Şymkentte sifrlandyru baǧytynda bırqatar jūmystar atqaryluda. Şymkent qalasynyŋ Sifrlandyru basqarmasy basşysynyŋ mındetın atqaruşy Dosan Älıbekov baspasöz brifingınde atqarylǧan jūmystardan habardar ettı.
Dosan Binazarūlynyŋ aituynşa, biyl bılım salasy qyzmetı jaŋa oqu jylyna orai tolyq sifrly jüiege köştı. Balalardyŋ onlain rejimde sabaq aluyn qamtamasyz etu üşın qaladaǧy barlyq bılım beru ūiymdary joǧary jyldamdyqty internetpen qamtamasyz etılude.
– Bılım salasy – eŋ maŋyzdy äleumettık salanyŋ bırı. Biyl bılım salasy tolyq avtomattandyryldy. Balalalardy bılım ūiymdaryna qabyldau tolyq elektrondy formatta jüzege asty. Sondai-aq, tehnikalyq jäne käsıptık bılım beru ūiymdaryna qabyldau, otbasy jäne balalarǧa qatysty qyzmetter, taǧy basqa qyzmetter tolyq avtomattandyryldy.
Qala aumaǧyn joǧary jyldamdyqty jäne quatty internet jelısımen qamtamasyz etu maqsatynda bügınde 11 bazalyq stansiia ornatyluda. 11 oryn boiynşa da qalada zaŋdastyru jūmystary aiaqtaldy. Şymkent qalasynyŋ aumaǧyna kıretın barlyq şalǧaidaǧy eldımekenderdı joǧary sapadaǧy internetpen qamtu üşın qosymşa 43 nüktege taldau jūmystary jürgızıldı. Qyrküiek, qazan ailarynda bazalyq stansiialardyŋ jūmysyn ıske qosu jūmystary aiaqtalady, – dedı Dosan Binazarūly.
Aita ketsek, bügınde Şymkent qalasy sapaly internet jüiesımen 80 paiyz qamtylǧan. Al ornatylyp jatqan bazalyq stansiialardyŋ jūmysy aiaqtalǧan sätte būl körsetkış 100 paiyzǧa jetpek.
Şymkent
