarsy bolatyn şyǧar. Onyŋ üstıne bızdıŋ elde medisinaǧa senım qalmaǧan. Vaksinaǧa tıptı sene qoimas. Öz basym ekpe jasatuǧa qarsymyn».
Bız sūrau salǧan azamattardyŋ pıkırı osyndai. Sız ne deisız, qūrmettı oqyrman? Vaksina turaly söz qozǧauǧa älı erte emes pe?
Meruert HUSAİNOVA,
«Adyrna» ūlttyq portaly.
