Jiyrma jastan jaŋa asqan jap jas aqyn, qaryndasym – Aqgül Aidarbekovanyŋ öleŋderın oqyp otyryp, älı kırlemegen päk jüregınıŋ lüpılın tyŋdaǧandai boldym. Onyŋ tap-taza tūmadai möldırep tūrǧan jyrlarynan artyq alqynys pen jalǧan jūlqynystyŋ da, jylauyqtyqqa ūqsas jylymyq leptıŋ de, orynsyz örşelenudıŋ de belgılerı mülde baiqalmaidy eken. Qai öleŋınen bolsa da qyz balaǧa tän qylausyz sezımnıŋ tabiǧi sipattaryn anyq baiqauǧa bolady. Būl aqyn qyz ışkı jan tolqynystaryn qaǧaz betıne öleŋmen tüsırıp otyrǧanda, otty sezımderın laulatyp, lapyldatyp ta jıbermeidı, ne bolmasa jasandy ūiaŋdyqqa salynyp, tym bosaŋsyp ta ketpeidı.
Mahabbat turaly öleŋderınde de üzdıgıp ülbıreu men essız eljıreuge eşqaşan jol bermeidı-au deimın. Mysaly, özınıŋ qūpiia türde jaqsy köretın adamyna:
Könıp jürgen şyǧarmyn bos yŋǧaiǧa,
Bırdeŋe dep aituǧa jetpei küşım.
Bır jylatyp alsaŋ ǧoi osyndaida,
Erkelep ketpeu üşın... – dep, jürek tübınde jatqan jasyryn syryn astarly türde jetkıze salady.
Aqgül qaryndasymnyŋ taǧy bır erekşelıgı – öte syrşyldyǧy bolsa kerek. Öleŋderın oqyǧan adam onymen syrlasyp otyrǧandai äserde qalady. Mysaly, «Şeşım» degen öleŋınde qūpiia türde jaqsy köretın adamynyŋ özıne salqyndyǧyna mūŋaiyp otyryp, kenetten mynandai şeşım qabyldaidy:
Jüdeu jandy taǧy kımder qinamaq,
Maŋdaiymdy bälkım endı öppes mūŋ.
Bolar-bolmas aqylymdy jinap ap,
(Qoişy sony...)
Ūmytamyn dep şeştım.
Aqgüldıŋ «Äke» degen öleŋı kımdı bolsa da tebırentpei qoimaidy. Būl öleŋ osy taqyrypta jazylǧan köptegen aqyndardyŋ tuyndylarynan müldem erekşe dep batyl türde aita alamyn. Mūnda äkesınıŋ tırlıgıne namystanǧan qyz balanyŋ oǧan qaratylyp aitylǧan perzenttık ökpesı men nazy sonşa näzıktıkpen öleŋ tılıne köşırılıptı. Būl jas aqyn özıne ǧana tän qoltaŋbasyn tauyp alǧanǧa ūqsaidy. Söz basynda aitqanymdai, tūnyp tūrǧan tūmadai möldırlık pen kölgırsuden aulaq şynşyldyq sol qoltaŋbanyŋ negızgı körsetkışındei bolyp körınedı eken. Sırä, būl erekşelık aqynnyŋ ışkı jan düniesınıŋ arpalysynan tuyndap jatsa kerek.
Jüregımdı jalǧyzdyq ügıtedı, jonady...
Sondai sätte qalaişa aitylady jol änı?!
Sondai sätte aryma kım araşa tüsedı,
Sondai sätte janyma kım jūbanyş bolady?!
Mıne, ışkı arpalys degen – osy!
Söz sonyŋda aitarym – Aqgül aqyn eken! Qūdai syilaǧan sol qasietın joǧaltyp almasa eken, damyta tüsse eken!
Äbubäkır Qairan,
“Adyrna” ūlttyq portaly
